യാത്രക്കാരിയായ സ്ത്രീയോട് അപമര്യാദയായി പെരുമാറിയ റെയിൽവേ സംരക്ഷണ സേനയിലെ കോൺസ്റ്റബിളിനെ സസ്‌പെൻഡ് ചെയ്തു. കല്യാൺ പൊലീസ് സ്റ്റേഷനിലെ കോൺസ്റ്റബിൾ ജഹാംഗീറിനെയാണ് റെയിൽവേ സ്റ്റേഷനിൽവച്ച് സ്ത്രീയോട് അപമര്യാദയായി പെരുമാറിയതിന് സസ്‌പെന്റ് ചെയ്തത്.ഇയാൾ റെയിൽവേ സ്റ്റേഷനിൽ ട്രെയിൻ കാത്തിരിക്കുകയായിരുന്ന സ്ത്രീയോട് മോശമായി പെരുമാറുന്നതിന്റെ വീഡിയോ സോഷ്യൽ മീഡിയയിൽ വൈറലായിരുന്നു.

ഈ സ്ത്രീയുടെ സമീപത്തിരിക്കുകയായിരുന്ന ജഹാംഗീർ അപമര്യാദയായി അവരുടെ ശരീരത്തിൽ സ്‌പർശിക്കുകയായിരുന്നു. പ്ലാറ്റ്ഫോമിലുണ്ടായിരുന്ന ഏതാനും പേർ ഇത് കാണുകയും ഇയാളെ മർദ്ദിക്കുകയും ചെയ്‌തു.വീഡിയോ കണ്ടതിനുപിന്നാലെ സംഭവത്തിൽ അന്വേഷണം നടത്തുകയും കോൺസ്റ്റബിളിനെ സസ്‌പെൻഡ് ചെയ്യുകയുമായിരുന്നെന്ന് സെൻട്രൽ റെയിൽവേ ഡിവിഷണൽ കമ്മിഷണർ സച്ചിൻ ബലോഡ പറഞ്ഞതായി ദേശിയ മാധ്യമങ്ങൾ റിപ്പോർട്ട് ചെയ്തു.

കോൺസ്റ്റബിളിനെതിരെ ലൈംഗികാതിക്രമത്തിന് കുറ്റം ചുമത്തിയോ എന്നതിന് ഇതുവരെ പരാതി ലഭിച്ചിട്ടില്ലെന്നും എന്നാൽ വീഡിയോയുടെ അടിസ്ഥാനത്തിൽ കർശന നടപടിയെടുക്കുമെന്നും അദ്ദേഹം പറഞ്ഞു.