വിമാനത്താവളങ്ങൾക്കും വിമാനങ്ങൾക്കും നേരെയുള്ള വ്യാജ ബോംബ് ഭീഷണികൾ അടുത്ത കാലത്തായി വർധിച്ചിട്ടുണ്ട്. ഇപ്പോൾ ഇതാ ഏറ്റവുമൊടുവിലായി വിസ്താര എയർലൈൻസിൽ   ബോംബു ഭീഷണിയുണ്ടായിരിക്കുകയാണ്. മുംബൈയിൽ നിന്ന് 247 യാത്രക്കാരുമായി ജർമനിയിലെ ഫ്രാങ്ക്ഫർട്ടിലേക്കു പോയ വിസ്താര എയർലൈൻസ് വിമാനം ബോംബു ഭീഷണിയെത്തുടർന്ന് തുർക്കിയിലെ എർസറം വിമാനത്താവളത്തിലിറക്കി. 

വിമാനത്തിൽ ബോംബ് വച്ചിട്ടുണ്ടെന്ന കുറിപ്പ് വിമാനത്തിന്റെ ശുചിമുറിയിൽ നിന്നും കണ്ടെത്തി. ഇതേ തുടർന്നാണ് വിമാനം തുർക്കിയിലിറക്കിയത്. എർസറം വിമാനത്താവളം അടച്ച് വിമാനത്തിൽ പരിശോധന നടത്തി.

സുരക്ഷാ കാരണത്താലാണ് വിസ്താരയുടെ യു.കെ.- 27 എന്ന വിമാനം തുര്‍ക്കിയിലെ എര്‍സറം വിമാനത്താവളത്തില്‍ ഇറക്കിയത് എന്ന് അധികൃതർ അറിയിച്ചു. വിമാനം തുര്‍ക്കിയില്‍ ലാന്‍ഡ് ചെയ്ത ശേഷം യാത്രക്കാരെയും ജീവനക്കാരെയും സുരക്ഷിതമായി പുറത്തിറക്കി. ശേഷം വിമാനം വഴി തിരിച്ചുവിടുകയായിരുന്നു.