സമയമായില്ല പോലും... മന്ത്രിക്കുപ്പായം തയ്പ്പിച്ചവര് വെട്ടിലായി, ഉടന് പുനസംഘടനയില്ല, മന്ത്രിയാകുമെന്ന് മോഹിച്ചവര് ചെന്നിത്തലയെ ശപിക്കുമോ?
മുഖ്യമന്ത്രി ഉമ്മന് ചാണ്ടിയെ കെ.പി.സി.സി. പ്രസിഡന്റ് രമേശ് ചെന്നിത്തല കണ്ടു. മുഖ്യമന്ത്രിയെ കണ്ടതും ചെന്നിത്തല പഴയതുപോലെയായ്. മന്ത്രിസഭയില് ചേരാനോ. ഛേയ് മോശം. കെപിസിസി പ്രസിഡന്റ് പദം തന്നെ വലുത്. അക്കാര്യം മുഖ്യമന്ത്രിതന്നെ പത്രക്കാരോടും പറഞ്ഞു. മന്ത്രിസഭ പുനസംഘടന ഇപ്പോളില്ല. മന്ത്രിയാവാന് രമേശിന് താത്പര്യവുമില്ല. എല്ലാം മാധ്യമ സൃഷ്ടിമാത്രം.
തനിക്ക് മന്ത്രിയാവാന് മോഹമില്ലന്ന് ചെന്നിത്തല പണ്ടേ പറഞ്ഞതാണ്. ഹൈക്കമാന്ഡ് ബുദ്ധിമുട്ടിച്ച് നിര്ബന്ധിച്ചാല് ചിലപ്പം നോക്കാമെന്നുമാത്രം. ഭാഗ്യത്തിന് ആരും ബുദ്ധിമുട്ടിച്ചില്ല. എ.കെ. ആന്റണിയും രാഹുല് ഗാന്ധിയും വന്ന വഴിക്കുപോയി. പിന്നെ കെപിസിസി പ്രസിഡന്റ് പദം കിട്ടുമെന്നറിഞ്ഞ് കറങ്ങിക്കറങ്ങി നിന്നത് മുല്ലപ്പള്ളി രാമചന്ദ്രനാണ്. എല്ലാവര്ക്കും ഹൈക്കമാന്ഡ് നിര്ബന്ധിക്കണമെന്നു മാത്രം. ഏത് ജോലിയും സ്വീകരിക്കും. ഇതിനിടയ്ക്ക് മന്ത്രിക്കുപ്പായം തയ്ക്കാന് നടന്നവരെല്ലാം വെട്ടിലായി. മന്ത്രിപ്പണിക്ക് പുതിയ വേക്കന്സിയില്ല. ഇതെല്ലാം കളഞ്ഞ് കുളിച്ചത് രമേശ് ചെന്നിത്തലയാണ്. ചെന്നിത്തല കിട്ടിയ വകുപ്പ്കൊണ്ട് തൃപ്തിപ്പെട്ടിരുന്നെങ്കില് പലരും രക്ഷപ്പെട്ടേനേ. മന്ത്രിസഭ ഒരു മൊത്തത്തിലുള്ള പൊളിച്ചെഴുത്തായേനെ.
ഇതിലേറെ പ്രതീക്ഷ കെ. മുരളീധരനായിരുന്നു. പഴയ കെപിസിസി പ്രസിഡന്റിന്റെ ദയനീയത മലയാളികള് കണ്ടതാണ്. ഒരു മന്ത്രിയാകാന് നടന്ന് അവസാനം ഇല്ലം പോലും ചുടേണ്ടിവന്ന ഹതഭാഗ്യന്. ചെന്നിത്തലയും മന്ത്രിപ്പണിക്കു പുറപ്പെട്ട മുരളീധരന്റെ കാര്യം ഓര്ത്തോ എന്തോ.
