ഓട്ടോ റിക്ഷാ ഡ്രൈവർ സമ്മാനം അടിച്ചില്ലെന്ന് കരുതി വീട്ടിലെ ചവറ്റ് കൊട്ടയിൽ വലിച്ചെറിഞ്ഞ ഭാഗ്യക്കുറിക്ക് ഒന്നാം സമ്മാനം. ഫിഫ്റ്റി ഫിഫ്റ്റി ലോട്ടറിയുടെ ഒന്നാം സമ്മാനമായ ഒരു കോടി രൂപയാണ് കോട്ടയം സ്വദേശി സുനിൽ കുമാറിനെ തേടിയെത്തിയത്. പൂവന്തുരുത്ത് പ്ലാമൂട് സ്റ്റാൻഡിലെ ഓട്ടോ ഡ്രൈവറായ സുനിൽകുമാർ ഇപ്പോൾ പ്രതീക്ഷിക്കാതെ തേടിയെത്തിയ ഭാഗ്യത്തിന്റെ സന്തോഷത്തിലാണ്.

ആദ്യം ഫലം നോക്കിയപ്പോൾ സമ്മാനമില്ലെന്ന് കരുതി വീട്ടിലെ ചവറ്റുകൊട്ടയിലേക്ക് വലിച്ചെറിഞ്ഞ ടിക്കറ്റ് സംശയം തോന്നി വീണ്ടും പരിശോധിച്ചപ്പോഴാണ് സമ്മാനത്തിന് അർഹമായ നമ്പർ കണ്ടത്. സുനിൽ കുമാർ വ്യാഴാഴ്ച രാവിലെ പത്രം വായിക്കുമ്പോഴാണ് ഫലം പരിശോധിച്ചത്. ആദ്യം ചെറിയ സമ്മാനത്തുകകൾ വല്ലതും ഉണ്ടോയെന്ന് നോക്കി. ഇല്ലെന്ന് കണ്ടതോടെ ലോട്ടറി അടുത്തുള്ള ചവറ്റുകൊട്ടയിൽ ഉപേക്ഷിച്ചു.

എന്നാൽ വീണ്ടും ഫലം നോക്കിയപ്പോൾ ഒന്നാം സമ്മാനം ലഭിച്ച നമ്പറിൽ ശ്രദ്ധിച്ചതോടെ കൊട്ടയിലെ ലോട്ടറി വീണ്ടും പരിശോധിച്ചു. ഇതോടെയാണ് സുനിൽ കുമാറിന് മനസിലായത് ഒരു കോടിയുടെ ടിക്കറ്റാണ് താൻ ഉപേക്ഷിച്ചതെന്ന്. വീട് പണയം വച്ച് വായ്പയെടുത്ത അടവ് മുടങ്ങിക്കിടക്കുന്നതിനിടെയാണ് സുനിൽകുമാറിനെ തേടി ഒരു കോടിയുടെ ഭാഗ്യം എത്തിയത്.

അപ്രതീക്ഷിതമായി എത്തിയ ഭാഗ്യത്തിന്റെ സന്തോഷത്തിലാണ് സുനിൽകുമാറും കുടുംബവും. ലോട്ടറിയടിച്ചുകൊണ്ടാണ് ഭാഗ്യമെത്തിയതെങ്കില്‍ സ്ഥിരമായി എടുത്ത ലോട്ടറി ടിക്കറ്റുകള്‍ ഒന്നിച്ച് സൂക്ഷിച്ചുവെക്കുന്ന സുനിലിന്‍റെ ശീലമാണ് ആ ഭാഗ്യം നഷ്ടപെടാതിരിക്കാന്‍ കാരണമായത്. ഒരു പാട് വായ്പകളുണ്ട്. സ്വര്‍ണവും പണയം വെച്ചിട്ടുണ്ട്. കടങ്ങളെല്ലാം വീട്ടണമെന്നാണ് ആഗ്രഹമെന്നും സുനില്‍ പറഞ്ഞു.

പതിവായി എടുക്കുന്ന ലോട്ടറി ടിക്കറ്റുകള്‍ അടിച്ചില്ലെങ്കിലും ഒന്നിച്ചു കെട്ടിവെക്കുന്നതാണ് സുനിലിന്‍റെ രീതി. ഇത്തരത്തില്‍ ലോട്ടറികള്‍ ഒന്നിച്ചുവെക്കുന്ന സ്ഥലത്ത് ഒരു കോടിയുടെ ലോട്ടറി ടിക്കറ്റും വെച്ചതിനാല്‍ സംശയം തോന്നിയപ്പോള്‍ വീണ്ടും നോക്കാനായി. ഇതോടെ കൈവിട്ടെന്ന് കരുതിയ ഭാഗ്യം വീണ്ടും സുനിലിനെ തേടിയെത്തുകയായിരുന്നു.