ഉപ മുഖ്യമന്ത്രിയുമില്ല, ആഭ്യന്തരവുമില്ല, കെപിസിസി നേതൃ സ്ഥാനത്തുനിന്നും ഇറക്കി പ്രാധാന്യം കുറഞ്ഞ മന്ത്രിയാക്കി ചെന്നിത്തലയെ ഒതുക്കാനുള്ള ശ്രമം
കെപിസിസി പ്രസിഡന്റ് രമേശ് ചെന്നിത്തല ദേ ഇപ്പം മന്ത്രിയാകുമെന്ന് കേരള സമൂഹം മൊത്തത്തില് സ്വപ്നം കണ്ടതാണ്. കേരളയാത്ര തീരുമ്പോള് അതോടൊപ്പം ചെന്നിത്തലയുടെ മന്ത്രിസഭാ പ്രവേശനവും ഉറപ്പിച്ചതാണ്. എല്ലാവരും പറഞ്ഞ് പറഞ്ഞ് അവസാനം ചെന്നിത്തലയും സമ്മതിച്ചു. താത്പര്യമുണ്ടായിട്ടല്ല, പിന്നെ ഹൈക്കമാന്ഡ് പറഞ്ഞാല് അനുസരിക്കും. ചെന്നിത്തല ഏത് നിമിഷം വേണമെങ്കിലും സത്യപ്രതിജ്ഞ ചെയ്യും എന്ന നിലയിലായി. സംഗതി ചെന്നിത്തലയാണ്. എതിര്ക്കാന് കഴിവുള്ള പഴയ വീര്യമുള്ള കോണ്ഗ്രസുകാരാരുമില്ല. പിന്നെ ആകെയുള്ളത് കെ. മുരളീധരനാണ്, പാവത്താനും മിണ്ടാന് കഴിയില്ല. കാരണം മന്ത്രി പ്രതീക്ഷയിലാണ് അദ്ദേഹവും. കോണ്ഗ്രസിന്റെ ദേശീയ നേതാക്കള്ക്കോ എന്തിന് രാഹുല് ഗാന്ധിക്കു പോലും എതിര്പ്പില്ല. ഇത്രയൊക്കെ അനുകൂലമായ ഘടകങ്ങളുണ്ടായിട്ടും ചെന്നിത്തലയുടെ മന്ത്രിസഭാ പ്രവേശനം ഗണപതികല്യാണമായി നീളുകയാണ്.
അവസാനം ചെന്നിത്തല തന്നെ പറഞ്ഞു മന്ത്രിസഭാ ചര്ച്ചയൊന്നും നടന്നിട്ടില്ല. മന്ത്രിയാക്കണമെന്ന് ആരോടും ആവശ്യപ്പെട്ടിട്ടില്ല. മന്ത്രിസഭയിലേയ്ക്കില്ലെന്ന പഴയ നിലപാടില് ഉറച്ചു നില്ക്കുന്നുവെന്നും അദ്ദേഹം പറഞ്ഞു.
ഒന്നുകില് ഉപ മുഖ്യമന്ത്രി അല്ലെങ്കില് ആഭ്യന്തരമന്ത്രി ഇതായിരുന്നു ചെന്നിത്തലയുടെ നിലപാട്. ഐഗ്രൂപ്പുകാരും ഇത് പിന്തുണച്ചു. അപ്പോഴേക്കും എ ഗ്രൂപ്പുകാര് കൂട്ടത്തോടെ അണിനിരന്നു. അവര്ക്ക് പേടി രമേശ് ചെന്നിത്തല മറ്റൊരു അധികാര കേന്ദ്രമാകുമെന്നാണ്. ഉപ മുഖ്യമന്ത്രിയായാലും ആഭ്യന്തരമായാലും അത് മുഖ്യമന്ത്രി ഉമ്മന് ചാണ്ടിക്ക് പ്രത്യേകിച്ച് എ പക്ഷക്കാര്ക്ക് ക്ഷീണമാകും. അതുകൊണ്ടു തന്നെ ഒരു കാരണവശാലും ഉപമുഖ്യമന്ത്രി സ്ഥാനമോ ആഭ്യനന്തരമന്ത്രി സ്ഥാനമോ നല്കേണ്ടന്ന് തീരുമാനിച്ചു. ഇക്കാര്യം കേന്ദ്ര മന്ത്രി എ.കെ. ആന്റണിയോട് തുറന്നു പറഞ്ഞു. തന്റെ പേരിലുള്ള ഗ്രൂപ്പുകാരുടെ ഉള്ളിലിരിപ്പ് ആന്ണി മുമ്പേ മനസില് കണ്ടിരുന്നു. പുതിയ മന്ത്രിയ്ക്കായുള്ള ചര്ച്ച തന്റെ അജണ്ടയിലില്ലന്ന് ആദ്യമേ അദ്ദേഹം പറഞ്ഞു.
