നയന്‍താര കാമുകന്‍ വിഘ്‌നേഷിന് സൂര്യയുടെ ഡേറ്റ് വാങ്ങിക്കൊടുത്തെന്ന് തമിഴ് സിനിമാ വൃത്തങ്ങള്‍ പറയുന്നു. എന്നാല്‍ അങ്ങനെയല്ലെന്ന് വിഘ്‌നേഷ് ഒരു തമിഴ് പത്രത്തിന് നല്‍കിയ അഭിമുഖത്തില്‍ വ്യക്തമാക്കി. ചിത്രത്തിന്റെ പ്‌ളോട്ട് മനസില്‍ വന്നപ്പോഴേ സൂര്യയുടെ രൂപമാണ് മനസിലുണ്ടായിരുന്നതെന്ന് സംവിധായകന്‍ പറഞ്ഞു. മാത്രമല്ല ഓരോ ചിത്രത്തിനും കഥാപാത്രത്തിനും വ്യത്യസ്തമായ രീതികള്‍ വേണമെന്ന സൂര്യയുടെ വാശിയാണ് അദ്ദേഹത്തെ തന്നെ സമീപിച്ചതിന് പിന്നില്‍. 

ചിത്രത്തില്‍ പ്രതിനായകനായ പഴയകാല ഹീറോ കാര്‍ത്തിക് എത്തുന്നു എന്നത് ഏറെ ശ്രദ്ധേയമാണ്. നായകന് തുല്യമാണ് പ്രതിനായകന്‍. അതുകൊണ്ടാണ് കാര്‍ത്തിക്കിനെ പോലൊരു ആര്‍ട്ടിസ്റ്റിനെ കാസ്റ്റ് ചെയ്തത്. 

സൂര്യയുടെ നായികയായി ഇതുവരെ അഭിനയിക്കാത്ത നടിയായിരിക്കണം നായികയെന്ന് ആദ്യമേ തീരുമാനിച്ചിരുന്നു. എന്നാലത് പുതുമുഖം ആവുകയുമരുത്. അങ്ങനെയാണ് കീര്‍ത്തി സുരേഷിനെ നായികയാക്കാന്‍ തീരുമാനിച്ചത്. മിഡില്‍ ക്ലാസ് ഫാമിലിയിലെ ഒരു പെണ്‍കുട്ടിയുടെ വേഷമാണ് കീര്‍ത്തിക്ക്. സൂര്യയുടെ ഇമേജിന് വേണ്ടി ഒരു വിട്ട് വീഴ്ചയും താന്‍ നടത്തിയിട്ടില്ലെന്ന് സംവിധായകന്‍ വ്യക്തമാക്കി. അതേസമയം അദ്ദേഹത്തിന്റെ ആരാധകര്‍ക്ക് സിനിമ ഏറെ ഇഷ്ടപ്പെടും. സാധാരണ സിനിമളില്‍ പരിചിതമല്ലാത്ത വിഷയമാണ് കൈകാര്യം ചെയ്യുന്നത്. ലൊക്കേഷനും അതുപോലെയായിരിക്കും.

ആദ്യചിത്രമായ നാനും റൗഡി താന്‍ തമിഴ്‌നാടിനൊപ്പം കേരളത്തിലും ഹിറ്റായിരുന്നു. നയന്‍താരയും വിജയ് സേതുപതിയും ജോഡികളായ ചിത്രത്തിന്റെ ലൊക്കേഷനില്‍ വച്ചാണ് വിഘ്‌നേഷും നയന്‍സും അടുക്കുന്നത്. അതിന് ശേഷമുള്ള ചിത്രമാണിത്. താനാ സേര്‍ന്തകൂട്ടം എന്നാണ് പേരിട്ടിരിക്കുന്നത്. ചിത്രത്തിന്റെ ചര്‍ച്ചകളിലോ, ലൊക്കേഷനിലോ നയന്‍താര എത്തിയിട്ടില്ല എന്നതും ശ്രദ്ധേയമാണ്. കീര്‍ത്തിയെ പോലൊരു മയലാളി നായികയെ കാമുകന്‍ കാസ്റ്റ് ചെയ്തതിലും നയന്‍സിന് എതിര്‍പ്പില്ലായിരുന്നു.