ഇന്ത്യ സന്ദര്ശിക്കുമ്പോള് കാശ്മീര് വിഷയം ഉന്നയിക്കണമെന്ന് ഒബാമയോട് പാകിസ്ഥാന് പ്രധാനമന്ത്രി
ജനുവരിയില് ഇന്ത്യ സന്ദര്ശിക്കുമ്പോള് കാശ്മീര് വിഷയം ഉന്നയിക്കണമെന്ന് പാകിസ്ഥാന് പ്രധാനമന്ത്രി നവാസ് ഷെരീഫ് അമേരിക്കയുടെ പ്രസിഡന്റ് ബറാക് ഒബാമയോട് ആവശ്യപ്പെട്ടു. വെള്ളിയാഴ്ച ഒബാമയെ ഫോണില് വിളിച്ചാണ് ഷെരീഫ് ഇക്കാര്യം ആവശ്യപ്പെട്ടത്. ജനുവരി 26ന് ഇന്ത്യയുടെ റിപ്പബ്ളിക് ദിനാഘോഷങ്ങളില് മുഖ്യാതിഥിയാവുന്നത് ബറാക് ഒബാമയാണ്.
ഏഷ്യന് മേഖലയിലെ സമാധാനത്തിനും സ്ഥിരതയ്ക്കും സാമ്പത്തിക സഹകരണത്തിനുമായി കാശ്മീര് സംബന്ധിച്ച് എത്രയും വേഗം പ്രമേയം കൊണ്ടുവരണമെന്നും ഷെരീഫ് ആവശ്യപ്പെട്ടു. ഇതോടൊപ്പം ഒബാമയുടെ പാകിസ്ഥാന് സന്ദര്ശനം എത്രയും വേഗം ഉണ്ടാവണമെന്നും പാകിസ്ഥാന് ആവശ്യപ്പെട്ടു. പാകിസ്ഥാനിലെ സ്ഥിതികള് സാധാരണ നിലയിലാവുമ്പോള് താമസമില്ലാതെ തന്നെ പാകിസ്ഥാന് സന്ദര്ശിക്കുമെന്ന് ഒബാമ ഉറപ്പു നല്കിയതായും പ്രധാനമന്ത്രിയുടെ ഓഫീസ് അറിയിച്ചു. ഇന്ത്യയുമായി ഉഭയകക്ഷി ചര്ച്ച നടത്താന് പാകിസ്ഥാന് സന്നദ്ധമാണെന്നും ഇന്ത്യയാണ് ഇക്കാര്യത്തില് മുന്കൈ എടുക്കേണ്ടതെന്നും ഷെരീഫ് പറഞ്ഞു.
ഇന്ത്യന് പ്രധാനമന്ത്രി നരേന്ദ്ര മോദിയുടെ സത്യപ്രതിജ്ഞാ ചടങ്ങില് താന് പങ്കെടുത്തതും ഫോണ് സംഭാഷണത്തില് ഷരീഫ് ചൂണ്ടിക്കാട്ടി. ഇന്ത്യയുമായുള്ള പ്രശ്നങ്ങള് പരിഹിക്കാനുള്ള ആഗ്രഹം മൂലമാണ് താന് ചടങ്ങില് പങ്കെടുത്തതെന്ന് ചൂണ്ടിക്കാട്ടിയ ഷെരീഫ് നിര്ഭാഗ്യകരമായ രീതിയിലാണ് ഇന്ത്യ പിന്നീട് പ്രതികരിച്ചതെന്നും ആരോപിച്ചു.
സെക്രട്ടറി തലത്തില് നടത്തി വന്ന ചര്ച്ചകള് റദ്ദാക്കിയ ഇന്ത്യ അതിര്ത്തിയില് വെടിവയ്പ് നടത്തി സാധാര പൗരന്മാരെ കൊന്നൊടുക്കിയെന്നും ഷരീഫ് ആരോപിച്ചു. ഇത് പാക്കിസ്ഥാനുമായുള്ള ബന്ധം സാധാരണ ഗതിയിലാക്കുന്നതിന് ഇന്ത്യയ്ക്ക് താല്പര്യമില്ലാത്തതുകൊണ്ടാണെന്നും അദ്ദേഹം പറഞ്ഞു.
ഉഭയകക്ഷി ചര്ച്ചകള്ക്ക് തന്റെ രാജ്യം എന്നും സന്നദ്ധമാണെന്നു പറഞ്ഞ പാക്ക് പ്രധാനമന്ത്രി ഇന്ത്യയും ഇത്തരത്തിലുള്ള ഒരു സാഹചര്യം സൃഷ്ടിക്കണമെന്നും ആവശ്യപ്പെട്ടു. ടെലിഫോണ് സംഭാഷണത്തില് പാക്കിസ്ഥാന് ഉയര്ത്തിയ നിലപാട് ഒബാമ മനസിലാക്കിയിട്ടുണ്ടെന്ന് പത്രക്കുറിപ്പ് പറയുന്നു. ടെലിഫോണ് സംഭാഷണത്തിന്റെ കാര്യം വൈറ്റ് ഹൗസ് സ്ഥിരീകരിച്ചിട്ടുണ്ട്.
https://www.facebook.com/Malayalivartha