സഭയുടെ വിശ്വാസത്തെ തിരുത്തി ഫ്രാന്സിസ് പാപ്പയുടെ നിലപാട് : മഹാവിസ്ഫോടന സിദ്ധാന്തം ശരിയാണ്
പ്രപഞ്ചോല്പ്പത്തിയെ കുറിച്ചുള്ള മഹാവിസ്ഫോടന സിദ്ധാന്തവും പരിണാമവും സത്യമാണെന്ന ഫ്രാന്സിസ് മാര്പ്പാപ്പയുടെ നിലപാട് ചര്ച്ചയാകുന്നു. കത്തോലിക്ക സഭയിലെ പരമ്പരാഗത വിശ്വാസങ്ങളെ തള്ളുന്നതാണ് മാര്പ്പാപ്പയുടെ നിലപാട്. സഭയില് പുതിയ വിവാദത്തിന് ഇത് വഴിതെളിച്ചേക്കും.
പ്രപഞ്ചോല്പ്പത്തിയേയും ജീവോല്പ്പത്തിയേയും കുറിച്ച് കാലാകാലങ്ങളായുള്ള കത്തോലിക്ക സഭയുടെ വിശ്വാസങ്ങളെ തിരുത്തിക്കുറിക്കുന്നതാണ് മാര്പ്പാപ്പയുടെ നിലപാട്. ബൈബിളിലെ ഉല്പ്പത്തി പുസ്തകത്തിലെ വ്യാഖ്യാനങ്ങളെ മാര്പാപ്പ തള്ളിക്കളയുന്നു. പ്രപഞ്ചത്തിന്റെ തുടക്കത്തെ കുറിച്ചുള്ള ആധുനിക ശാസ്ത്ര സിദ്ധാന്തമായ മഹാവിസ്ഫോടനവും ജീവോല്പത്തി വിശദീകരിക്കുന്ന പരിണാമ വാദവും ശരിയാണെന്ന് അദ്ദേഹം അഭിപ്രായപ്പെടുന്നു.
ബെനഡിക്ട് പതിനാറാമന് മാര്പാപ്പയുടെ വെങ്കലപ്രതിമ വത്തിക്കാനില് അനാച്ഛാദനംചെയ്ത് സംസാരിക്കവെയാണ് മഹാസ്ഫോടന സിദ്ധാന്തം വിശ്വാസത്തിന് എതിരല്ലെന്ന് മാര്പാപ്പ പറഞ്ഞത്. ഈ സിദ്ധാന്തം പ്രപഞ്ചോത്പത്തിയെക്കുറിച്ച് വിശദീകരിക്കുന്ന മാതൃക മാത്രമാണ്. ഏകസ്രഷ്ടാവ് എന്ന സങ്കല്പത്തെ മഹാവിസ്ഫോടന സിദ്ധാന്തം തള്ളുന്നില്ല. അതുകൊണ്ടുതന്നെ സഭയുടെ നിലപാടും ഈ സിദ്ധാന്തവും തമ്മില് വൈരുധ്യമില്ല.
1951ല് പയസ് പന്ത്രണ്ടാമന് മാര്പാപ്പയും 1996ല് ജോണ്പോള് രണ്ടാമന് മാര്പാപ്പയും മഹാവിസ്ഫോടന സിദ്ധാന്തത്തിന് അനുകൂലമായ നിലപാട് സ്വീകരിച്ചിരുന്നു. ഈ സിദ്ധാന്തം ഫലപ്രദമായി തെളിയിക്കപ്പെട്ട വസ്തുതയാണെന്നും ഇവര് അഭിപ്രായപ്പെടുകയുണ്ടായി. എന്നാല്, ഈയടുത്ത് ബനഡിക്ട് പതിനാറാമന് മാര്പാപ്പയും അദ്ദേഹത്തോട് അടുപ്പമുള്ളവരും ഈ നിലപാടുകളോട് വിയോജിക്കുകയായിരുന്നു.
ദൈവം മാന്ത്രികനാണെന്നും മാന്ത്രിക വടികൊണ്ട് ജീവജാലങ്ങളെ സൃഷ്ടിച്ചെന്നതരത്തിലുമുള്ള ഉത്പത്തിയുടെ പുസ്തകത്തിലെ വ്യാഖ്യാനം ശരിയല്ലെന്നും ഫ്രാന്സിസ് മാര്പാപ്പ പറഞ്ഞു. പ്രപഞ്ചം ഈ രീതിയിലായത് ആറോ ഏഴോ ദിവസം കൊണ്ടല്ല. കോടാനുകോടി വര്ഷത്തെ പരിണാമപ്രക്രിയയിലൂടെയാണ്. ജീവജാലങ്ങളെ ദൈവമാണ് സൃഷ്ടിച്ചതെങ്കിലും അവ സാഹചര്യങ്ങള്ക്കനുസരിച്ച് സ്വയം വളരുകയായിരുന്നെന്നും ഫ്രാന്സിസ് പാപ്പ പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha