ബോക്സിംഗ് ഇതിഹാസം മുഹമ്മദ് അലി ഗുരുതരാവസ്ഥയില്
ബോക്സിംഗ് റിംഗിലെ ഇതിഹാസം മുഹമ്മദ് അലി ഗുരുതരാവസ്ഥയില് ആഷുപത്രിയിലാണെന്ന് ഡോക്ടര്മാര് അറിയിച്ചു. ഏറെക്കാലമായി പാര്ക്കിന്സണ് രോഗബാധിതനായ അദ്ദേഹത്തിന്റെ ആരോഗ്യനില ദിനംപ്രതി വഷളായിക്കൊണ്ടിരിക്കുകയാണെന്നാണ് റിപ്പോര്ട്ടുകള്.എല്ലാദിവസവും രാവിലെ അദ്ദേഹവുമായി സംസാരിക്കാറുണ്ടെന്നും ഏറെ തമാശകള് പറയാറുണ്ടെന്നും അലിയുടെ മകള് ഹന പറഞ്ഞു.
അലിയുടെ ജീവിതത്തെ ആസ്പദമാക്കി നിര്മ്മിച്ച ഹോളിവുഡ് സിനിമയായ അയാം അലിയുടെ പ്രിവ്യൂ ഷോയ്ക്ക് അദ്ദേഹം എത്താതിരുന്നതിനെ തുടര്ന്നാണ് അലിയുടെ ആരോഗ്യസ്ഥിതിയെക്കുറിച്ചുള്ള ചര്ച്ചകള് സജീവമായത്.
ഇടിക്കൂട്ടില് ദ ഗ്രേറ്റ്സ്റ്റ് എന്ന അപരനാമത്തില് അറിയപ്പെടുന്ന മുഹമ്മദ് അലിയുടെ യഥാര്ത്ഥ പേര് കാഷ്യസ് ക്ളേ എന്നാണ്. 1942 ജനുവരി 7ന് അമേരിക്കയിലെ കെന്റക്കിയില് ജനിച്ച അദ്ദേഹം 1964 ല് ഇസ്ലാം മതം സ്വീകരിച്ചതിനെ തുടര്ന്നാണ് മുഹമ്മദ് അലി എന്ന പേര് സ്വീകരിച്ചത്. മൂന്നുതവണ ലോക ഹെവി വെയ്റ്റ് ചാമ്പ്യനായിട്ടുള്ള അലി ആദ്യമായി ഹെവിവെയ്റ്റ് ചാമ്പ്യനാകുമ്പോള് 22 വയസ് മാത്രമായിരുന്നു പ്രായം. 1960 ലെ റോം ഒളിമ്പിക്സിലും അലി മിന്നും താരമായി സ്വര്ണം നേടി. കഴിഞ്ഞ നൂറുവര്ഷത്തിനിടെ ലോകം കണ്ട ഏറ്റവും മികച്ച 100 കായിക താരങ്ങളില് ഒരാളായി വാഴ്ത്തപ്പെടുന്ന അലിയെതേടി സ്പോര്ട്സ് ഇല്ല്യസ്ട്രേറ്റ്സിന്റെ സ്പോര്ട്സ് മാന് ഒഫ് ദ സെഞ്ച്വറി അവാര്ഡും ബി.ബി.സിയുടെ സ്പോര്ട്സ് പേഴ്സണാലിറ്റി ഒഫ് സെഞ്ച്വറി പുരസ്കാരവും എത്തിയിട്ടുണ്ട്.അതേസമയം അലിയുടെ ആരോഗ്യസ്ഥിതിയെക്കുറിച്ച് തികഞ്ഞ ശുഭാപ്തി വിശ്വാസത്തിലാണ് കുടുംബാംഗങ്ങളും ആരാധകരും.
https://www.facebook.com/Malayalivartha