ഹിമാലയ മലനിരകളില് കനത്ത ഹിമപാതം : 37 മരണം
മധ്യ നേപ്പാളിലെ ഹിമാലയ മലനിരകളില് കനത്ത ഹിമപാതം. ഇതേത്തുടര്ന്ന് 26 പര്വതാരോഹകരും പതിനൊന്നു ഗ്രാമീണരും മരിച്ചു. മരിച്ച പര്വതാരോഹകരില് ഒരാള് ഇന്ത്യാക്കാരനാണെന്നു സ്ഥിരീകരിച്ചു.
നിരവധിപേര് മഞ്ഞുമൂടിയ മലനിരകളില് കുടുങ്ങിക്കിടക്കുന്നതായി സംശയിക്കുന്നു. ബുധനാഴ്ച വൈകുന്നേരമായിരുന്നു അപകടം. പരിക്കേറ്റവരെ തൊട്ടടുത്ത ആശുപത്രികളില് പ്രവേശിപ്പിച്ചു.
മരിച്ചവരില് സ്ലോവാക്യ, കാനഡ, പോളണ്ട്, ഫ്രാന്സ്, ഇസ്രായേല്, ഇന്ത്യ എന്നീ രാജ്യങ്ങളില്നിന്നുള്ള പര്വതാരോഹകരായിരുന്നു. ട്രെക്കിംഗിനുശേഷം പര്വതാരോഹകര് മലയിറങ്ങി വരുമ്പോഴായിരുന്നു അപകടം. കനത്ത മഴയെത്തുടര്ന്ന് ബുധി ഗാന്ഡകി നദിയില് കാല് വഴുതിവീണാണ് ഒരു ഫ്രഞ്ച് പൗരന് മരിച്ചത്. നേപ്പാളിന്റെ തലസ്ഥാനമായ കാഠ്മണ്ഡുവില്നിന്ന് 150 കിലോമീറ്റര് അകലെയുള്ള മുസ്താംഗിലുണ്ടായ കനത്ത ഹിമപാതത്തില് എട്ടു നേപ്പാള് സ്വദേശികള് മരിച്ചു. തൊട്ടടുത്ത മനാംഗ് ജില്ലയിലുണ്ടായ കനത്ത മഞ്ഞുവീഴ്ചയിലാണ് നാലു കാനഡക്കാരും ഒരു ഇന്ത്യാക്കാരനും മരിച്ചത്.
ലോകത്തിലെ ഏറ്റവും ഉയരം കൂടിയ പര്വതങ്ങളില് പത്താം സ്ഥാനത്തുള്ള അന്നപൂര്ണ പര്വതത്തിനടുത്തുള്ള പ്രസിദ്ധമായ പര്വതാരോഹക പാതയായ തൊറാങ് ലാ മേഖലയില് കനത്ത ഹിമപാതത്തെത്തുടര്ന്ന് രണ്ടു പോളണ്ടുകാരും രണ്ടു ഇസ്രയേലി പൗരന്മാരും എട്ടു നേപ്പാള് സ്വദേശികളും മരിച്ചു. മരിച്ചവരുടെ മൃതദേഹങ്ങള് സൈന്യവും രക്ഷാപ്രവര്ത്തകരും കണ്ടെടുക്കുകയാണ്. മേഖലയില് രക്ഷാപ്രവര്ത്തനം തുടരുകയാണ്. വിദേശിയരായ നിരവധി പര്വതാരോഹകരെ കാണാതായിട്ടുണ്ട്.
മരണസംഖ്യ ഇനിയും ഉയരാന് സാധ്യതയുണ്ടെന്നും മോശം കാലാവസ്ഥയായതിനാല് കാണാതായവരുമായി ബന്ധപ്പെടാനാകുന്നില്ലെന്നും അധികൃതര് അറിയിച്ചു. ഇന്ത്യയില് വീശിയടിച്ച ഹുദ്ഹുദ് ചുഴലിക്കാറ്റിനെത്തുടര്ന്ന് നേപ്പാളില് രണ്ടു ദിവസമായി കനത്ത മഴയായിരുന്നു. ഉയര്ന്ന പ്രദേശങ്ങളില് ഹിമപാതവും ശക്തമായിരുന്നു. ബുധനാഴ്ച ആഞ്ഞടിച്ച മഞ്ഞ് കാറ്റിനെ തുടര്ന്ന് കാണാതായ 85 പേരെക്കുറിച്ചും ഇതു വരെ വിവരമൊന്നും ലഭ്യമായിട്ടില്ല.
ട്രക്കിംഗിനും പര്വതാരോഹണത്തിനും നേപ്പാളില് ഈ വര്ഷം അനുകൂല കാലാവസ്ഥയായിരുന്നു. വഴികാട്ടികളായി പ്രവര്ത്തിച്ചിരുന്ന 16 ഷേര്പകള് കഴിഞ്ഞ ഏപ്രിലില് കനത്ത ഹിമപാതത്തെത്തുടര്ന്ന് മരിച്ചിരുന്നു. ഇതേത്തുടര്ന്ന് ലോകത്തിലെ ഏറ്റവും ഉയരം കൂടിയ പര്വതത്തിലേക്കുള്ള സന്ദര്ശനത്തിന് സര്ക്കാര് നിയന്ത്രണം ഏര്പ്പെടുത്തിയിരുന്നു. ടൂറിസ്റ്റ് സീസണായ ഒക്ടോബറില് ആയിരക്കണക്കിനു വിദേശ ടൂറിസ്റ്റുകളാണ് മഞ്ഞു മൂടിക്കിടക്കുന്ന പര്വതങ്ങള് കയറാന് എത്തുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha