കാശ്മീര്‍ ഇന്ത്യയില്‍ നിന്ന് മോചിപ്പിക്കുമെന്ന് ഹഫീസ് സെയ്ദ്
കാശ്മീര്‍ പ്രശ്‌നം ഉടന്‍ പരിഹരിച്ചില്ലെങ്കില്‍ ഇന്ത്യയ്‌ക്കെതിരെ വിശുദ്ധ യുദ്ധം തുടരുമെന്ന് ഇന്ത്യന്‍ പ്രധാനമന്ത്രി നരേന്ദ്ര മോദിയോട് പാകിസ്ഥാനിലെ ജമാത് ഉദ് ദാവാ തലവന്‍ ഹാഫീസ് സയിദ്. ലാഹോറില്‍ സംഘടനയുടെ രണ്ടു ദിവസത്തെ സമ്മേളനത്തിന്റെ സമാപന ചടങ്ങില്‍ സംസാരിക്കവെയാണ്
ഹഫീസ് സയിദ് മുന്നറിയിപ്പ് നല്‍കിയത്. മുംബയ് ഭീകരാക്രമണ കേസിലെ മുഖ്യ സൂത്രധാരന്‍ കൂടിയാണ് ഹഫീസ്.
ഇന്ത്യയില്‍ നിന്ന് കാശ്മീരികള്‍ക്ക് മോചനം നേടിക്കൊടുക്കുന്നതിന് പാകിസ്ഥാനികള്‍ മുന്നിട്ടിറങ്ങണമെന്നും ഹഫീസ് സയിദ് പ്രവര്‍ത്തകരോട് ആഹ്വാനം ചെയ്തു. പാകിസ്ഥാന്‍ ഭരണകൂടത്തിന്റെ മൗനാനുവാദത്തോടെയാണ് ഭീകരസംഘടനയുടെ സമ്മേളനം ലാഹോറില്‍ നടന്നത്. സമ്മേളനത്തില്‍ പ്രവര്‍ത്തകര്‍ക്ക് ലാഹോറിലേക്ക് എത്തിച്ചേരുന്നതിന് പാക് സര്‍ക്കാര്‍ ട്രെയിന്‍ അനുവദിച്ചിരുന്നു.
അഫ്ഗാനിസ്ഥാനില്‍ യു.എസ് സേനയെ സഹായിക്കുന്നതിന് ഇന്ത്യയ്ക്ക് സൈന്യത്തെ അയക്കാമെങ്കില്‍ കാശ്മീരിലേക്ക് സഹോദരങ്ങളെ സഹായിക്കാന്‍ മുജാഹിദ്ദീനുകള്‍ക്കും പോകാം. കാശ്മീരികള്‍ സഹായത്തിനു വേണ്ടി നിലവിളിക്കുകയാണ്. അവരുടെ വിളി കേള്‍ക്കേണ്ടത് നമ്മുടെ ചുമതലയാണ് സയീദ് പറഞ്ഞു.
കാശ്മീര്‍ പ്രശ്‌നം പരിഹരിക്കണമെന്ന് പ്രധാനമന്ത്രി നവാസ് ഷെരീഫ് ഇന്ത്യയോട് ശക്തമായി ആവശ്യപ്പെടണം. അല്ലാത്തപക്ഷം സ്വാതന്ത്രം നേടുന്നതിനായി കാശ്മീരികള്‍ക്ക് പൂര്‍ണ്ണ പിന്തുണ നല്‍കേണ്ടത് ഷെരീഫ് സര്‍ക്കാരിന്റെ കടപ്പാടാണെന്നും സയീദ് കൂട്ടിച്ചേര്‍ത്തു. ആയിരക്കണക്കിന് പ്രവര്‍ത്തകര്‍ പങ്കെടുത്ത സമ്മേളനത്തില്‍ ഇന്ത്യയെ ഉടനീളം വിമര്‍ശിച്ചുകൊണ്ടായിരുന്നു സയിദിന്രെ പ്രസംഗം.അമേരിക്ക ഭീകര സംഘടനയുടെ പട്ടികയില്‍പ്പെടുത്തിയിരിക്കുന്ന ജമാത് ഉദ് ദാവയുടെ സമ്മേളത്തിന് പാക് സര്‍ക്കാര്‍ പൂര്‍ണ്ണ സംരക്ഷണം നല്‍കിയിരുന്നു.
https://www.facebook.com/Malayalivartha
