ഇസ്രായേൽ ആക്രമണം ശക്തമാക്കിയതോടെ ഉത്തര ഗാസയിൽ സ്ഥിതി ഗുരുതരമെന്ന് റിപ്പോർട്ട്. ബോംബിങ്ങിൽ തകർന്നുവീഴുന്ന വീടുകളുടെ അവിശിഷ്ടങ്ങൾക്കടിയിൽനിന്ന് പരിക്കേറ്റവരെ പുറത്തെടുത്ത് അടിയന്തര ചികിത്സ നൽകുന്നവരെയും ലക്ഷ്യമിട്ടാണ് ഇപ്പോൾ ആക്രമണം കടുപ്പിക്കുന്നത്. ഇതോടെ ഉത്തര ഗസ്സയിലേക്ക് രക്ഷാപ്രവർത്തന സംഘങ്ങൾക്ക് കടക്കാനാകാത്ത അവസ്ഥയെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.

ആരോഗ്യ പ്രവർത്തകരുടെയും രക്ഷാപ്രവർത്തകരുടെയും സേവനം നിലച്ചതോടെ ആയിരങ്ങളാണ് ചികിത്സ കിട്ടാതെ ദുരിതത്തിലായത്. പരിക്കേറ്റവർക്ക് ചികിത്സ ലഭ്യമാക്കാൻ കഴുതവണ്ടിയിലോ, ചുമന്നോ കൊണ്ടുപോകേണ്ട ഗതികേടിലാണ് മേഖലയിലുള്ളവർ. പ്രദേശവാസികൾ തന്നെയാണ് നിലവിൽ അവശിഷ്ടങ്ങൾക്കിടയിൽനിന്ന് പരിക്കേറ്റവരെ പുറത്തെടുക്കുന്നതും അടിയന്തര ചികിത്സ നൽകുന്നതും. സ്‌ട്രെച്ചറുകൾ ഇല്ലാത്തതിനാൽ മരപ്പലകകളും വാതിലുകളും ഉപയോഗിച്ചാണ് പരിക്കേറ്റവരെ ആശുപത്രിയിലെത്തിക്കുന്നതെന്ന് ബൈത് ലാഹിയയിലെ മസീൻ അഹമ്മദ് പറഞ്ഞു.

ഒരു മാസമായി ഉത്തര ഗസ്സയിൽ തുടരുന്ന ബോംബിങ്ങിലും വെടിവെപ്പിലും 1500ലേറെ പേർക്കാണ് ജീവൻ നഷ്ടപ്പെട്ടത്. ബൈത് ലാഹിയ ഉൾപ്പെടെ പ്രദേശങ്ങളിൽനിന്ന് ഒഴിഞ്ഞുപോകാനും ഇസ്രായേൽ ഉത്തരവിട്ടിരുന്നു. ഇതോടെയാണ് രണ്ടാഴ്ച മുമ്പ് ഏറ്റവും വലിയ രക്ഷാപ്രവർത്തന സംഘമായ ഗസ്സയിലെ സിവിൽ ഡിഫൻസ് ഫോഴ്സ് പ്രവർത്തനം അവസാനിപ്പിക്കാൻ നിർബന്ധിതരായത്.

പരിക്കേറ്റവരെ കഴുതവണ്ടിയിലും മറ്റും ആശുപത്രിയിലെത്തിക്കേണ്ടിവരുന്നത് ചികിത്സ വൈകാനും മരണത്തിനിടയാക്കുമെന്നും യു.എൻ സന്നദ്ധ സംഘടനയായ യു.എൻ.ആർ.ഡബ്ല്യു.എ വക്താവ് ലൂയിസ് വാട്ടറിഡ്ജ് പറഞ്ഞു.

രക്ഷാപ്രവർത്തകരെ ബോധപൂർവം ആക്രമിക്കുകയും പരിക്കേറ്റവർക്ക് അടിയന്തര ചികിത്സ ലഭ്യമാക്കാൻ നടത്തുന്ന ശ്രമം പരാജയപ്പെടുത്തുകയുമാണ് ഇസ്രായേൽ ചെയ്യുന്നതെന്ന് സംയുക്ത പ്രസ്താവനയിൽ യുനിസെഫും ലോക ഭക്ഷ്യ പദ്ധതിയും ലോകാരോഗ്യ സംഘടനയും കുറ്റപ്പെടുത്തിയിരുന്നു.