പുതിയ വമ്പന്‍ മാറ്റങ്ങളുമായി ട്രാഫിക് നിയമം പ്രഖ്യാപിച്ച് യുഎഇ. മുമ്പ് കാറുകളും മറ്റ് വാഹനങ്ങളും ഓടിക്കാന്‍ ഒരാള്‍ക്ക് 18 വയസായിരുന്നു വേണ്ടിയിരുന്ന പ്രായമെങ്കിൽ 17 വയസുള്ളവര്‍ക്ക് ഡ്രൈവിങ് ലൈസന്‍സ് നേടാന്‍ ഇപ്പോള്‍ അനുമതിയായി. ഡ്രൈവിംഗ് ലൈസന്‍സ് നേടാനുള്ള ഏറ്റവും കുറഞ്ഞ പ്രായത്തില്‍ കുറവ് വരുത്തിക്കൊണ്ട് യുഎഇ ഗവണ്‍മെന്റ് ട്രാഫിക് നിയന്ത്രണങ്ങളുമായി ബന്ധപ്പെട്ട പുതിയ ഫെഡറല്‍ ഡിക്രി നിയമം പ്രഖ്യാപിച്ചു. 2025 മാര്‍ച്ച് 29 മുതലാണ് നിയമം പ്രാബല്യത്തില്‍ വരുക. യുഎഇ ഗവണ്‍മെന്റ് മീഡിയ ഓഫീസാണ് വിവരങ്ങള്‍ നല്‍കുന്നത്.

മാത്രമല്ല വലിയ ശബ്ദമുണ്ടാക്കുന്ന വാഹനങ്ങള്‍ ഓടിക്കുന്നതും രാജ്യം നിരോധിച്ചു. കാര്‍ ഹോണുകള്‍ക്കും നിയന്ത്രണമേര്‍പ്പെടുത്തി. വേഗതയുടെ കാര്യത്തിലും മണിക്കൂറില്‍ 80 കിലോമീറ്ററില്‍ കൂടുതലുള്ള വേഗതയും നിരോധിച്ചു. ഇത് കാല്‍ നടയാത്രക്കാര്‍ക്ക് റോഡ് മുറിച്ചുകടക്കുന്നത് ബുദ്ധിമുട്ടുണ്ടാക്കുന്നു. ഇത് പാലിക്കാത്തവര്‍ക്കെതിരേ സിവില്‍, ക്രിമിനല്‍ നടപടികള്‍ സ്വീകരിക്കുമെന്നും അധികൃതര്‍ വ്യക്തമാക്കി.

ലഹരിപാനീയങ്ങളുടെയോ മയക്കുമരുന്നിന്റെയോ സ്വാധീനത്തില്‍ വാഹനമോടിക്കുക, ആളെ ഇടിച്ച ശേഷം വാഹനം നിര്‍ത്താതെ പോകുക, നിരോധനം ഉള്ള സ്ഥലങ്ങളില്‍ നിന്ന് റോഡ് മുറിച്ചുകടക്കുക, വെള്ളപ്പൊക്ക സമയത്ത് താഴ്വരയില്‍ വാഹനമോടിക്കുക എന്നിങ്ങനെ കൂടുതല്‍ ഗൗരവമുള്ള കേസുകളില്‍ വലിയ തുക പിഴ ഈടാക്കാനും പുതിയ നിയമം വ്യവസ്ഥ ചെയ്യുന്നുണ്ട്.