അമേരിക്കയിലെ ബോയ്ന്‍ടോണ്‍ പോലീസ് ഡിപ്പാര്‍ട്ട്‌മെന്റിലേക്ക് ഒരു 911 ഫോണ്‍വിളി വന്നു. അടിയന്തിര സാഹചര്യങ്ങളുണ്ടാകുമ്പോള്‍ പോലീസിന്റെ സഹായം തേടാന്‍ അമേരിക്കയിലുള്ള സംവിധാനമാണിത്. വാസ്തവത്തില്‍ അതൊരു ഫോണ്‍കോള്‍ എന്നുപറയാനാവില്ല. ഒരു മിസ്ഡ് കോള്‍ ആയിരുന്നു എന്നുവേണമെങ്കില്‍ പറയാം.

എന്നാലും 911 സെക്ഷനിലേയ്ക്ക് കോള്‍ വന്നിട്ട് കട്ട് ആയാലും ഏതു നമ്പരില്‍ നിന്നാണോ വിളിച്ചത് അവിടേയ്ക്ക് പോലീസ് തിരിച്ചുവിളിച്ച് വിവരം തിരക്കുന്ന പതിവുണ്ട്. തിരിച്ചു വിളിക്കുമ്പോള്‍ ഫോണ്‍ എടുക്കാതിരിക്കുകയാണെങ്കില്‍ സംശയിക്കത്തക്കതായ എന്തോ ഉണ്ടെന്നു കരുതി ഉടന്‍ അവര്‍ സ്ഥലത്തെത്തുകയും ചെയ്യും. അതുകൊണ്ട് ബോയ്ടണ്‍ പോലീസ് ഡിപ്പാര്‍ട്ട്‌മെന്റിലെത്തിയ മിസ്ഡ് കോള്‍ പിന്തുടര്‍ന്ന് രണ്ടു പോലീസുകാര്‍ സ്റ്റെഫനി സ്ലേറ്ററുടെ വീട്ടിലെത്തി.

അവിടെ സംഘര്‍ഷമോ അപകടമോ ഒന്നുമുണ്ടായിരുന്നില്ല. സ്റ്റെഫനിയുടെ മകള്‍ ടെലിഫോണില്‍ കളിക്കുന്നതിനിടെ 911 - ലേക്ക് അബദ്ധത്തില്‍ ഒരു കോള്‍ പോയതാണ്. ഏതായാലും അവിടെയെത്തി വിവരങ്ങള്‍ തിരക്കുന്നതിനിടെ ഭര്‍ത്താവില്ലാതെ കുഞ്ഞുങ്ങളെ വളര്‍ത്തിക്കൊണ്ടിരിക്കുകയാണ് സ്റ്റെഫനി എന്നു മനസ്സിലായി. പോലീസ് അങ്കിള്‍മാരോട് കുട്ടികളും പരാതി പറഞ്ഞു. കാശൊക്കെ കുറവായതിനാല്‍ അവര്‍ക്ക് ഒരു ക്രിസ്മസ് ട്രീ വാങ്ങുവാന്‍ പോലും പറ്റില്ലെന്ന് അമ്മ പറഞ്ഞത്രേ. ആ കുഞ്ഞുബാലികയുടെ പരാതി കേട്ടപ്പോള്‍ അവരുടെ മനസ്സലിഞ്ഞു.

അടുത്ത ദിവസം തന്നെ ഒരു ക്രിസ്മസ് ട്രീയും അതിനുള്ള സ്റ്റാന്‍ഡും, അതിലിടാന്‍ ലൈറ്റുകളും മറ്റലങ്കാരങ്ങളുമെല്ലാം വാങ്ങി അവര്‍ വീട്ടിലെത്തിച്ചു. നിനച്ചിരിക്കാതെ ആഗ്രഹിച്ച ക്രിസ്മസ് സമ്മാനം കിട്ടിയ കുട്ടിയുടെ പ്രതികരണം കണ്ട് തങ്ങളുടെ മനസ്സ് നിറഞ്ഞുവെന്നാണ് പോലീസുകാര്‍ പറയുന്നത്. ഇതേക്കുറിച്ച് പുറത്തറിഞ്ഞു കഴിഞ്ഞപ്പോള്‍ വളരെയധികം ആള്‍ക്കാര്‍ ഇവര്‍ക്കു നല്‍കാനുള്ള സമ്മാനങ്ങള്‍ ബോയ്ന്‍ടോണ്‍ പോലീസ് ഡിപ്പാര്‍ട്ട്‌മെന്റിന്റെ ഓഫീസിലെത്തിച്ചിട്ടുണ്ട്. അതുകൊണ്ട് ക്രിസ്തുമസിനു മുന്‍പ് ഒരിക്കല്‍കൂടി സ്റ്റെഫനിയുടെ വീട്ടിലേയ്ക്ക് പോകാനിരിക്കുകയാണ് ആ പോലീസുകാര്‍.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha