ലേഡി സൂപര്‍സ്റ്റാറിന്റെ ഇഷ്ട്ടങ്ങള്‍
തിരുവല്ലക്കാരി ഡയാന കുര്യന്‍ എന്ന നാടന്‍പെണ്‍കുട്ടിയില്‍ നിന്ന് നാം ഇന്ന് കാണുന്ന നയന്‍താരയായി മാറിയതിനുപിന്നിലെ പ്രയത്‌നം വലുതാണ്. ഇന്ന് തെന്നിന്ത്യ അടക്കിവാഴുന്ന താരസുന്ദരിയായി മാറാനായി താരത്തിന് അധികനാളുകള്‍ വേണ്ടിവന്നില്ല.
തികഞ്ഞ അച്ചടക്കവും കാര്യങ്ങള്‍ പക്വതയോടെ കാണാനുള്ള കഴിവും ഡയാന എന്ന നയന്‍താരയ്ക്ക് സ്വന്തം. മലയാള സിനിമയിലൂടെ അഭിനയരംഗത്തെത്തിയ ഈ താരം പെട്ടെന്ന് തന്നെ അന്യഭാഷ സിനിമകളിലേയ്ക്ക് ചേക്കേറി. മലയാളിത്തമുള്ള വേഷങ്ങളില്‍ നിന്ന് കഥാപാത്രങ്ങള്‍ക്കുവേണ്ടി ഗഌമറസാകാനും ഈ നടിക്ക് മടിയുണ്ടായിരുന്നില്ല. സിമ്രാന്‍, ജ്യോതിക മുതലായ താരറാണിമാര്‍ വിവാഹത്തോടെ സിനിമയ്ക്ക് ഇടവേള നല്‍കിയ സമയത്തായിരുന്നു ഏറെ പ്രതീക്ഷയോടെ നയന്‍താര അവിടേക്ക് വന്നത്. ഒപ്പം മത്സരിക്കാന്‍ മറ്റു നായികമാര്‍ ഉണ്ടായിരുന്നെങ്കിലും സിനിമയ്ക്കുവേണ്ടിയുള്ള ഇവരുടെ കഠിനാധ്വാനവും ആത്മവിശ്വാസവും അഭിനയരംഗം വിട്ട നടിമാരുടെ സിംഹാസനം നയന്‍താരയ്ക്ക് സ്വന്തമായി. മലയാളം , തമിഴ്, തെലുങ്ക്, കന്നഡ എന്നിങ്ങനെ നാലോളം ഭാഷകളിലായി ധാരാളം സിനിമകള്‍ നയന്‍സ് ചെയ്തുകഴിഞ്ഞു. ഓരോ വര്‍ഷം കടക്കുന്തോറും സൗന്ദര്യവതിയായി മാറിയ ഒരേയൊരു നടിയെന്ന ബഹുമതിയും നയന്‍സിന് സ്വന്തം. കൂടാതെ ലേഡി സൂപ്പര്‍ സ്റ്റാര്‍ എന്ന പരിവേഷവും.
കുഞ്ഞു കുട്ടികള്‍ മുതല്‍ പ്രായമായവര്‍ വരെ ഏവര്‍ക്കും ഇഷ്ടമുള്ള ഒരേയൊരു നടിയാണ് നയന്‍സ്. സിനിമയില്‍ നിന്ന് നയര്‍സിനെ പുറത്താക്കാന്‍ പലരും ശ്രമിച്ചിരുന്നെങ്കിലും അവരെയൊക്കെ എതിര്‍ത്തുതോല്‍പ്പിച്ചുകൊണ്ടാണ് നയന്‍സ് തന്റെ ഇരിപ്പിടം ഉറപ്പിച്ചത്. സിനിമയില്‍ മാത്രമല്ല ജീവിതത്തിലും റാണിയായ നയന്‍താരയുടെ ബ്യൂട്ടി സീക്രട്ട് ചിട്ടയായുള്ള വ്യായാമമാണ്
വ്യായാമം
അതിരാവിലെ എഴുന്നേറ്റ് വ്യായാമം ചെയ്യാന്‍ ഇഷ്ടപ്പെടുന്ന നടിയാണ് നയന്‍സ്. ആദ്യമൊക്കെ തനിക്ക് അറിയുന്ന രീതിയില്‍ ചെറിയ രീതിയിലുള്ള വ്യായാമമാണ് ചെയ്തിരുന്നത് .വൈകാതെ ഒരു ട്രെയ്‌നറെ വച്ച് പലതരം വ്യായാമമുറകള്‍ അഭ്യസിച്ചു. ചിട്ടയായുള്ള വ്യായാമമാണ് തന്റെ സൗന്ദര്യമെന്നാണ് നയന്‍സ് അഭിപ്രായപ്പെടുന്നത്.
