ലേഡി സൂപ്പര്‍ സ്റ്റാര്‍ നയൻതാരയുടെ ഏറ്റവും പുതിയ തമിഴ് ചിത്രമാണ് 'അറം'. തമിഴ്‌നാട്ടിൽ വിജയിച്ച് മുന്നേറുന്ന ഈ ചിത്രത്തിന് ഇൻറർനെറ്റിൽ വ്യാജൻ ഇറങ്ങിയിരിക്കുകയാണ്. ചിത്രം റിലീസായി 12 മണിക്കൂറിനുള്ളിൽ 'അറം' ഇന്റർനെറ്റിലും കാണപ്പെട്ടു.

തമിഴിലും മലയാളത്തിലും നിര്‍മ്മിക്കുന്ന പുതിയ സിനിമകളുടെ വ്യാജന്‍ ഇറക്കുന്ന തമിഴ് റോക്കേഴ്‌സാണ് ഈ സിനിമയും ചോർത്തിയത്. ടോറന്റ് സൈറ്റുകളിലൂടെയാണ് സിനിമയുടെ വ്യാജന്‍ പ്രചരിച്ചിരുന്നത്. തിയറ്ററുകളില്‍ നിന്നും പകര്‍ത്തിയ പ്രിന്റ് അല്ല ഇപ്പോള്‍ പുറത്തുവന്നിരിക്കുന്നത്.

ഗോപി നൈനാര്‍ സംവിധാനം ചെയ്യുന്ന നയന്‍സ് കളക്ടറാകുന്ന ‘അറം’ സിനിമ മികച്ച പ്രേക്ഷക പ്രതികരണം നേടി മുന്നേറുകയാണ്. എല്ലായിടത്തുനിന്നും ചിത്രത്തിന് മികച്ച പ്രതികരണമാണ് ലഭിക്കുന്നത്. നയന്‍താര ഇതുവരെ ചെയ്ത സിനിമകളില്‍നിന്നും തികച്ചും വ്യത്യസ്തമായ കഥാപാത്രമാണ് അറമിലേത്. ചിത്രം പലരും ഏറ്റെടുക്കാന്‍ മടിച്ചപ്പോള്‍ നയന്‍താര എന്ന പേരിന്റെ ബലത്തിലാണ് ചിത്രം മുന്നോട്ട് പോയത്.

അറമിന്റെ പ്രൊമോഷനായി ചെന്നൈയിലെത്തിയപ്പോൾ ആരാധകര്‍ തലൈവി എന്നാണ് നയൻസിനെ വിളിച്ചത്. ചെന്നൈയിലെ കാസി തിയേറ്ററില്‍ എത്തിയപ്പോഴായിരുന്നു നയന്‍താരയെ ‘എങ്കള്‍ തലൈവി നയന്‍താര’ എന്ന് വിളിച്ച് ആരാധകര്‍ സ്വീകരിച്ചത്. നീല സാരിയണിഞ്ഞ് ശെരിക്കും ഒരു നേതാവെന്നു തോന്നുംവിധമുളള ലുക്കിലാണ് നയൻസ് എത്തിയത്. താരത്തെ കാണാന്‍ വന്‍ ജനാവലിയായിരുന്നു തിയേറ്ററില്‍.

നയന്‍താര കാറില്‍നിന്നും ഇറങ്ങിയ ഉടന്‍ തന്നെ ആരാധകര്‍ ‘എങ്കള്‍ തലൈവി നയന്‍താര’ എന്നു വിളിക്കാന്‍ തുടങ്ങി. ഇതുകേട്ട നയന്‍സ് പുഞ്ചിരിയോടെ കൈകള്‍ ആരാധകര്‍ക്കുനേരെ ഉയര്‍ത്തിക്കാട്ടി തന്റെ സ്‌നേഹം അറിയിക്കുകയും ചെയ്തു.