പാകിസ്ഥാനില് ഐഎസ് ഭീകരര് വേരുറപ്പിക്കുന്നതായി റിപ്പോര്ട്ട്
പാക്കിസ്ഥാനില് ഇസ്ലാമിക് സ്റ്റേറ്റ് (ഐഎസ്) ഭീകരരുടെ സ്വാധീനം വര്ദ്ധിക്കുന്നതായി റിപ്പോര്ട്ട്. നഗരങ്ങളിലെ ചേരികള് മുതല് താലിബാന് ശക്തി കേന്ദ്രങ്ങളില് വരെ ഐഎസിന്റെ ലോഗോയും പേരുമെല്ലാം പോസ്റ്ററുകളായും ഭിത്തികളിലെ എഴുത്തായും ലഘുലേഖകളായുമെല്ലാം പ്രത്യക്ഷപ്പെടുന്നതാണ് ഐഎസിന്റെ സ്വാധീനം വര്ധിക്കുന്നതായുള്ള സംശയത്തിന് പിന്നില്. ഐസ് ഭീകരുടെ പോസ്റ്ററുകളെ കുറിച്ച് ഇന്ത്യ ആശങ്ക പ്രകടിപ്പിച്ചു. പാക്കിസ്ഥാനിലെ ചില തീവ്രവാദ സംഘടനകള് ഇസ്ലാമിക് സ്റ്റേറ്റ് നേതാവ് അബു ബകര് അല് ബാഗ്ദാദിയോടുള്ള തങ്ങളുടെ വിധേയത്വം പരസ്യമായി പ്രഖ്യാപിച്ചിരുന്നു.
ഐഎസ് ഇനിയും പാക്കിസ്ഥാനില് പ്രവര്ത്തനമാരംഭിച്ചിട്ടില്ലെങ്കിലും പാക്കിസ്ഥാനിലെ തീവ്രവാദ ഗ്രൂപ്പുകളെ ഇവര് ആകര്ഷിക്കുന്ന രീതി ആശങ്കപ്പെടുത്തുന്നതാണെന്ന് സമാധാന പഠനങ്ങള്ക്കുള്ള പാക്ക് ഇന്സ്റ്റിറ്റിയൂട്ടിന്റെ ഡയറക്ടര് മുഹമ്മദ് അമീര് റാണ പറയുന്നു.
ഇറാഖിലും സിറിയയിലും ചോരപ്പുഴയൊഴുക്കുന്ന ഇസ്ലാമിക് സ്റ്റേറ്റ് പാക്കിസ്ഥാനിലെ ഭീകരവാദികളെയും ആകര്ഷിക്കുന്നത് ആശങ്കയോടെയാണ് ലോകം കാണുന്നത്. സാമ്പത്തിക സഹായവും പുതിയ ആളുകളെ സംഘടനകളിലേക്ക് റിക്രൂട്ട് ചെയ്യാനുള്ള സഹായവും ഇസ്ലാമിക് സ്റ്റേറ്റിലൂടെ തങ്ങള്ക്കു ലഭിക്കുമെന്ന കണക്കു കൂട്ടലിലാണ് ഭീകര സംഘടനകള് ഐഎസുമായി അടുക്കുന്നത്.
ഇസ്ലാമിക് സ്റ്റേറ്റില് നിന്നുള്ള ഭീഷണി നേരിടുന്നതില് പാക്കിസ്ഥാന് ആവശ്യമായ നടപടികള് എടുത്തില്ലെങ്കില് അല് ഖായ്ദ വരുത്തിയതില് കൂടുതല് അപകടം അതു സൃഷ്ടിക്കുമെന്ന് പ്രമുഖ ഇംഗ്ലീഷ് ദിനപത്രം അടുത്തിടെ പാക്കിസ്ഥാന് മുന്നറിയിപ്പ് നല്കിയിരുന്നു.
https://www.facebook.com/Malayalivartha