ഇമാന്റെ ഭാരം 500 കിലോയില്‍ നിന്ന് 380 ആയി കുറഞ്ഞു. ഈജിപ്തുകാരിയായ ഇമാന്‍ അഹമ്മദ് തടി കുറയ്ക്കാനായി ഫെബ്രുവരി 11ന് പുലര്‍ച്ചെയാണ് മുംബൈയിലെ സെയ്ഫി ഹോസ്പിറ്റലില്‍ എത്തിയത്. പ്രശസ്ത ബാരിയാട്രിക്ക് സര്‍ജന്‍ മുഫസല്‍ ലക്ഡാവാലയുടെ ചികിത്സയിലായിരുന്നു ഇമാന്‍. ചികിത്സക്കത്തെുമ്പോള്‍ 36 കാരിയായ ഇമാന് 500 കിലോ ഭാരമാണ് ഉണ്ടായിരുന്നത്. അത് 380 കിലോ ആയി കുറഞ്ഞു. ഇമാന്റെ ഭാരം ഒരു മാസത്തിനകം 120 കിലോയാണ് കുറഞ്ഞത്. ഹോസ്പിറ്റലിനു പുറകില്‍ ഇമാനു വേണ്ടി പ്രത്യേകമായി പണിത കെട്ടിടത്തിലാണ് ചികിത്സ നടക്കുന്നത്. ലണ്ടനില്‍നിന്ന് പ്രത്യേകമായി വരുത്തിയതാണ് ഇമാന്റെ കിടക്ക.

ഭക്ഷണക്രമീകരണത്തിലൂടെ ശരീരത്തിലെ അമിത ജലാംശം കുറക്കുകയാണ് ഇപ്പോള്‍ ചെയ്യുന്നതെന്ന് ആശുപത്രി വൃത്തങ്ങള്‍ പറഞ്ഞു. 25 വര്‍ഷമായി കിടപ്പിലായ ഇമാന്‍ സ്വയം എഴുന്നേറ്റിരിക്കാന്‍ തുടങ്ങിയിട്ടുണ്ട്.ശസ്ത്രക്രിയയിലേക്ക് കടക്കും മുമ്പ് ഇമാന്റെ അമിത വണ്ണം കുടുംബപാരമ്പര്യത്തിന്റെ ഭാഗമല്ലെന്ന് ഉറപ്പുവരുത്താനുള്ള ശ്രമത്തിലാണ്. നിലവില്‍ കുടുംബത്തില്‍ ആര്‍ക്കും അമിതവണ്ണമില്ല. ഇതു സംബന്ധിച്ച പരിശോധനാ റിപ്പോര്‍ട്ടിനായി കാത്തിരിക്കുകയാണ് മുഫസല്‍ ലക്ഡാവാലയുടെ നേതൃത്വത്തില്‍ 16 വിദഗ്ധര്‍ അടങ്ങിയ ഡോക്ടര്‍മാരുടെ സംഘം. ആറു മാസത്തിനിടെ 200 കിലോ കൂടി കുറക്കാനാണ് പദ്ധതി.