ഇന്നലെ സെന്‍ട്രല്‍ ഹുബെയ് പ്രവിശ്യയില്‍ ചൈനീസ് വ്യോമസേനയുടെ ജെ 7 യുദ്ധവിമാനം തകര്‍ന്ന് വീണ സംഭവത്തില്‍ ഒരാള്‍ കൊല്ലപ്പെടുകയും നിരവധിപേര്‍ക്ക് പരിക്കേല്‍ക്കുകയും ചെയ്തിരുന്നു. ജനവാസ മേഖലയില്‍ തകര്‍ന്ന് വീണ വിമാനത്തില്‍ നിന്നും പൈലറ്റ് സുരക്ഷിതമായി രക്ഷപ്പെട്ടുവെങ്കിലും മൂന്ന് നിലക്കെട്ടിടം അപകടത്തില്‍ തകരുകയും ഇവിടെ താമസിച്ചിരുന്ന ഒരാള്‍ മരണപ്പെടുകയുമായിരുന്നു. ഹുബെയ് പ്രവിശ്യയിലെ സിയാങ്യാങ്ങില്‍ പരിശീലനത്തിനിടെയാണ് ജെ7 വിമാനം തകര്‍ന്നത്.

ലാഹോകൗ വിമാനത്താവളത്തിന് സമീപമുണ്ടായ ഈ അപകടത്തിന്റെ ദൃശ്യങ്ങള്‍ ചൈനീസ് സോഷ്യല്‍ മീഡിയയായ വെയ്‌ബോയില്‍ നിരവധി പേര്‍ പങ്കുവച്ചിരുന്നു. ലാഹോകൗ വിമാനത്താവളം ഇപ്പോള്‍ പ്രധാനമായും സൈനിക ആവശ്യങ്ങള്‍ക്കായിട്ടാണ് ഉപയോഗിക്കുന്നത്. പൈലറ്റുമാരെ പരിശീലിപ്പിക്കുവാനുള്ള ചൈനീസ് വ്യോമസേനയുടെ പ്രധാന ഇടമാണ് ഇവിടം. 1989ല്‍ സിയാങ്യാങ്ങിലെ ലിയുജി വിമാനത്താവളം തുറന്നതിന് ശേഷമാണ് ലാഹോകൗ വിമാനത്താവളം സൈനിക ആവശ്യങ്ങള്‍ക്കായി വിട്ടുനല്‍കിയത്.

ചൈനീസ് യുദ്ധവിമാനങ്ങള്‍ തകര്‍ന്നുവീഴുന്നത് തുടര്‍ക്കഥയാവുകയാണ്. സാമ്പത്തികമായി പിന്നാക്കം നില്‍ക്കുന്ന നിരവധി രാജ്യങ്ങളിലേക്ക് ആയുധങ്ങള്‍ കയറ്റുമതി ചെയ്യുന്ന ചൈന ഇത്തരം അപകടങ്ങളില്‍ പലതും പുറംലോകം അറിയാതെ ഒളിപ്പിക്കുകയാണ് പതിവ്. കടുത്ത മാദ്ധ്യമ നിയന്ത്രണമുള്ളതിനാല്‍ അപൂര്‍വമായേ ഇത്തരം അപകടങ്ങള്‍ പുറം ലോകം അറിയുകയുള്ളു. 2015ലും 2020ലും ചൈനയുടെ യുദ്ധവിമാനങ്ങള്‍ തകര്‍ന്ന സംഭവങ്ങള്‍ പുറത്തായിരുന്നു.

