സൗന്ദര്യ സംരക്ഷണത്തില്‍ താല്‍പര്യമില്ലാത്തവര്‍ ആരും തന്നെയില്ല. എന്നാല്‍ അതിന് വേണ്ടി ആവശ്യമില്ലാതെ പണം ചിലവഴിച്ചാലോ. അതും ഒരു ഭരണാധികാരി. മുപ്പത്തിയൊമ്പതുകാരനായ മക്രോണ്‍ മേക്അപ്പിനു വേണ്ടി മാത്രം മൂന്നുമാസം കൊണ്ടു ചിലവഴിച്ച തുക കേട്ടു ഞെട്ടിയിരിക്കുകയാണ് ലോകം. ഒന്നും രണ്ടുമല്ല പത്തൊമ്പതു ലക്ഷമാണ് സുന്ദരനാകാനായി മക്രോണ്‍ ചിലവാക്കിയത്.

ഫ്രഞ്ച് മാഗസിനായ ലെ പോയിന്റ് ആണ് ഇതുസംബന്ധിച്ച വിവരങ്ങള്‍ പുറത്തു വിട്ടത്. ഓഫീസിനുള്ളില്‍ എത്തി മൂന്നുമാസം കൊണ്ടാണ് സൗന്ദര്യവല്‍ക്കരണത്തിനായി മക്രോണ്‍ ലക്ഷങ്ങള്‍ ചിലവിട്ടിരിക്കുന്നത്. ആറുലക്ഷത്തില്‍പ്പരം രൂപയാണ് ഒരുമാസത്തെ മേക്അപ് ചിലവിലേക്കു നീക്കിവച്ചിരുന്നത്, ഇതെല്ലാം നികുതിദായകരില്‍ നിന്നുള്ള പണമാണെന്നു പ്രത്യേകം പറയേണ്ടല്ലോ.

പുറത്തു വരുന്ന രേഖകള്‍ പ്രകാരം മക്രോണിന്റെ മേക്അപ് സേവനങ്ങള്‍ക്കായി ഒരു ആര്‍ട്ടിസ്റ്റിനെ രണ്ടുതവണയായി നിയോഗിച്ചിരുന്നു. ആദ്യത്തെ തവണ ഏഴു ലക്ഷത്തില്‍പ്പരം രൂപയും രണ്ടാമത്തെ പ്രാവശ്യം പന്ത്രണ്ടു ലക്ഷവുമാണു നല്‍കിയിരുന്നത്. വാര്‍ത്താ സമ്മേളനങ്ങള്‍ക്കും മറ്റു പൊതുപരിപാടികള്‍ക്കും യാത്രകള്‍ക്കുമൊക്കെ പോകുംമുമ്പു സുന്ദരനാകാന്‍ വേണ്ടിയായിരുന്നു ഈ ചിലവഴിച്ചതൊക്കെയും.ലോകത്തു തന്നെ ഇത്ര ഇളം പ്രായത്തില്‍ ശക്തമായൊരു രാജ്യത്തിന്റെ അധിപനായി മക്രോണിനെപ്പോലെ ഒരാള്‍ വരുന്നത് അപൂര്‍വമാണ്.

മുന്‍ബാങ്കറായ മക്രോണ്‍ ഫ്രാന്‍സിലെ പരമ്പരാഗത പാര്‍ട്ടികളെ ഞെട്ടിച്ചാണ് കഴിഞ്ഞ തെരഞ്ഞെടുപ്പില്‍ ഭരണത്തിലേറിയത്. ക്ലീഷേഡ് രാഷ്ട്രീയക്കാരനല്ല മക്രോണ്‍, തന്നേക്കാള്‍ 25 വയസ്സ് പ്രായം കൂടുതലുള്ള അധ്യാപികയെ കല്ല്യാണം കഴിച്ച വ്യത്യസ്തന്‍!. ചുരുങ്ങിയ സമയംകൊണ്ടു സമൂഹമാധ്യമത്തില്‍ പ്രിയങ്കരനായ മക്രോണ്‍ ഇപ്പോള്‍ മേക്അപ് വിവാദത്തിലൂടെയാണ് വീണ്ടും ചര്‍ച്ചയില്‍ ഇടം നേടുന്നത്.