ഇതോടൊപ്പം ഉപ മുഖ്യമന്ത്രിസ്ഥാനത്തിന് ചെന്നിത്തലയെക്കാളും പരിചയമുള്ള നേതാക്കളായ കെ.എം. മാണിയും കുഞ്ഞാലിക്കുട്ടിയും അര്ഹനാണെന്ന ചര്ച്ചയും വന്നു. കാരണം നാല്പ്പതില് താഴെ സീറ്റു കിട്ടിയ കോണ്ഗ്രസിനാണ് ഇപ്പോള് മുഖ്യമന്ത്രിസ്ഥാനവും പ്രധാന വകുപ്പുകളുമുള്ളത്. അതുകൊണ്ടാണ്ടാണ് കേരള കോണ്ഗ്രസ് നേതാവായ കെ.എം. മാണി ഉപമുഖ്യമന്ത്രിസ്ഥാനത്തിന് താനും അര്ഹനാണെന്ന് പറഞ്ഞത്. എന്നാല് എ. ഗ്രൂപ്പുകാരനായ മന്ത്രി കെ.സി. ജോസഫ് ആശിക്കാതിരിന്ന മുസ്ലീം ലീഗിനും പ്രതീക്ഷ നല്കി. കുഞ്ഞാലിക്കുട്ടിയും ഉപ മുഖ്യമന്തി സ്ഥാനത്തിനര്ഹനാണെന്നാണ് കെ.സി. ജോസഫ് പറയുന്നത്. ഇതോടെ ഉപമുഖ്യമന്ത്രിസ്ഥാനം ചെന്നിത്തലയ്ക്ക് കിട്ടില്ലെന്നായി.
ഇനിയുള്ളത് ആഭ്യന്തരവകുപ്പാണ്. കഴിഞ്ഞ തവണയും ഇതുപോലെ ചെന്നിത്തലയ്ക്ക് ആഭ്യന്തരം കൊടുക്കുമെന്ന് കരുതിയിരുന്നതാണ്. എന്നാല് മുഖ്യമന്ത്രി രായ്ക്ക് രാമാനം ആഭ്യന്തരം തിരിരുവഞ്ചൂര് രാധാകൃഷ്ണന് നല്കി എന്എസ്എസിനെ ആശ്വസിപ്പിക്കാന് ശ്രമിച്ചു. സുകുമാരന് നായര് അതിഷ്ടപ്പെട്ടില്ലെന്നു മാത്രമല്ല തിരുവഞ്ചൂരിനെ പെരുന്നയില് കയറ്റിയതു പോലുമില്ല. ഈയൊരവസരത്തില് ആഭ്യന്തരം കിട്ടുമെന്നു തന്നെയാണ് ഐ ഗ്രൂപ്പുകാര് കരുതിയത്. എന്നാല് തന്ത്രപരമായ ആഭ്യന്തരവകുപ്പ് വിട്ടുകൊടുക്കാന് എ ഗ്രൂപ്പുകാര് തയ്യാറല്ല. അത്രയ്ക്ക് നിര്ബന്ധമാണെങ്കില് റവന്യൂവകുപ്പ് നല്കാം. പോരങ്കില് നാടുനീളെ കറങ്ങാന് ടൂറിസവും നല്കാം.
https://www.facebook.com/Malayalivartha