യാത്രക്കാർ പാസ്പോർട്ടിന് പകരം മുഖം കാണിച്ചാൽ മതി, ഇനി വേഗത്തിൽ എയർപ്പോർട്ടിലെ നടപടിക്രമങ്ങൾ പൂർത്തിയാക്കാം, പുതിയ ഫെയ്‌സ് റെക്കഗ്‌നിഷന്‍ ടെക്‌നോളജി ശെയ്ഖ് സായിദ് വിമാനത്താവളത്തിൽ പ്രവർത്തന സജ്ജമായി...!!!
അത്യാധുനിക സാങ്കേതിക വിദ്യകൾ ഉപയോഗപ്പെടുത്തുകയും പരീക്ഷിക്കുകയും ചെയ്യുന്നതാണ് മറ്റ് ഗൾഫ് രാജ്യങ്ങളിൽ നിന്നും യുഎഇ യെ വ്യത്യസ്തമാക്കുന്നത്. ഇവ ഉപയോഗപ്പെടുത്തുന്നതാകട്ടെ എയർപ്പോർട്ടുപോലുള്ള ഇടങ്ങളിൽ. യാത്രക്കാർക്ക് പ്രയോജകരമായ രീതിയിൽ പുത്തൻ സാങ്കേതിക വിദ്യകൾ ഉപയോഗപ്പെടുത്തി വളരെ വേഗത്തിൽ തന്നെ എയർപ്പോർട്ടിലെ നടപടിക്രമങ്ങൾ പൂർത്തിയാക്കുന്നു. ഇതിന്റെ തുടർച്ചയായി ഇനി പാസ്പോർട്ടിന്റെ ആവശ്യംപോലും ഇല്ലാതെ യാത്രക്കാർക്ക് മുഖം കാണിച്ച് നടപടിക്രമങ്ങൾ പൂർത്തീകരിക്കാനാകും.
ബാഗേജ് ചെക്ക് ഇന്‍ ചെയ്യുന്നത് മുതല്‍ ഇമിഗ്രേഷന്‍ ക്ലിയര്‍ ചെയ്യുന്നതുവരെയും ഡ്യൂട്ടി ഫ്രീ മാര്‍ക്കറ്റില്‍ പോലും ഒരിക്കല്‍ പോലും നിങ്ങളുടെ പാസ്പോര്‍ട്ടോ ബോര്‍ഡിങ് പാസോ എടുക്കേണ്ടതില്ല. പകരം നിങ്ങളുടെ മുഖം കാണിച്ചാല്‍ മതിയാവും. അബുദാബിയിലെ സായിദ് ഇന്റര്‍നാഷണല്‍ എയര്‍പോര്‍ട്ടിലാണ് യാത്രക്കാർക്ക് ഇത്തരത്തിൽ പുതിയ ഫെയ്‌സ് റെക്കഗ്‌നിഷന്‍ ടെക്‌നോളജി അഥവാ മുഖം തിരിച്ചറിയല്‍ സംവിധാനം ഉപയോഗപ്പെടുത്താൻ സാധിക്കുക. വിമാനത്താവളത്തിൽ ഇതിനകം പുതിയ സംവിധാനം നിലവില്‍ വന്നതായി അധികൃതര്‍ അറിയിച്ചു.
ശെയ്ഖ് സായിദ് ഇന്റര്‍നാഷണല്‍ എയര്‍പോര്‍ട്ടിലെ പുതിയ ടെര്‍മിനലുകളും നവീകരിച്ച സാങ്കേതികവിദ്യയുമാണ് സാധാരണ രീതിയിലുള്ള പാസ്‌പോര്‍ട്ട് സ്‌കാന്‍ ചെയ്യുന്ന രീതിക്ക് പകരം ഫേഷ്യല്‍ റെക്കഗിനിഷന്‍ സംവിധാനം സാധ്യമാക്കിയത്. ഇപ്പോള്‍ യാത്രക്കാര്‍ എയര്‍പോര്‍ട്ടിലെ ഇ-ഗേറ്റിനെ സമീപിക്കുമ്പോള്‍ പ്രവേശന കവാടത്തില്‍ ഏതാനും നിമിഷം നിന്നുകൊടുത്താല്‍ മതിയാവും. ആസമയത്ത് നിങ്ങളുടെ മുഖം സ്‌കാന്‍ ചെയ്യും. ഇ-ഗേറ്റ് ടെര്‍മിനലില്‍ എത്തിക്കഴിഞ്ഞാല്‍ ഇമിഗ്രേഷന്‍ വെരിഫിക്കേഷന്‍ പ്രക്രിയയില്‍ എവിടെ നില്‍ക്കണം എവിടെ നോക്കണം തുടങ്ങിയ നിര്‍ദേശങ്ങള്‍ ലഭിക്കും. ഇവിടെ ഏതാനും സെക്കൻഡുകൾ നിന്നുകൊടുത്താല്‍ ചെക്കിന്‍ പ്രക്രിയ പൂര്‍ത്തിയാകും.
