യുദ്ധം ഒരു അവസാനമില്ലാതെ തുടർന്ന് കൊണ്ട് ഇരിക്കുമ്പോൾ ഇന്ത്യയും ആശങ്കപ്പെടുകയാണ് കാരണം മറ്റൊന്നുമല്ല , ഇന്ത്യൻ പട്ടാളത്തെ ഓർത്ത് . യുഎൻ സമാധാന സേനയുടെ ഭാ​ഗമായി ലെബനനിലെ സംഘർഷബാധിത മേഖലയിൽ പ്രവർത്തിക്കുന്ന ഇന്ത്യൻ സൈനികർ സുരക്ഷിതരാണെന്ന് സൈന്യം അറിയിച്ചു. നിലവിൽ യുഎന്നിന്റെ നിർദ്ദേശം അനുസരിച്ചാണ് സൈനികർ പ്രവർത്തിക്കുന്നത്. സൈനികരുടെ സുരക്ഷ ഇന്ത്യ സൂക്ഷമമായി നീരീക്ഷിക്കുന്നുണ്ട്. സ്ഥിതിഗതികൾ വഷളായാൽ അടിയന്തരമായി സൈന്യത്തെ തിരിച്ച് വിളിക്കാനും മുൻകൂട്ടി പദ്ധതി തയ്യാറാക്കിയിട്ടുണ്ടെന്നും കരസേനാ ഡെപ്യൂട്ടി ചീഫ് ലെഫ്റ്റനൻ്റ് ജനറൽ രാകേഷ് കപൂർ ഉറപ്പുനൽകി.

900 സൈനികരെയാണ് ഇന്ത്യ ലെബനനിൽ വിന്യസിച്ചിരിക്കുന്നത്. ഏറ്റവുമധികം സൈനികരെ അയച്ച രാജ്യങ്ങളില്‍ മൂന്നാമത്തേതാണ് ഇന്ത്യ.
1978ലാണ് ദക്ഷിണ ലെബനനിലെ യുദ്ധഭൂമിയിലേക്ക് ഇടക്കാല സമാധാന പാലനത്തിനുവേണ്ടി യുഎന്‍ രക്ഷാസമിതി സൈന്യത്തെ നിയോഗിച്ചത്. അന്ന് പലസ്തിൻ ഗറില്ലകളുമായിരുന്നു ഏറ്റുമുട്ടൽ. പിന്നീട് യുഎന്‍ ഇടക്കാല സേന ഫലത്തില്‍ ഒരു സ്ഥിരം സംവിധാനമാവുകയായിരുന്നു.ഒരു മാസം മുൻപ് ലെബനാനിലെ യുഎൻ സമാധാന സേനാംഗങ്ങൾക്കു നേരെ ഇസ്രായേൽ ആക്രമണം നടന്നിരുന്നു . തെക്കൻ ലെബനാനിലെ യുഎൻ സമാധാന സേനാ ആസ്ഥാനത്തെ ഇറ്റാലിയൻ ബറ്റാലിയനു നേരെയാണ് ആക്രമണം ഉണ്ടായത് .

സമാധാന സേനാം​ഗങ്ങൾ ഉപയോ​ഗിക്കുന്ന വാച്ച് ടവറിന് നേരെ ഇസ്രായേൽ സൈന്യം നടത്തിയ വെടിവയ്പ്പിൽ രണ്ട് ഇന്തോനേഷ്യൻ സേനാംഗങ്ങൾക്ക് പരിക്കേറ്റിരുന്നു.ആക്രമണത്തിൽ ഇസ്രായേലിനെതിരെ പ്രതിഷേധം ശക്തമാണ്. യുഎൻ സമാധാന സേനാംഗങ്ങൾക്കെതിരായ ആക്രമണത്തിൽ ഇസ്രായേൽ പ്രതിനിധിയെ ഫ്രാൻസ് വിളിച്ചുവരുത്തി. തങ്ങളുടെ ആസ്ഥാനത്ത് ഇസ്രയേൽ നടത്തിയ വെടിവയ്പ്പിൽ രണ്ട് ജീവനക്കാർക്ക് പരിക്കേറ്റതായി ലബനാനിലെ യുഎൻ സമാധാന സേനാംഗങ്ങൾ വ്യക്തമാക്കിയതിനു പിന്നാലെയാണ് ഇസ്രായേൽ അംബാസഡറെ വിളിപ്പിച്ചതെന്ന് ഫ്രാൻസ് പറയുന്നു