സിനിമയിലെ നെറികേടുകള്‍ക്കെതിരെ രൂക്ഷമായി പ്രതികരിക്കുന്ന താരമാണ് രാധികാ ആപ്‌തേ. ഏറെ നാളായി തന്നെ ശല്യപ്പെടുത്തുന്ന തെന്നിന്ത്യന്‍ സൂപ്പര്‍താരത്തിനെതിരെ താരം പരസ്യപ്രതികരണം നടത്തിയതും അതുകൊണ്ടാണ്.

ഫോബിയയ്ക്ക് ശേഷം സ്ത്രീ പ്രാധാന്യമുള്ള സിനിമയില്‍ താരം വീണ്ടും അഭിനയിക്കുന്നു. ബഡ്‌മേന്‍ എന്നാണ് ചിത്രത്തിന്റെ പേര്. തമിഴ്‌നാട്ടിലെ ഒരു സ്ത്രീ കുറഞ്ഞ വിലയ്ക്ക് നാപ്കിന്‍ നിര്‍മിച്ച് വിറ്റഴിച്ചു. ചരിത്രവിജയമായ ഈ സംഭവത്തെ ആസ്പദമാക്കിയാണ് തന്റെ പുതിയ സിനിമയെന്ന് രാധിക പറഞ്ഞു.

ലൈംഗികതയെ കുറിച്ചും മനുഷ്യന്റെ സ്വകാര്യ ഭാഗങ്ങളെ കുറിച്ചും തുറന്ന് സംസാരിക്കാന്‍ പലര്‍ക്കും മടിയാണ്. ഇതൊക്കെ യാഥാര്‍ത്ഥ്യമാണെന്ന് അറിഞ്ഞിട്ടും പരമ്പര്യത്തിന്റെ പേര് പറഞ്ഞ് പലരും മുഖം തിരിഞ്ഞ് നില്‍ക്കുന്നു. മനുഷ്യശരീരത്തെ കുറിച്ച് എന്ത് പറഞ്ഞാലും വിവാദമാകും. ആര്‍ത്തവത്തെ കുറിച്ച് ഒരു സ്ത്രീക്ക് പൊതുസമൂഹത്തിന് മുന്നില്‍ ഇപ്പോഴും സംസാരിക്കാനൊക്കില്ല. അങ്ങനെയാണ് ഇവിടുത്തെ അലിഖിത നിയമം. ഇത്തരം അഞ്ജതകള്‍ മാറ്റണം. ഈ അവസ്ഥയില്‍ ഇത്തരത്തിലുള്ള പ്രമേയം സിനിമയാക്കുന്നത് നല്ല കാര്യമാണ്. അതിന്റെ ഭാഗമാകാന്‍ കഴിഞ്ഞതില്‍ സന്തോഷമുണ്ടെന്നും രാധിക പറഞ്ഞു.

സ്ത്രീകള്‍ നാപ്കിന്റെയും കോണ്ടത്തിന്റെയും പരസ്യങ്ങളില്‍ അഭിനയിക്കുന്നത് പോലും എന്തോ വലിയ അപരാധമായാണ് പൊതുസമൂഹം കാണുന്നത്. എന്നാല്‍ ഇവയെല്ലാവരും ഉപയോഗിക്കുന്നുണ്ട് താനും. വര്‍ഷങ്ങള്‍ക്ക് മുന്‍പ് ശ്വേതാമേനോന്‍ മൂഡ്‌സിന്റെ പരസ്യത്തില്‍ അഭിനയിച്ചപ്പോഴുണ്ടായ വിവാദം താന്‍ ഓര്‍മിക്കുന്നെന്നും താരം പറഞ്ഞു. ഏല്ലാ മേഖലകളിലും ജോലി ചെയ്യുന്ന സ്ത്രീകള്‍ക്ക് മോശം അനുഭവങ്ങള്‍ ഉണ്ടാകുന്നുണ്ട്. അതിന് മാറ്റം വരണമെങ്കില്‍ സ്ത്രീകള്‍ തന്നെ മുന്നിട്ടിറങ്ങണമെന്നും രാധിക വ്യക്തമാക്കി.