ചൈനയുടെ പക്കലുള്ള മിക്ക യുദ്ധവിമാനങ്ങളും മറ്റു രാജ്യങ്ങളില്‍ നിന്നും സാങ്കേതിക വിദ്യകള്‍ കടംകൊണ്ട് ഉണ്ടാക്കിയതാണ്. പലതും റിവേഴ്‌സ് എഞ്ചിനീയറിംഗിലൂടെയാണ് രാജ്യം സ്വന്തമാക്കിയത്. അതിനാല്‍ തന്നെ ആയുധങ്ങളുടെ ഫലപ്രാപ്തി എത്രത്തോളമുണ്ടെന്നത് സംശയകരമാണ്. ഇന്നലെ അപകടത്തില്‍ തകര്‍ന്ന ജെ 7 ഇന്ത്യന്‍ വ്യോമസേന ഉപയോഗിക്കുന്ന സോവിയറ്റ് നിര്‍മ്മിതമായ മിഗ്21 ജെറ്റുകളുമായി താരതമ്യപ്പെടുത്താവുന്നതാണ്. ചൈനയുടെ ചെങ്ഡു എയര്‍ക്രാഫ്റ്റ് കോര്‍പ്പറേഷനാണ് ജെ7 സിംഗിള്‍ എഞ്ചിന്‍ യുദ്ധവിമാനം രൂപകല്‍പ്പന ചെയ്യുകയും നിര്‍മ്മിക്കുകയും ചെയ്തത്. 1961 ല്‍ മിഗ്21 യുദ്ധവിമാനത്തിന്റെ സാങ്കേതികവിദ്യ കൈമാറാനായി ചൈനയും സോവിയറ്റ് യൂണിയനും കരാറിലെത്തിയിരുന്നു. എന്നാല്‍ താമസിയാതെ ഇരുരാജ്യങ്ങളും തമ്മിലുള്ള ബന്ധം വഷളായതിനാല്‍ ഈ കരാര്‍ നടപ്പിലായില്ല.

മിഗ് 21 വിമാനത്തിനായി ഏറെ ആഗ്രഹിച്ച ചൈന ഇതോടെ മിഗ്21നെ അനുകരിച്ച് സ്വന്തമായി ഒരു ഭാരം കുറഞ്ഞ വിമാനം നിര്‍മ്മിക്കാന്‍ തീരുമാനിച്ചു. റിവേഴ്‌സ് എന്‍ജിനീയറിങ് വഴി മിഗ്21ന്റെ സ്വന്തം പതിപ്പ് നിര്‍മ്മിക്കാന്‍ ചൈനയ്ക്ക് കഴിഞ്ഞു. 1964 മാര്‍ച്ചില്‍ ടൈപ്പ് 62 എന്നറിയപ്പെട്ട വിമാനം പിന്നീട് ജെ7 (ജിയാന്‍7) എന്ന് അറിയപ്പെട്ടു. ഈ വിമാനത്തിന്റെ കയറ്റുമതി വേരിയന്റിന എഫ് 7 എന്നാണ് വിശേഷിപ്പിച്ചിരുന്നത്. ഇത്രയും പഴക്കമേറിയ വിമാനങ്ങള്‍ ഇപ്പോഴും സജീവമായി നിലനിര്‍ത്താന്‍ ചൈനയ്ക്ക് കഴിയുന്നുണ്ട്. വിമാനത്തിന് ആവശ്യമുള്ള എല്ലാ സ്‌പെയര്‍ ഘടകങ്ങളും നിര്‍മ്മിക്കുവാനായി ഒരു ഫാക്ടറി ചെയിന്‍ നിലനിര്‍ത്തയതിലൂടെയാണ് ഇത് സാദ്ധ്യമായത്. 1966 ജനുവരിയില്‍ ആദ്യ പറക്കല്‍ നടത്തിയ വിമാനം 1967 ജൂണിലാണ് ചൈനീസ് വ്യോമസേനയുടെ ഭാഗമായത്. പിന്നീട് നിരവധി പ്രാവശ്യം വിമാനങ്ങളില്‍ മാറ്റങ്ങള്‍ വരുത്തി സാങ്കേതികമായി പുനര്‍നിര്‍മ്മിച്ചു. ഇന്ത്യയുടെ അയല്‍രാജ്യങ്ങള്‍ക്ക് അടക്കം പതിനേഴോളം രാജ്യങ്ങളിലേക്ക് വിമാനം കയറ്റുമതി ചെയ്ത് ചൈന പണം സമ്പാദിച്ചു.