മധ്യ അമേരിക്കയിലുടനീളം വീശിയടിച്ച വന്‍ ചുഴലിക്കാറ്റില്‍ 27 പേര്‍ കൊല്ലപ്പെട്ടെന്നു റിപ്പോര്‍ട്ട്. നിരവധി പേര്‍ക്ക് പരുക്കേറ്റു. കഴിഞ്ഞ വര്‍ഷം ഏപ്രിലിനുശേഷം രാജ്യവ്യാപകമായി യുഎസില്‍ ഏറ്റവും കൂടുതല്‍ ചുഴലിക്കാറ്റ് മുന്നറിയിപ്പുകള്‍ പുറപ്പെടുവിച്ചതു ശനിയാഴ്ചയാണ്.

മിസോറിയാണ് ഏറ്റവും കൂടുതല്‍ നാശനഷ്ടങ്ങളുണ്ടായ സംസ്ഥാനങ്ങളിലൊന്ന്. വെയ്ന്‍ കൗണ്ടിയില്‍ 6 പേരുള്‍പ്പെടെ 12 മരണം റിപ്പോര്‍ട്ട് ചെയ്തു. പൊടിക്കാറ്റ് മൂലം 50 വാഹനങ്ങള്‍ കൂട്ടിയിടിച്ചതിനെത്തുടര്‍ന്ന് വെള്ളിയാഴ്ച കാന്‍സസില്‍ 8 പേര്‍ മരിച്ചു. ടെക്‌സസില്‍, ശക്തമായ പൊടിക്കാറ്റുമായി ബന്ധപ്പെട്ട വാഹനാപകടങ്ങളില്‍ 4 പേര്‍ മരിച്ചു. അര്‍കെന്‍സയിലും 3 മരണമുണ്ടായി, 29 പേര്‍ക്ക് പരുക്കേറ്റു.

ചുഴലിക്കാറ്റിനെ തുടര്‍ന്നു 2 ലക്ഷത്തിലേറെ വീടുകള്‍ക്കും ബിസിനസ് സ്ഥാപനങ്ങള്‍ക്കും വൈദ്യുതി ഇല്ലാതായി. മിസിസ്സിപ്പിയിലും ടെനിസിയിലും കൂടുതല്‍ ചുഴലിക്കാറ്റുകള്‍ ഉണ്ടാകുമെന്നു മുന്നറിയിപ്പുണ്ട്. വീട്, സ്‌കൂള്‍, ജോലിസ്ഥലം, മാള്‍, തിയറ്റര്‍, വാഹനം എന്നിങ്ങനെ വ്യത്യസ്ത സാഹചര്യങ്ങളില്‍ ചുഴലിക്കാറ്റിനെ നേരിടേണ്ടത് എങ്ങനെയെന്ന മുന്നറിയിപ്പ് സന്ദേശങ്ങള്‍ അധികൃതര്‍ പുറത്തിറക്കി.