വാശിയേറിയ മത്സരത്തിനൊടുവിൽ അമേരിക്കൻ പ്രസിഡൻ്റ് തെരഞ്ഞെടുപ്പിൽ ഡൊണാൾഡ് ട്രംപ് വിജയക്കൊടിനാട്ടി. ഏഴ് ഇന്ത്യൻ വംശജരുടെ വിജയം കണ്ട യുഎസ് പ്രസിഡൻ്റ് തെരഞ്ഞെടുപ്പ് കൂടിയായിരുന്നു ഇത്. വിജയം ഉറപ്പിച്ചതോടെ നിർണായക പദവികളിൽ ആരൊക്കെയുണ്ടാകണമെന്ന കാര്യത്തിൽ ചർച്ചകൾ ആരംഭിച്ചുകഴിഞ്ഞു.കാരണം അത്രയേറെ എല്ലാവരും ഉറ്റുനോക്കുന്ന തിരഞ്ഞെടുപ്പ് കൂടിയായിരുന്നു ഇത് . അതിന് ശേഷം അന്താരാഷ്ട്ര വിപണിയിൽ അടക്കം ഉണ്ടായിട്ടുള്ള മാറ്റങ്ങൾ നിരവധിയാണ് . ഇപ്പോഴിതാ ലോകം ചർച്ച ചെയ്യുന്നത് മറ്റൊരു കാര്യമാണ്.

സെൻട്രൽ ഇൻ്റലിജൻസ് ഏജൻസിയുടെ (സിഐഎ) തലപ്പത്തേക്ക് ഇന്ത്യൻ വംശജനായ കാഷ് പട്ടേലിൻ്റെ പേരു പരിഗണിക്കുന്നതായണ് റിപ്പോർട്ട്. ആദ്യ ട്രംപ് സർക്കാരിൽ ഇൻ്റലിജൻസ്, പ്രതിരോധ മേഖലകളിൽ നിർണായക പദവികൾ കൈകാര്യം ചെയ്തിരുന്ന വ്യക്തിയാണ് കാഷ് പട്ടേൽ. ട്രംപിൻ്റെ വിശ്വസ്തരിൽ ഒരാളായ കാഷ് പട്ടേൽ ദേശീയ സുരക്ഷയിലും പ്രതിരോധത്തിലും പ്രവർത്തിച്ച് കഴിവ് തെളിയിച്ചിട്ടുണ്ട്. 2019ൽ നാഷണൽ സെക്യൂരിറ്റി കൗൺസിൽ സ്റ്റാഫിൽ പട്ടേൽ ഉണ്ടായിരുന്നു.

സിഐഎ തലപ്പത്തേക്ക് കാഷ് പട്ടേലിലെ പരിഗണിക്കുമ്പോൾ തന്നെ ജാമി ഡിമോൺ, സ്കോട്ട് ബെസെൻ്റ്, ജോൺ പോൾസൺ എന്നിവരുടെ പേരുകളും ഉയർന്നുകേൾക്കുന്നുണ്ട്. ട്രംപ് സർക്കാരിൽ ഉന്നത പദവികൾ നേടാൻ സാധ്യതയുള്ള മൂന്ന് പേരാണിവർ. എന്നാൽ ട്രംപിനെ അനുകൂലിക്കുന്നവരും സഖ്യകകക്ഷികളും കാഷ് പട്ടേലിന് പിന്തുണ നൽകാനുള്ള സാധ്യത കൂടുതലാണ്. പല ട്രംപ് സഖ്യകക്ഷികളും സിഐഎ തലവനായി പട്ടേലിൻ്റെ പേര് മുന്നോട്ട് വച്ചുകഴിഞ്ഞു. സെനറ്റ് അംഗീകാരം എന്ന കടമ്പയാകും കാഷ് പട്ടേലിന് മുന്നിലുണ്ടാകുക.

ട്രംപിനായി ഏതറ്റം വരെയും പോകുന്നയാൾ എന്ന വിശേഷണമുള്ള കാഷ് പട്ടേൽ ഇസ്ലാമിക് സ്റ്റേറ്റ് തലവൻ അബൂബക്കർ അൽ ബാഗ്ദാദി, അൽ ഖൈവ്ദ നേതാവായിരുന്ന കാസിം അൽ റൈമി എന്നിവരുടെ വധത്തിന് പിന്നിൽ പ്രവർത്തിച്ച ബുദ്ധികേന്ദ്രമായും അറിയപ്പെടുന്നുണ്ട്.ഗുജറാത്തിലെ വഡോദരയിൽ നിന്ന് കുടിയേറിയവരാണ് കാഷ് പട്ടേലിൻ്റെ മാതാപിതാക്കൾ. പട്ടേലിൻ്റെ പിതാവ് ഇദി അമീൻ്റെ കാലത്ത് ഉഗാണ്ടയിൽ നിന്ന് അമേരിക്കയിലെക്ക് പലയാനം ചെയ്യുകയായിരുന്നു. 1980 ഫെബ്രുവരി 25ന് ന്യൂയോർക്കിലാണ് കാഷ് പട്ടേലിൻ്റെ ജനനം.