അട്ടപ്പാടിയില്‍ ആദിവാസി യുവാവ് മധു മര്‍ദനമേറ്റ് മരിച്ച സംഭവത്തില്‍ മനുഷ്യാവകാശ കമീഷന്‍ സ്വമേധയാ കേസെടുത്തു. സംഭവത്തിനെതിരെ പ്രതിഷേധം ശക്തമാകുകയാണ്. സംഭവത്തില്‍ പ്രതിഷേധിച്ച്‌ നിരവധിപേർ രംഗത്ത് വന്നു.

ഭക്ഷണം മോഷ്ടിച്ചുവെന്ന് ആരോപിച്ച്‌ വ്യാഴാഴ്ച ഉച്ചയോടെയാണ് നാട്ടുകാര്‍ കടുകുമണ്ണ ഊരിലെ മധുവിനെ പിടികൂടിയത്. മധുവിന് ക്രൂര മര്‍ദ്ദനം ഏറ്റിരുന്നു .പലചരക്ക്സാധനങ്ങള്‍ മോഷ്ടിച്ചെന്നാരോപിച്ച്‌ നാട്ടുകാര്‍ മുക്കാലിയിലെ വനാതിര്‍ത്തിയില്‍ പാറക്കെട്ടിനുള്ളില്‍ കഴിഞ്ഞിരുന്ന മധുവിനെ ഉടുതുണികൊണ്ട്കൈകള്‍ കെട്ടി ചോദ്യം ചെയ്യുകയും മർദിക്കുകയും ചെയ്തിരുന്നു. തുടര്‍ന്ന്, പൊലീസെത്തി കസ്​റ്റഡിയിലെടുത്തു. സ്​റ്റേഷനിലേക്കുള്ള യാത്രമധ്യേ വാഹനത്തില്‍ ഛര്‍ദ്ദിച്ചതിനെത്തുടര്‍ന്ന് അഗളി പ്രാഥമികാരോഗ്യ കേന്ദ്രത്തില്‍ എത്തിച്ചെങ്കിലും മരണം സംഭവിക്കുകയായിരുന്നു.