ഭക്ഷണത്തോട് താല്‍പര്യമില്ല,
ജീവിക്കാന്‍ വേണ്ടി ഭക്ഷണം കഴിക്കുമെന്നല്ലാതെ ആഹാരത്തോട് അമിതമായ താല്‍പര്യമില്ല. പക്ഷേ കഴിക്കുന്നതില്‍ അധികവും നോര്‍ത്ത് ഇന്ത്യന്‍ വിഭവങ്ങളാണ്. വീട്ടിലായാലും ലൊക്കേഷനിലായാലും വൈറ്റമിന്‍ ജ്യൂസുമാത്രമേ താരം കഴിക്കുകയുള്ളൂ. ഇത് കേള്‍ക്കുമ്പോള്‍ നെറ്റി ചുളിക്കുന്നവര്‍ക്കുള്ള നയന്‍സിന്റെ മറുപടി ഇങ്ങനെ ''വ്യത്യസ്തതകളുള്ള ആഹാരം കഴിക്കാന്‍ ഇഷ്ടമുള്ളവരുണ്ടാകും. ഒരുപക്ഷെ ഇതിനുവേണ്ടി യാത്രകള്‍ നടത്തുന്നവരും കാണും. അത് നല്ലതാണ് . പക്ഷെ എനിക്ക് എന്റെ ആരോഗ്യം നോക്കിയേ പറ്റൂ''
ദേഷ്യം മാറിയതിന് പിന്നില്‍, സിദ്ദിഖ്
ചെറുപ്പം മുതല്‍ കൂടപ്പിറപ്പായി ഉണ്ടായിരുന്ന ദേഷ്യം മാറിയതിന് പിന്നില്‍ സംവിധായകന്‍ സിദ്ദിഖ് ആണെന്ന് താരം വ്യക്തമാക്കുന്നു. തന്റെ ജോലി വളരെ കൃത്യമായി ചെയ്തുതീര്‍ക്കുക എന്നതു പോലെ ഒപ്പമുള്ളവരും അവരുടെ ജോലി ചെയ്യണമെന്ന നിര്‍ബന്ധബുദ്ധിയുള്ള താരമാണ് നയന്‍സ്. അല്ലെങ്കില്‍ വളരെ പെട്ടെന്ന് താരം ക്ഷുഭിതയാകും. അങ്ങനെയിരിക്കുന്ന സമയത്താണ് കേരളത്തില്‍ ബോഡിഗാര്‍ഡിന്റെ ഷൂട്ടിംഗ് തുടങ്ങിയത്. കണ്‍മുമ്പില്‍ നടക്കുന്ന ഏതുകാര്യത്തെയും ചിരിച്ചുകൊണ്ട് വരവേല്‍ക്കുന്ന പ്രകൃതക്കാരനെ താന്‍ അവിടെ കണ്ടുവെന്നും ഷൂട്ടിംഗ് തീരുന്നതുവരെ ആ വ്യക്തിയുടെ സ്വഭാവത്തിലെ ക്ഷമയും സ്‌നേഹവും അങ്ങനെതന്നെ നിലനിന്നിരുന്നുവെന്നും അതോടെയാണ് തന്റെയുള്ളിലെ ദേഷ്യവും കെട്ടടങ്ങിയതെന്ന് നയന്‍സ് സാക്ഷ്യപ്പെടുത്തുന്നു.
ഇഷ്ടതാരം
ഒപ്പം അഭിനയിച്ചവരില്‍ ഇഷ്ടതാരമാരെന്ന് ചോദിച്ചാല്‍ മിക്കനടിമാരും നല്‍കുന്ന മറുടി 'എല്ലാവരെയും' എന്നാകും. മറ്റുചിലര്‍ അവരുടെ ഉത്തരം ചിരിയിലൊതുക്കും. എന്നാല്‍ വിവിധ ഭാഷകളിലായി മുന്‍നിര നായകന്മാരോടൊപ്പം സ്‌ക്രീന്‍ പങ്കിട്ട നയന്‍താര നിര്‍ഭയമായി മറുപടി നല്‍കും 'തമിഴകത്തിന്റെ ഇളയദളപതി വിജയ് ആണ് എന്റെ പ്രിയതാരം സ്വഭാവം, വ്യക്തിത്വം ,അഭിനയം ഇവയെല്ലാമാണ് വിജയ് എന്ന നടനില്‍ നയന്‍സിനെ ആകര്‍ഷിച്ച ഘടകങ്ങള്‍.
https://www.facebook.com/Malayalivartha
