അമല എന്താ അന്നും ഇന്നും ഒരു പോലെയിരിക്കുന്നത്? എവിടെ ചെന്നാലും പലരും ചോദിക്കും. അടുത്തിടെ കെയറോഫ് സൈരാഭാനുവില്‍ അഭിനയിക്കാന്‍ എത്തിയപ്പോള്‍ മലയാളികളായ വീട്ടമ്മമാര്‍ പറഞ്ഞത് മായ ഇപ്പോഴും അതുപോലിരിക്കുന്നെന്നാണ്. എന്റെ സൂര്യപുത്രിയിലെ അമലയുടെ കഥാപാത്രത്തിന്റെ പേരാണ് മായ. മെഡിറ്റേഷനും യോഗയും ചെയ്താല്‍ എല്ലാവരും തന്നെ പോലെ മാറ്റമില്ലാതിരിക്കുമെന്ന് അമല പറയുന്നു. ജീവിതത്തലില്‍ പലവിധ ടെന്‍ഷനുകള്‍ ഉണ്ടാകും. അപ്പോഴൊക്കെ മെഡിറ്റേഷന്‍ ആശ്വാസമായി. വിവാഹശേഷമാണ് യോഗയും മെഡിറ്റേഷനും ശീലമാക്കിയത്. അതുകൊണ്ട് എന്ത് സങ്കടം വന്നാലും എന്ത് പ്രശ്‌നം വന്നാലും തന്നെ ബാധിക്കാറില്ലെന്നും അമല ഒരു തമിഴ് മാസികയ്ക്ക് നല്‍കിയ അഭിമുഖത്തില്‍ വ്യക്തമാക്കി. 
താനെപ്പോഴും സന്തോഷവതിയാണെന്ന് അമല പറയുന്നു. സിനിമ, അശുപത്രി, കുടുംബം തുടങ്ങി എല്ലാ കാര്യങ്ങളും ഒരുപോലെ കൊണ്ട് പോകാന്‍ മെഡിറ്റേഷന്‍ കൊണ്ട് സാധിക്കുന്നു. പല ഭാഷകളില്‍ അഭിനയിച്ചിട്ടുണ്ടെങ്കിലും മലയാളത്തിനോട് കൂടുതല്‍ താല്‍പര്യമുണ്ടെന്നും താരം പറഞ്ഞു. ആകെ കൂടി രണ്ട് മലയാളസിനിമയിലേ അഭിനയിച്ചിട്ടുള്ളൂ. അതിലെ കഥാപാത്രങ്ങളെ മലയാളികള്‍ ഏറെ സ്‌നേഹിക്കുന്നു. അവിടെ (കേരളത്തില്‍ ) ചെല്ലുമ്പോഴെല്ലാം പലരും ഓടിവന്ന് മായേ... എന്ന് വിളിക്കുന്നു. അതോടെ ഒരു കാര്യം ബോധ്യമായി, വലിച്ച് വാരി സിനിമ ചെയ്യുന്നതിനേക്കാള്‍ അഭിനയിച്ച ഒന്നോ, രണ്ടോ കഥാപാത്രങ്ങളിലൂടെ എക്കാലവും അറിയപ്പെടുന്നതാണ് നല്ലത്. മലയാളത്തില്‍ ഒരു റീ എന്‍ട്രി തീരെ പ്രതീക്ഷിച്ചിരുന്നില്ല. ഇപ്പോ സൈരഭാനു തെലുങ്കില്‍ റീമേക്ക് ചെയ്യാനുള്ള ശ്രമത്തിലാണ് താനെന്നും അമല പറഞ്ഞു.