വിക്രമിന്റെ സൂപ്പർ ഹിറ്റ് ചിത്രമായിരുന്നു 2003ൽ പുറത്തിറങ്ങിയ സാമി. വിക്രം- തൃഷ ജോഡികൾ തകർത്തഭിനയിച്ച ചിത്രം. സാമിയുടെ രണ്ടാം ഭാഗത്തിലും ഈ താരങ്ങളെയായിരുന്നു നായികാനായകന്മാരായി തെരഞ്ഞെടുത്തത്.

എന്നാൽ സാമിയുടെ രണ്ടാം ഭാഗത്തിൽ നിന്നും തൃഷ പിന്മാറിയിരിക്കുകയാണ്. താൻ സാമിയിൽ അഭിനയിക്കുന്നില്ലെന്ന കാര്യം തൃഷ തന്നെയാണ് ആരാധകരോട് വെളിപ്പെടുത്തിയത്. ഹരിയുടെ സംവിധാനത്തിൽ പിറന്ന സാമി എന്ന സിനിമ വിക്രമിനെ കോളിവുഡിലെ മുൻനിര നായകൻമാരിൽ ഒരാളാക്കുന്നതിൽ നിർണായകമായ പങ്കുവഹിച്ചിട്ടുണ്ട്.

ഇതിന്റെ രണ്ടാം ഭാഗവും ഹരി തന്നെയാണ് ഒരുക്കുന്നത്.സിനിമയുടെ ചിത്രീകരണം ആരംഭിച്ചുകഴിഞ്ഞു. ആദ്യ ഭാഗത്തിലേത് പോലെ നായിക കഥാപാത്രമാണ് തൃഷയ്ക്ക് സംവിധായകൻ നല്കിയത്. എന്നാൽ ആശയപരമായ അഭിപ്രായ ഭിന്നതകൾ കൊണ്ട് താൻ ചിത്രത്തിൽ നിന്നും പിന്മാറുന്നുവെന്നും സാമി 2 ന് എല്ലാവിധ ആശംസകളും നേരുന്നുവെന്നും തൃഷ ട്വിറ്ററിൽ കുറിക്കുകയായിരുന്നു.

തൃഷയുടെ പിൻമാറ്റം അണിയറ പ്രവർത്തകരെ പ്രതിസന്ധിയിലാക്കിയിരിക്കുകയാണ്. ഷിബു തമീൻസ് നിർമിക്കുന്ന സാമി 2-ൽ മലയാളിതാരം കീർത്തി സുരേഷും ഒരു പ്രധാനവേഷം ചെയ്യുന്നുണ്ട്.