2016ലെ ഏറ്റവും വലിയ ഹിറ്റ് ചിത്രങ്ങളില്‍ ഒന്നായിരുന്നു ദിലീഷ് പോത്തന്‍ സംവിധാനം ചെയ്ത് ഫഹദ് ഫാസില്‍ നായകനായ മഹേഷിന്റെ പ്രതികാരം. മഹേഷ് എന്ന കഥാപാത്രത്തെ ഫഹദ് ഫാസില്‍ എന്ന നടന്‍ അനശ്വരമാക്കി. ചിത്രം റിലീസ് ആയി രണ്ട് വര്‍ഷം കഴിഞ്ഞു.

ഇപ്പോഴിതാ, മഹേഷിന്റെ പ്രതികാരം എന്ന ചിത്രത്തിന്റെ തമിഴ് റീമേക്ക് റിലീസിനു തയ്യാറാകുന്നു. തമിഴില്‍ സിനിമ സംവിധാനം ചെയ്തിരിക്കുന്നത് പ്രിയദര്‍ശന്‍ ആണ്. ചിത്രത്തിൽ ഉദയനിധി സ്റ്റാലിന്‍ ആണ് മഹേഷ് ആയി എത്തുന്നത്. ചിത്രത്തിൽ ഉദയ നിധിയുടെ അഭിനയം ഫഹദ് ഫാസിലിനെ അപേക്ഷിച്ച് വളരെ നന്നായിരുന്നു എന്ന് പ്രിയദർശൻ പറഞ്ഞു. ചിത്രത്തിലെ ഒന്നോ രണ്ടോ രംഗങ്ങളില്‍ മാത്രമാണ് സ്റ്റാലിന്‍ അഭിനയിച്ചതായി തോന്നിയത് മറ്റെല്ലാ രംഗങ്ങളില്‍ അദ്ദേഹം അനായാസം പെരുമാറുകയായിരുന്നു. ഉദയനിധിയുടെ മുഖത്തെ നിഷ്‌കളങ്കത സെല്‍വം എന്ന കഥാപാത്രത്തിന് നന്നായി യോജിക്കുന്നുണ്ടെന്നും പ്രിയദര്‍ശന്‍ കൂട്ടിച്ചേര്‍ത്തു.

തമിഴ് സംവിധായകനും, സിനിമയിലെ സ്റ്റാലിന്റെ അച്ഛന്‍ വേഷം കൈകാര്യം ചെയ്യുന്ന ജെ മഹേന്ദ്രനാണ് ഇക്കാര്യം അദ്യം അഭിപ്രായപ്പെട്ടതെന്നും ഓരോ സീനുകള്‍ കഴിയും തോറും അക്കാര്യം തനിക്കും ബോധ്യമാവുകയായിരുന്നുവെന്നും അദ്ദേഹം വ്യക്തമാക്കി. ബിഹൈന്‍ഡ്വുഡ്‌സിന് നല്‍കിയ അഭിമുഖത്തിലാണ് പ്രിയദര്‍ശന്‍ ഇക്കാര്യം വ്യക്തമാക്കിയത്.