യുഎഇ ഫെഡറല്‍ അതോറിറ്റി ഫോര്‍ ഐഡന്റിറ്റി, സിറ്റിസണ്‍ഷിപ്പ്, കസ്റ്റംസ് ആന്‍ഡ് പോര്‍ട്ട് സെക്യൂരിറ്റി പറയുന്നതനുസരിച്ച് ഇ-ഗേറ്റ്സ് പ്രക്രിയയുടെ ഈ കാര്യക്ഷമത ഇമിഗ്രേഷന്‍ പരിശോധന സമയം 30 മുതല്‍ 35 സെക്കന്‍ഡ് വരെയായിരുന്നത് 4 മുതല്‍ 7 സെക്കന്‍ഡ് വരെയായി കുറയ്ക്കാൻ സാധിക്കുമെന്നാണ്.
എയര്‍പോര്‍ട്ടിലെ സെല്‍ഫ് ചെക്ക്-ഇന്‍ കിയോസ്‌ക് സിസ്റ്റം യാത്രക്കാരുടെ മുഖം സ്‌കാന്‍ ചെയ്തുകഴിഞ്ഞാല്‍ അവരുടെ ലഗേജ് പ്ലാറ്റ്ഫോമില്‍ വെക്കാന്‍ അനുവദിക്കുന്നു. തുടര്‍ന്ന് കിയോസ്‌ക് സ്വയമേവ ബാഗേജ് ലേബലുകള്‍ പ്രിന്റ് ചെയ്യും. ഇത് നിങ്ങള്‍ക്ക് ലഗേജില്‍ അറ്റാച്ചുചെയ്യാം. ലഗേജ് നിങ്ങളുടെ ടിക്കറ്റില്‍ അനുവദനീയമായ പരമാവധി ഭാര പരിധി കവിയുന്നുവെങ്കില്‍ യാത്രക്കാർക്ക് കിയോസ്‌കില്‍ അധിക ഫീസ് അടയ്ക്കാനും സംവിധാനമുണ്ട്. വിമാനത്താവളത്തിലെ ഡ്യൂട്ടി ഫ്രീയിലെ പേയ്മെന്റ് കൗണ്ടറില്‍ ഇനി മുതല്‍ ബോര്‍ഡിങ് പാസ് ഹാജരാക്കേണ്ടിയും വരില്ല. ഇവിടെയും മുഖം തിരിച്ചറിയല്‍ സംവിധാനം ഉടന്‍ നിലവില്‍ വരുമെന്നും അധികൃതര്‍ അറിയിച്ചു.
ഇത് കൂടാതെ വിനോദസഞ്ചാര മേഖല പരമാവധി പരിസ്ഥിതി സൗഹൃദമാക്കാൻ സന്ദർശകർക്ക് നിർദേശം നൽകുന്നതിന് നിർമിത ബുദ്ധിയിൽ പ്രവർത്തിക്കുന്ന സഹായിയെ അവതരിപ്പിച്ചിരിക്കുകയാണ് യുഎഇ. ഷാർജ കൊമേഴ്സ് ആൻഡ് ടൂറിസം ഡവലപ്മെന്റ് അതോറിറ്റി, ജൈടെക്‌സ് ഗ്ലോബല്‍ 2024ലാണ് പുതിയ സാങ്കേതിക വിദ്യ അവതരിപ്പിച്ചത്. സസ്റ്റെയിനബിൾ ടൂറിസം എഐ അസിസ്റ്റന്റ് എന്ന് പേരിട്ടിരിക്കുന്ന സംവിധാനം യാത്രക്കാർക്കും വ്യവസായികൾക്കും സ്ഥാപനങ്ങൾക്കും പരിസ്ഥിതി സൗഹൃദ നിർദേശങ്ങൾ നൽകും. 40 ഭാഷകളിൽ ആശയവിനിമയം നടത്താൻ സാധിക്കുന്നതാണ് എഐ അസിസ്റ്റന്റ്. പരിസ്ഥിതിയെ സംരക്ഷിക്കുന്നതിനും ദോഷകരമായ പ്രവൃത്തികളിൽ നിന്നു സഞ്ചാരികളെ വിലക്കുന്നതിനും ആവശ്യമായ മാർഗ നിർദേശങ്ങൾ എഐ അസിസ്റ്റന്റ് നൽകും.
https://www.facebook.com/Malayalivartha
