തുർക്കി ഇനി പുതിയ പേരിൽ അറിയപ്പെടും. "തുർക്കി" എന്ന പേരിൽ നിന്ന് "തുർക്കിയെ" എന്നാക്കി മാറ്റി. ഭരണകൂടത്തിന്റെ അഭ്യർഥനയെ തു‌ടർന്ന് പേരുമാറ്റത്തിന് ഐക്യരാഷ്ട്രസഭ അംഗീകാരം നൽകിയിരിക്കുകയാണ്. മാറ്റം ആവശ്യപ്പെട്ട് രാജ്യം ഐക്യരാഷ്ട്ര സഭയ്ക്ക് കത്ത് നൽകിയിരുന്നു. കത്ത് കൈപ്പറ്റിയതായും മാറ്റം നിലവിൽ വന്നതായും യു എൻ സെക്രട്ടറി ജനറൽ അന്റോണിയോ ഗുട്ടെറസ് പറഞ്ഞു.

രാജ്യത്തിന്റെ പേരിലെ ഇംഗ്ലീഷ് ഉച്ചാരണത്തിന് ഒരു പക്ഷിയുടെ പേരിനോട് സാമ്യം ഉണ്ടെന്നും ഇത് നിരവധി പ്രശ്നങ്ങൾ ഉണ്ടാക്കുന്നു എന്നതാണ് പേരു മാറ്റത്തിന് പിന്നിലെ കാരണം.ഇംഗ്ലീഷ് സ്‍പെല്ലിങ് ദേശീയ ഭാഷയിലെ ഉച്ചാരണത്തിന് സമാനമാക്കണമെന്ന ആവശ്യവുമായി തുർക്കി പ്രസിഡന്റ് റജബ് ത്വയ്യിബ് ഉർദുഗാൻ രം​ഗത്തെത്തിയിരുന്നു.

കൂടാതെ, 1923ൽ സ്വതന്ത്രമായതു മുതൽ തുർക്കി ഭാഷയിൽ രാജ്യത്തിന്റെ പേര് എഴുതുന്നതും ഉച്ചരിക്കുന്നതും ‘തുർക്കിയ’ എന്നാണ്. മണ്ടത്തരം മാത്രം ചെയ്യുന്നയാൾ എന്ന അർഥം വരെ കേംബ്രിജ് ഡിക്‌ഷനറിയിൽ തുർക്കിക്ക് അർഥം കൊടുത്തതായി സർക്കാർ ചാനലായ ടിആർടി വേൾഡ് ആരോപിക്കുന്നു.

തുർക്കി ജനതയുടെ സംസ്കാരം, നാഗരികത, മൂല്യങ്ങൾ എന്നിവയെ പ്രതിനിധീകരിക്കുന്നതിനു ഏറ്റവും മികച്ച പേരാണ് "തുർക്കിയെ" എന്ന് ത്വയ്യിബ് ഉർദുഗാൻ പറഞ്ഞു. കയറ്റുമതി ഉൽപന്നങ്ങൾക്കുമേൽ പതിക്കുന്ന മുദ്രക്ക് പുതിയ പേര് സ്വീകരിക്കണമെന്ന് പ്രസിഡന്റ് പറഞ്ഞു. കൂടാതെ സ്റ്റേറ്റ് ഏജൻസികൾ കത്തിടപാടുകളിലും പുതിയ പേര് ഉപയോഗിക്കാൻ അദ്ദേ​ഹം നിർദ്ദേശം നൽകി.