പാലം ഉദ്ഘാടനം ചെയ്ത ശേഷം പാലത്തില്‍ കയറി നടന്നു; നിമിഷങ്ങൾക്കകം പാലം പൊട്ടി താഴെ വീണു; മധ്യ അമേരിക്കന്‍ രാജ്യമായ മെക്‌സിക്കോയില്‍ പാലം തകർന്ന് അപകടത്തിൽ അകപ്പെട്ടത് മേയറും സംഘവും
മധ്യ അമേരിക്കന്‍ രാജ്യമായ മെക്‌സിക്കോയില്‍ നമ്മുടെ കെ.ജി.ജോര്‍ജ്ജിന്റെ പഞ്ചവടിപ്പാലം എന്ന സിനിമ പുനര്‍ജനിച്ചു. ഭരണത്തിലെ അഴിമതികളേയും കൊള്ളയേയും തുറന്നു കാട്ടിയ സിനിമയായിരുന്നു പഞ്ചവടിപ്പാലം. ഉദ്ഘാടന ദിവസം തന്നെ പാലം പൊളിഞ്ഞു വീഴുന്നതാണ് അതിന്റെ ക്ലൈമാക്‌സും. ഭരത് ഗോപിയും ശ്രീനിവാസനും മറ്റും അഭിനയിച്ച സനിമ മലയാളികളെ ചിരിപ്പിക്കുകയും ചിന്തിപ്പിക്കുകയും ചെയ്തു.
ഇതിന് സമാനമായൊരു സംഭവമാണ് ഇപ്പോള്‍ മെക്‌സിക്കോയില്‍ അരങ്ങേറിയത്. മെക്‌സിക്കോയിലെ കുവെര്‍ണാ വെക്ക നഗരത്തിലാണ് സംഭവം. പാലം ഉദ്ഘാടനം ചെയ്ത ശേഷം പാലത്തില്‍ കയറി നടക്കുകയായിരുന്നു മേയറും സംഘവും. താമസിച്ചില്ല പാലം നിലം പൊത്തി. മേയറുടെ ഭാര്യ നാലു കൗണ്‍സിലര്‍മാര്‍ രണ്ട് ഉദ്യോഗസ്ഥര്‍ ഒരു മാധ്യമപ്രവര്‍ത്തകന്‍ എന്നിവരാണ് അപകടത്തില്‍ പെട്ടത്.
ഒരു ചെറിയ നദിക്ക് കുറുകേയായിരുന്നു പാലം. ഏകദേശം പത്തടി താഴേക്കായിരുന്നു വീഴ്ച. മരം കൊണ്ട് നിര്‍മിച്ച പാലത്തിന്റെ മുകള്‍ ഭാഗം ചങ്ങലയില്‍ നിന്നു വേര്‍പെട്ടതായിരുന്നു അപകടകാരണം. പരിധിയില്‍ അധികം പേര്‍ കറിയതാണ് പാലം പൊളിയാന്‍ കാരണമെന്ന് മേയര്‍ പറഞ്ഞു. പരിക്കേറ്റവരെ ഉടന്‍ ആശുപത്രിയില്‍ പ്രവേശിപ്പിച്ചു.
https://www.facebook.com/Malayalivartha
