നമ്മുടെ പറമ്പിലും തൊടിയിലും സാധാരണ കണ്ടുവരാറുള്ള മൊട്ടാബ്ലി എന്നറിയപ്പെടുന്ന ഈ കാട്ടുചെടി നമുക്കെല്ലാം പരിചിതമാണ്. കുട്ടിക്കാലത്തെ ഓര്‍മ്മകളില്‍ കുറ്റിക്കാട്ടിലും വഴിയരകിലും വളര്‍ന്നിരുന്ന ഈ കാട്ടുചെടിയിലെ കുഞ്ഞന്‍ പഴങ്ങള്‍ പറിച്ചു തിന്നതിന്റെ ഓര്‍മ്മയും പങ്കിടാനുണ്ടാവും.

കേരളത്തില്‍ നാട്ടിന്‍പുറങ്ങളില്‍ പരക്കെ കണ്ടിരുന്ന ചെടിയാണ് 'ഞൊട്ടങ്ങ'. ഇതിലുണ്ടാകുന്ന ചെറുമുത്തുകള്‍പോലെയുള്ള കായ്കള്‍ക്ക് പുളികലര്‍ന്ന മധുരമാണ്. കുട്ടികള്‍ നന്നായി ഇഷ്ടപ്പെടുന്ന കായ്കളുടെ പുറത്ത് തൊപ്പിപോലെ ഒരു പുറം തൊലിയും കാണാം. കുട്ടികള്‍ കായ്കള്‍ നെറ്റിയില്‍ ഇടിച്ച് ഞൊട്ടപോലെ ശബ്ദം ഉണ്ടാക്കുന്നതിനാല്‍ ഞട്ടങ്ങ, ഞൊട്ടങ്ങ, ഞൊടിയന്‍ തുടങ്ങിയ പേരുകളിലും ഇവ അറിയപ്പെടാറുണ്ട്. ഇപ്പോള്‍ ഈ ചെടി അപൂര്‍വമായിരിക്കുന്നു.

നമ്മുടെ നാട്ടില്‍ വെറുമൊരു കാട്ടുചെടിയായി അവഗണിക്കപ്പെടുന്ന ഈ ഇത്തിരിക്കുഞ്ഞന്‍ പഴത്തിന്റെ വിപണി വിലയും ഗുണവുമറിഞ്ഞാല്‍ ശരിക്കും ആരും ഞെട്ടും. പഴമൊന്നിന് വിപണി വില 17 രൂപയാണ്! വിദേശ വിപണിയില്‍ ഇവയ്ക്ക് വന്‍ പ്രചാരമാണുള്ളത്. യുഎഇയില്‍ ഒരു പാക്കറ്റിന് 9 ദിര്‍ഹമാണ് വില. ഒരു പാക്കറ്റില്‍ 10 പഴങ്ങളാണ് ഉണ്ടാവുക. തീര്‍ന്നില്ല.. ഓണ്‍ലൈനായും പഴം വാങ്ങാനാകും. ഒരു കിലോ പഴത്തിന് 3275 രൂപയാണ് വില.

നമ്മുടെ വീട്ടുപറമ്പില്‍ യാതൊരു പരിചരണവും കൂടാതെ സുലഭമായി വളരുന്ന ഈ കുഞ്ഞന്‍ ചെടിയുടെ വിപണി സാധ്യതകള്‍ കേരളത്തിലെ കര്‍ഷകര്‍ക്ക് മികച്ച രീതിയില്‍ ഉപയോഗപ്പെടുത്താനാകും. കായ പച്ചയായിരിക്കുന്ന സമയത്ത് കൈപ്പ് രസമാണ്. പഴുത്ത് കഴിയുമ്പോള്‍ അല്പം പുളിപ്പോടുകൂടിയുള്ള മധുരമാണ്. അഞ്ചു മി.മീ വ്യാസമുള്ള പൂക്കള്‍ക്ക് വെളുത്ത നിറമാണ്. വേനലാവുന്നതോടെ കായ്കള്‍ പാകമാവുകയും ചെടി പൂര്‍ണ്ണമായും നശിച്ചു പോകുകയും ചെയ്യുന്നു. അടുത്ത മഴ തുടങ്ങുന്നതോടെ വിത്തുകളില്‍ നിന്നും പുതിയ ചെടികള്‍ മുളയ്ക്കുകയാണ് പതിവ്. ജൂലൈ മുതല്‍ ഒക്ടോബര്‍ വരെയാണ് പ്രധാന പൂക്കാലം.

പലനാട്ടില്‍ പല പേരിലാണ് ഈ കാട്ടുചെടിയറിയപ്പെടുന്നത്. മൊട്ടാബ്ലി, ഞൊട്ടാബ്ലി, ഞൊട്ട്ക്ക, മുട്ടാംബ്ലിങ്ങ, ഞൊറിഞ്ചൊട്ട, മുട്ടമ്പുളി തുടങ്ങി നിരവധി പേരുകള്‍ ഇവയ്ക്കുണ്ട്. ഗോള്‍ഡന്‍ ബെറി, ബുഷ് ബെറി എന്നീ പേരുകളില്‍ അറിയപ്പെടുന്ന ഈ ചെടിയുടെ ശാസ്ത്രീയ നാമം ഫൈസിലസ് മിനിമ എന്നാണ്.

വൈറ്റമിന്‍ എ, വൈറ്റമിന്‍ സി എന്നിവയാല്‍ സമ്പന്നമായ പഴത്തില്‍ അയണ്‍, പോളിഫിനോള്‍, കാരോട്ടിനോയിഡ്, കാത്സ്യം, ഫോസ്ഫറസ് എന്നിങ്ങനെ ശരീരത്തിന് ആവശ്യമായ നിരവധി ഘടകങ്ങളുണ്ട്.

ഇത് ശരീരവളര്‍ച്ചയ്ക്കും ബുദ്ധിവികാസത്തിനും മികച്ചതാണ്. കൂടാതെ വൃക്കരോഗങ്ങള്‍ക്കും മൂത്രതടസ്സത്തിനും ഈ പഴം കഴിക്കാറുണ്ട്. മികച്ച ഹെല്‍ത്ത് സപ്ലിമെന്റാണ് ഈ ഇത്തിരിക്കുഞ്ഞന്‍ പഴം.