ഇംഗ്ലണ്ടിന്റെ ഗ്രാമ്യ ഭംഗിയില്‍ ലയിച്ച്, പ്രകൃതിയുമായി ഇണങ്ങി ചേര്‍ന്ന്, നക്ഷത്രങ്ങളോട് കിന്നാരം പറഞ്ഞ് ഏതാനും ദിനരാത്രങ്ങള്‍ ചിലവഴിയ്ക്കാന്‍ ആഗ്രഹിക്കുന്നവര്‍ക്ക് ഏറ്റവും അനുയോജ്യമായ ഇടമാണ് സോമര്‍സെറ്റ്  കൗണ്ടിയിലെ ഷെറിറ്റന്‍ ട്രീ ഹൗസ്. ഒരു ഓക്ക് മരത്തണലിലാണ് ഈ ട്രീ ഹൗസ്. 

പുല്‍മേടിന് നടുവിലായി കാണപ്പെടുന്ന ഈ ഓക്ക് മരത്തില്‍ ഒരുക്കിയിരിക്കുന്ന ഈ വീട് അതി മനോഹര കാഴ്ചകളാണ് സമ്മാനിക്കുന്നത്. പുല്‍മേടും തടാകവും അതിലെ വെള്ളം കുടിക്കാനെത്തുന്ന മാന്‍ കുട്ടികളും എല്ലാം അവിടത്തെ താമസക്കാരെ മറ്റൊരു ലോകത്തെത്തിക്കും. രാത്രിയിലെ ആകാശ കാഴ്ചകളും കൂടിയാകുമ്പോള്‍ മുടക്കിയ കാശ് മുതലാകുമെന്ന കാര്യം ഉറപ്പാണ്.

ട്രീ ഹൗസ് എന്ന് പറയുമ്പോള്‍ മരത്തിനു മുകളിലൊരു വീട് എന്നാവും പെട്ടെന്ന് ഓര്‍മയില്‍ വരുന്നത്. എന്നാല്‍ വീടിന്റെ പരമ്പരാഗത ആകൃതിയൊന്നുമേ അല്ല മരത്തിനു മുകളിലെ ഈ വീടിനുള്ളത്. ഈ ആഡംബര വീടിനു ബാരല്‍ ആകൃതിയാണുള്ളത്. എല്ലാ ആധുനിക സൗകര്യങ്ങളും ഉള്ള ഈ ട്രീ ഹൗസില്‍ ഒരു കോപ്പര്‍ ബാത്ത് ടാബും വിറകു കത്തിക്കുന്ന അടുപ്പും അടുക്കളയും വരെ ഉണ്ട്.

ഗ്രാമ്യ ഭംഗിയിലേക്കു മിഴി തുറക്കുന്ന വാതായനങ്ങള്‍ക്കരികെ വലിയ ഒരു ഡബിള്‍ ബെഡ് സജ്ജീകരിച്ചിട്ടുണ്ട്. തടി കൊണ്ട് ഉണ്ടാക്കിയ വീടാണെങ്കിലും നിങ്ങളുടെ പാദങ്ങള്‍ക്ക് ചൂടു നല്‍കാന്‍ തറയ്ക്കടിയിലൂടെ ചൂട് പകരുന്ന സംവിധാനവും ഉണ്ട്. സൂര്യ താപം ഉപയോഗപ്പെടുത്തണമെന്ന് ആഗ്രഹമുള്ളവര്‍ക്കായി രണ്ടു സണ്‍ ഡെക്കുകളും ഒരുക്കിയിട്ടുണ്ട്. ഇവിടെ ഒരു രാത്രി ചെലവഴിക്കുന്നതിന് 270 പൗണ്ടോളമാണ് ഈടാക്കുന്നത്. 24745 ഇന്ത്യന്‍ രൂപയ്ക്ക് തുല്യമാണ് ഈ തുക.

ഷെറിട്ടന്റെ മുഖ്യ ഓഫിസും കെട്ടിടങ്ങളുമെല്ലാം ഈ ട്രീ ഹൗസില്‍ നിന്നും ഏതാനും വാര മാത്രം അകലെയാണ്. അതിനാല്‍ ഇവിടെ ഒറ്റപ്പെട്ടു പോയെന്ന തോന്നലില്ലാതെ സന്ദര്‍ശകര്‍ക്ക് ആനന്ദിക്കാനാവും.

കാനോപ്പി ആന്‍ഡ് സ്റ്റാര്‍സ് (Canopy and Stars) എന്ന ഹോളിഡേ റെന്റല്‍ സൈറ്റിലൂടെയാണ് ഇപ്പോള്‍ ഇതിന്റെ ബുക്കിംഗ് നടക്കുന്നത്.