ഇസ്ലാമിനെയും മുസ്ലീം വിശുദ്ധ ഗ്രന്ഥമായ ഖുറാനെയും അവഹേളിച്ചെന്നാരോപിച്ച് പ്രശസ്ത അഫ്ഗാൻ ഫാഷൻ മോഡലും മൂന്ന് സഹപ്രവർത്തകരും താലിബാൻ പിടിയിൽ. പ്രശ്‌സ്ത മോഡൽ അജ്മൽ ഹഖിഖിയേയും സഹപ്രവർത്തകരേയുമാണ് താലിബാൻ അറസ്റ്റ് ചെയ്തിരിക്കുന്നത്.

അറബിയിൽ ഖുറാൻ വാക്യങ്ങൾ ഹാസ്യാത്മകമായ സ്വരത്തിൽ ചൊല്ലിയതാണ് അറസ്റ്റിന് കാരണം.സോഷ്യൽ മീഡിയയിൽ പങ്കുവെച്ച വീഡിയോയിലാണ് ഇസ്ലാം മതത്തെ പരിഹസിച്ച് കൊണ്ടുള്ള വീഡിയോ പ്രത്യക്ഷപ്പെട്ടത്.

മോഡലിനേയും സഹായിയേയും അറസ്റ്റ് ചെയ്തതിന് പിന്നാലെ താലിബാനും ഒരു വീഡിയോ പുറത്തുവിട്ടു. 'മുഹമ്മദ് നബിയുടെ ഖുറാൻ സൂക്തങ്ങളെയോ വചനങ്ങളെയോ അധിക്ഷേപിക്കാൻ ആരെയും അനുവദിക്കില്ല' എന്ന അടിക്കുറിപ്പിനൊപ്പമായിരുന്നു വീഡിയോ.

ഇളം തവിട്ട് നിറത്തിലുള്ള ജയിൽ യൂണിഫോമിൽ താലിബാൻ സർക്കാരിനോടും മതപണ്ഡിതന്മാരോടും മാപ്പ് പറയുന്ന ഹഖിഖിയേയും സഹപ്രവർത്തകരേയും വീഡിയോയിൽ കാണാം. വീഡിയോ പുറത്തുവന്ന പിന്നാലെ ആംനസ്റ്റി ഇന്റർനാഷണൽ അവരെ മോചിപ്പിക്കണമെന്ന് താലിബാനോട് അഭ്യർത്ഥിച്ചു. പക്ഷേ താലിബാൻ ഇതുവരെ ഇതിൽ പ്രതികരിച്ചിട്ടില്ല.