വര്‍ദ്ധിച്ചുവരുന്ന പീഡനകഥകള്‍ തന്നെ അസ്വസ്ഥയാക്കുന്നെന്ന് തമിഴ്,മലയാളം നടി നിക്കി ഗല്‍റാണി. തിരുവനന്തപുരത്ത് തന്നെ പീഡിപ്പിക്കാന്‍ ശ്രമിച്ച സ്വാമിയുടെ ലിംഗം പെണ്‍കുട്ടി മുറിച്ച വാര്‍ത്ത ചാനലുകളിലൂടെ കണ്ട ശേഷം പ്രതികരിക്കുകയായിരുന്നു താരം. എന്തായാലും ആ പെണ്‍കുട്ടി ധാരമായ നിലപാടാണ് സ്വീകരിച്ചതെന്നും നിക്കി പറഞ്ഞു. രാജ്യത്തുടനീളം യുവാക്കള്‍ ലഹരിക്ക് അടിമപ്പെടുന്നുണ്ട്. അത് തന്നില്‍ ഭീതി ജനിപ്പിക്കുന്നെന്നും നിക്കി വ്യക്തമാക്കി. ലഹരിക്ക് അടിമപ്പെടുന്നവരാണ് പലപ്പോഴും സ്ത്രീകളെയും കുട്ടികളെയും പീഡിപ്പിക്കുകയും ഉപദ്രവിക്കുകയും ചെയ്യുന്നത്. 
ഇന്നത്തെ പെണ്‍കുട്ടികള്‍ക്ക് പ്രതിസന്ധികളില്‍ തളരാതെ, അതിനെ തരണം ചെയ്യാനുള്ള കഴിവുണ്ട്. തെറ്റും ശരിയും തിരിച്ചറിയാനുള്ള പക്വത നന്നേ ചെറുപ്പത്തിലേ ആര്‍ജ്ജിക്കണം. മാതാപിതാക്കളും ബന്ധുക്കളും അതിന് സഹായിക്കണമെന്നും നിക്കി പറയുന്നു. സിനിമയിലും ജീവിതത്തിലും തനിക്ക് വഴികാട്ടി ചേച്ചി സഞ്ജനയാണ്. നല്ല ചിത്രങ്ങളുടെ ഭാഗമാകാന്‍ കഴിയുന്നതും പ്രേക്ഷകരുടെ സ്‌നേഹം അനുഭവിക്കാന്‍ കഴിയുന്നതും അതുകൊണ്ടാണ്. ഇന്ന നായകന്‍മാര്‍ക്കൊപ്പമേ അഭിനയിക്കൂ എന്ന വേര്‍തിരിവൊന്നും ഇല്ലെന്നും കഥാപാത്രത്തെ കുറിച്ച് മാത്രമാണ് ശ്രദ്ധിക്കുന്നതെന്നും നിക്കി വ്യക്തമാക്കി. സിനിമയില്‍ ശ്രീദേവിയെയാണ് നിക്കി ആരാധിക്കുന്നത്. ജീവിതത്തില്‍ മദര്‍തെരേസ, ജയലളിത, ഇന്ദിരാഗാന്ധി. 
പെണ്‍കുട്ടികളുടെ വസ്ത്രധാരണത്തെ കുറിച്ച് പലപ്പോഴും പലരും മോശമായ പ്രതികരണങ്ങള്‍ നടത്താറുണ്ട്. തനിക്ക് കംഫര്‍ട്ടബിളായ വേഷങ്ങള്‍ മാത്രമേ അണിയൂ എന്നും കറുപ്പും വെളുപ്പും കലര്‍ന്ന വസ്ത്രങ്ങളാണ് ഇഷ്ടം. ഇവിടുത്തെ പെണ്‍കുട്ടികളെ വിമര്‍ശിക്കുന്നവര്‍ യൂറോപ്യന്‍ രാജ്യങ്ങളില്‍ പോയാല്‍ ഏതെങ്കിലും സ്ത്രീകളെ ഉപദ്രവിക്കുമോ, ഇല്ല. കാരണം അവിടങ്ങളിലെ നിയമം ശക്തമാണ്. നമ്മുടെ നാട്ടില്‍ നിയമം നടപ്പാക്കുന്നതില്‍ വീഴ്ച സംഭവിക്കുന്നെന്നും താരം ചൂണ്ടിക്കാട്ടി.