\'ലാര്‍ജസ്റ്റ് ഗാതറിങ് ഓഫ് സാന്താക്ലോസ്\' എന്ന പരിപാടിയുടെ ഭാഗമായി കാല്‍ലക്ഷം സാന്താക്ലോസുമാര്‍ ഇന്ന് തൃശൂര്‍ നഗരത്തില്‍ അണിനിരക്കും. അതിരൂപതയും പൗരാവലിയും ചേര്‍ന്നാണ് പരിപാടി സംഘടിപ്പിക്കുന്നത്. 13,000 ക്രിസ്മസ് പാപ്പാമാര്‍ നിരന്ന വടക്കന്‍ അയര്‍ലന്‍ഡിനാണ് ഏറ്റവും വലിയ ക്രിസ്മസ് ആഘോഷത്തിന്റെ നിലവിലെ റെക്കോഡ്. ഇത് തകര്‍ക്കുകയാണ് ലക്ഷ്യം.ഗിന്നസ്ബുക്ക് റെക്കോഡ് അധികൃതര്‍ നഗരത്തിലെത്തിയിട്ടുണ്ട്.

ശക്തന്‍നഗറില്‍ സജ്ജീകരിച്ചിരിക്കുന്ന 40 കവാടങ്ങളിലായി ഇന്ന് ഉച്ചയ്ക്ക് ഒന്നിന് അണിനിരക്കുന്ന പാപ്പമാരെ ഇലക്‌ട്രോണിക് സംവിധാനത്തിലൂടെയാണ് എണ്ണിത്തിട്ടപ്പെടുത്തുന്നത്.അതിനുശേഷം വൈകിട്ട് നാലിനു കലക്ടര്‍ എം.എസ്. ജയ, മേയര്‍ രാജന്‍ ജെ.പല്ലന്‍ എന്നിവരുടെ സാന്നിധ്യത്തില്‍ പ്രഖ്യാപനം നടത്തും.

വൈകിട്ട് നാലരയോടെയാണ് ക്രിസ്മസ് പരേഡായ ബോണ്‍നത്താലെയുടെ ഫ്‌ളാഗ് ഓഫ് നടത്തുന്നത്. കരോള്‍ സ്വരാജ്‌റൗണ്ട് ചുറ്റി ഹൈറോഡിലൂടെ ശക്തന്‍ നഗറിലേക്കു തിരിച്ചെത്തും. രണ്ടായിരത്തോളം കുഞ്ഞുമാലാഖമാര്‍ പുത്തന്‍പള്ളി കേന്ദ്രീകരിച്ചശേഷം കോര്‍പറേഷന്‍ ഓഫീസിനു മുന്‍വശത്തുവച്ച് ബോണ്‍നത്താലെയില്‍ അണിചേരും. അഞ്ചുലക്ഷം പേര്‍ പരിപാടികള്‍ കാണാനെത്തുമെന്നാണു പ്രതീക്ഷിക്കുന്നത്.

സമാപനസമ്മേളനം വൈകിട്ട് ഏഴിന് മുഖ്യമന്ത്രി ഉമ്മന്‍ചാണ്ടി ഉദ്ഘാടനം ചെയ്യും. ഇതോടനുബന്ധിച്ച് ഭവനരഹിതര്‍ക്കു വീടു വച്ചുനല്‍കുന്നതുള്‍പ്പെടെ അഞ്ചുകോടിയിലധികം രൂപയുടെ ജീവകാരുണ്യപ്രവര്‍ത്തനങ്ങളും നടത്തുമെന്ന് ആര്‍ച് ബിഷപ് മാര്‍ ആന്‍ഡ്രൂസ് താഴത്ത്, എം.പി. വിന്‍സന്റ് എം.എല്‍.എ, ജോസി ചാണ്ടി, ജനറല്‍ കണ്‍വീനര്‍ ഡേവിസ് പുത്തൂര്‍ എന്നിവര്‍ പത്രസമ്മേളനത്തില്‍ അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha