അമേരിക്കയിലെ ലോസാഞ്ചലസില്‍ വലിയ രീതിയില്‍ ബാധിച്ച കാട്ടുതീയില്‍ ചുറ്റുമുള്ള വീടുകള്‍ കത്തിനശിച്ചിട്ടും ഒരു വീടിന് മാത്രം ഒന്നും സംഭവിച്ചില്ല.കാട്ടുതീയില്‍ രക്ഷനേടിയ വീടുകള്‍ സമൂഹമാധ്യമങ്ങളില്‍ ചര്‍ച്ചയാവുന്നു. പസഫിക് പാലിസേഡിലുള്ള വീടിന്റെ ചിത്രമാണ് സമൂഹമാധ്യമങ്ങളില്‍ വൈറലാവുന്നത്.

വലത്തും ഇടത്തും മുന്നിലും പിന്നിലും ഉള്ള വീടുകള്‍ എല്ലാം തന്നെ കാട്ടുതീയില്‍ കത്തിക്കരിഞ്ഞിട്ടും പാലിസേഡിലെ ഈ വീടിന് പരിക്കൊന്നും ഏറ്റിട്ടില്ല. വീടിന്റെയും മതിലിന്റേയും ഡിസൈനിനും നിര്‍മ്മാണത്തിന് ഉപയോഗിച്ച വസ്തുക്കളും പിന്നെ ഭാഗ്യവുമാണ് വീട് ബാക്കിയായതിന് പിന്നിലെന്നാണ് വീടിന്റെ ഉടമസ്ഥനായ ആര്‍ക്കിടെക്ട് ഗ്രെഗ് ചേസന്‍ വിശദമാക്കുന്നത്. പാസീവ് ഹോം ഡിസൈന്‍ മാനദണ്ഡമാക്കിയതാണ് ഈ ആര്‍ക്കിടെക്ടിന്റെ വീടിന് സഹായമായത്.

ചെടികള്‍ ഇല്ലാതെയുള്ള കോംപൌണ്ടും കോണ്‍ക്രീറ്റു കൊണ്ട് നിര്‍മ്മിച്ച അരഭിത്തിയും ചുവരുകളും ലോഹനിര്‍മ്മിതമായ മേല്‍ക്കുരയും അഗ്‌നിയെ പ്രതിരോധിക്കുന്ന സീലിംഗുമാണ് ലോസാഞ്ചലസ് കാട്ടുതീയെ ചെറുക്കാന്‍ വീടിനെ സഹായിച്ചതെന്നാണ് ആര്‍ക്കിടെക്ട് ഗ്രെഗ് ചേസന്‍ ദി ഗാര്‍ഡിയനോട് പ്രതികരിച്ചത്. ഭാഗ്യം ഒരു വലിയ ഘടകം ആയിരുന്നെങ്കിലും ഈ പുതിയ വീട്ടില്‍ മരത്തിനേക്കാള്‍ കൂടുതല്‍ കോണ്‍ക്രീറ്റിനെ അടിസ്ഥാനമാക്കിയതും തീയെ ചെറുത്തതായാണ് ഗ്രെഗ് ചേസന്‍ വിലയിരുത്തുന്നത്. ലോസാഞ്ചലസിന്റെ പടിഞ്ഞാറന്‍ മേഖലയിലാണ് ഈ വീടുള്ളത്. മേല്‍ക്കൂരയില്‍ ക്ലാസ് എ കാറ്റഗറിയിലുള്ള മരമാണ് ഉപയോഗിച്ചത്.

ഈ വീടിന് പരിസരത്തുള്ള വീടുകള്‍ എല്ലാം കത്തിനശിച്ചിട്ടും ഈ വീടിനെ തീപിടിക്കാതിരുന്നത് നിര്‍മ്മാണത്തിലെ വ്യത്യാസമാണെന്ന് കാണിച്ച് സമൂഹമാധ്യമങ്ങളിലും ചര്‍ച്ചയാവുന്നുണ്ട്. 12000 വീടുകളും കെട്ടിടങ്ങളും മറ്റ് കെട്ടിടങ്ങളുമാണ് കാട്ടുതീയില്‍ കത്തിനശിച്ചത്. അമേരിക്കയുടെ പടിഞ്ഞാറന്‍ മേഖലയെ വലച്ചുകൊണ്ട് കാട്ടു തീ പതിവാകുന്ന സാഹചര്യത്തില്‍ വീടുകളുടെ നിര്‍മ്മാണ രീതിയില്‍ മാറ്റം വേണമെന്നും നിരവധിപ്പേരാണ് പ്രതികരിക്കുന്നത്. കെമിക്കലുകള്‍ ഉപയോഗിച്ചുള്ള സിന്തറ്റിക് പദാര്‍ത്ഥങ്ങള്‍ വീട് നിര്‍മ്മാണത്തിന് ഉപയോഗിച്ചത് വലിയ രീതിയില്‍ വീടുകള്‍ തീയില്‍ നശിക്കാന്‍ മേഖലയില്‍ കാരണമായിരുന്നു.

ലോസാഞ്ചലസില്‍ പടര്‍ന്ന കാട്ടുതീ ഇനിയും പൂര്‍ണമായി നിയന്ത്രണ വിധേയമായിട്ടില്ല. 27 പേരാണ് ഇതിനോടകം കാട്ടുതീയില്‍ കൊല്ലപ്പെട്ടത്. ജനുവരി 7 മുതല്‍ വലുതും ചെറുതുമായ 30 കാട്ടുതീയാണ് ലോസാഞ്ചലസ് മേഖലയെ സാരമായി ബാധിച്ചത്. ഇതില്‍ പാലിസേഡ്, ഈറ്റണ്‍ മേഖലയിലുണ്ടായ കാട്ടുതീയാണ് വലിയ രീതിയിലുള്ള നാശം വിതച്ചത്. മേഖലയില്‍ അനുഭവപ്പെട്ട ശക്തമായ വരണ്ട കാറ്റ് കാട്ടുതീയുടെ വ്യാപനത്തിന് ശക്തി നല്‍കിയിരുന്നു.