അടുത്തയാള് ഹരിത എംഎല്എ എന്ന് ഭരണത്തിലെ എതിരാളികള് വിളിക്കുന്ന വി.ടി. സതീശനാണ്. ആദ്യം തന്നെ മന്ത്രിസ്ഥാനം കിട്ടേണ്ട ആളാണെന്ന് എല്ലാവരും ചേര്ന്ന് പുകഴ്ത്തി. പക്ഷേ സമയമായപ്പോള് സര്വ്വരും സഹതപിച്ചു. ഇപ്പോള് ഏറെ പ്രതീക്ഷയായിരുന്നു.
ചെന്നിത്തല മന്ത്രിയായാല് പിന്നെ ഒഴിവു വരുന്ന കെപിസിസി പ്രസിഡന്റ് സ്ഥാനത്തേക്ക് പറഞ്ഞ് കേട്ടത് ജി. കാര്ത്തികേയനും, മുല്ലപ്പള്ളി രാമചന്ദ്രനുമാണ്. ഇതിലേറ്റവും ത്രില്ലടിച്ചത് മുല്ലപ്പള്ളിയാണ്. പണ്ടേ കേരളത്തിലായിരുന്നു നോട്ടം. എല്ലാവരും ചേര്ന്ന് ഡല്ഹിയിലാക്കി. ഇതൊരു സുവര്ണാവസരമായി മുല്ലപ്പള്ളിയും കണ്ടു.
ഇതിനിടയ്ക്ക് ഉറങ്ങിക്കിടന്ന ഒരാളേയും എല്ലാവരും ചേര്ന്ന് വിളിച്ചുണര്ത്തി. പാവം തെന്നല ബാലകൃഷ്ണപിള്ള. എപ്പഴും അങ്ങനെയാണ്. മിണ്ടാതിരിക്കുന്ന പ്രസിഡന്റിനെ ആവശ്യമുള്ളപ്പോള് സമീപിക്കാന് പറ്റിയ ആളാണ്. യാതൊരു പരാതിയുമില്ലാതെ ഇറങ്ങിയും പോയോളും. പണ്ടൊരിക്കല് തെന്നല പോലുമറിയാതെ അദ്ദേഹത്തെ പുറത്താക്കിയപ്പോള് ആ മനസൊന്ന് നീറുന്നത് ചില കോണ്ഗ്രസുകാരെങ്കിലും കണ്ടു. എങ്കിലും പരാതിയൊന്നുമില്ല ഇപ്പഴും റെഡി.
ഇതിനിടയ്ക്ക് ചെന്നിത്തലയുടെ പ്രവേശനം കൊണ്ട് വേവലാതിപ്പെട്ടവരുമുണ്ട്. അവരില് പ്രധാനം ആഭ്യന്തരമന്ത്രി തിരുവഞ്ചൂര് രാധാകൃഷ്ണനാണ്. ഉറക്കത്തില് നിന്നും വിളിച്ചുണര്ത്തി കിട്ടിയ ആഭ്യന്തരം കൈവിട്ടു പോകുന്നതിന്റെ വേദന തിരുവഞ്ചൂര് മറച്ചുവച്ചതുമില്ല. പിന്നെ വന്നത് അടൂര് പ്രകാശ് അരുമയായി കൊണ്ടുനടക്കുന്ന റവന്യൂ ആണ്. പ്രകാശ് ഒന്നും മിണ്ടിയില്ലെങ്കിലും സമുദായ സ്നേഹം കൊണ്ട് വെളളാപ്പള്ളി വേണ്ടതു പറഞ്ഞു. ടൂറിസം വകുപ്പ് നോക്കിയിരുന്ന അനില്കുമാറും ഒന്നു വിരണ്ടു.
എന്നാല് ആരും ഇടപെട്ടില്ല, എ ഗ്രൂപ്പുകാര് മാത്രം സംസാരിച്ചു. അങ്ങനെ ഏതെങ്കിലും വകുപ്പ് വേണ്ടെന്നായി ചെന്നിത്തല. അതോടെ മന്ത്രിമോഹികളായ പലരുടേയും സ്വപ്നങ്ങള് മാത്രം ബാക്കിയായി.
https://www.facebook.com/Malayalivartha