നവവധു കല്യാണ മണ്ഡപത്തിൽ ബോധം കേട്ട് വീണു. വരന് തലയില്‍ മുടിയില്ലെന്നും വിഗ്ഗാണ് ഉപയോഗിക്കുന്നതെന്നും തിരിച്ചറിഞ്ഞതോടെയാണ് വധു ബോധം കെട്ടുവീണത്. ബോധം വീണുടനെ തന്നെ കല്യാണത്തിൽ നിന്നും പിന്മാറുകയും ചെയ്യുകയായിരുന്നു. ഉത്തര്‍പ്രദേശിലെ ഇറ്റാവയിലാണ് സംഭവം.

ഇറ്റാവ ജില്ലയിലെ ഭര്‍ത്തനയില്‍ ബുധനാഴ്ച രാത്രിയാണ് സംഭവം നടന്നത്. പരസ്പരം മാല ചാര്‍ത്തുന്നതിനിടെയാണ് വരന്‍ തലമുടിയില്‍ അമിതമായി ശ്രദ്ധിക്കുന്നത് വധുവിന്റെ ശ്രദ്ധയില്‍പ്പെടുന്നത്. പരമ്പരാഗത രീതിയിലെ തലപ്പാവ് ഇടയ്ക്കിടെ ശരിയാക്കുന്നതും സംശയം വര്‍ധിപ്പിച്ചു. ഇതിനിടയില്‍ വധുവിന്റെ കൂടെയുള്ളവരാണ് രഹസ്യം കണ്ടെത്തിയത്.

ഇതോടെ വധു വിവാഹവേദിയില്‍ ബോധം കെട്ടുവീഴുകയായിരുന്നു. ബോധം വന്നപ്പോള്‍ തനിക്ക് വിവാഹത്തിന് സമ്മതമല്ലെന്ന് അറിയിക്കുകയും ചെയ്തു. വീട്ടുകാര്‍ എത്ര നിര്‍ബന്ധിച്ചിട്ടും വധു വിവാഹത്തിന് സമ്മതിച്ചില്ല. ഒടുവില്‍ വിവാഹം മുടങ്ങിയ വിഷമത്തില്‍ വരന്‍ അജയ് കുമാര്‍ വീട്ടിലേക്കു മടങ്ങി.