ദുബായിലെ മുതലാളിയും തൃശൂരിലെ രാഷ്ടിയക്കാരുമെല്ലാം നിസാമിന്റെ പോക്കറ്റില്‍, രക്ഷിക്കുന്നത് ഇടത് വലത് എംഎല്‍എമാര്‍ ചേര്‍ന്നെന്ന് റിപ്പോര്‍ട്ട്
രാഷ്ടീയക്കാരന്ന് വെച്ചാല്‍ നല്ല വണ്ണം അഭിനയിക്കുന്നവരെന്ന് സോഷ്യല്‍ മീഡിയയില്‍ ഒരു പ്രചരണമുണ്ട്. മമ്മൂട്ടിയും മോഹന്‍ലാലിനെയുമെല്ലം കടത്തിവെട്ടുന്ന അഭിനയമാണ് ചില രാഷ്ടീയ നേതാക്കള്‍ നടത്തുന്നത്.
ചന്ദ്രബോസ് കൊലക്കേസിലെ പ്രതി മുഹമ്മദ് നിസാമിന് രാഷ്ടീയക്കാരുമായുള്ള ബന്ധങ്ങള്‍ക്ക് കൂടുതല്‍ തെളിവുകള്‍ പുറത്ത് വരുന്നു. എംഎല്‍എമാരായ വിഎസ് സുനില്‍കുമാറും, തറമ്പില്‍ രാമകൃഷ്ണന്‍, കെവി അബ്ദുള്‍ഖാദര്‍ തുടങ്ങിയവരെല്ലാം നിസാമിന്റെ അടുപ്പക്കാരായിരുന്നു എന്നതിന്റെ തെളിവുകളാണ് ഇപ്പോള്‍ പുറത്ത് വന്ന്‌കൊണ്ടിരിക്കുന്നത്.
നിസാമുമായി ഈ എംഎല്‍എമാര്‍ക്ക് അടുത്ത ബന്ധമാണുള്ളത്. നിസാമിന്റെ പല സ്ഥാപനങ്ങളുടെയും ഉദ്ഘാടനത്തിന് ഇവര്‍ അതിഥികളായി എത്താറുണ്ടായിരുന്നു. കൊലപാതകവും സ്ത്രീ പീഡനവും ഉള്‍പ്പെടെയുള്ള ഒട്ടേറെ കേസുകളില്‍ പ്രതിയാണ് നിസാമെന്നറിഞ്ഞ് കൊണ്ട് തന്നെയാണ് നിസാമിന്റെ സ്ഥാപനങ്ങളുടെ ഉദ്ഘാടനങ്ങളിലും നിസാം സംഘടിപ്പിക്കുന്ന പരിപാടികളിലും എംഎല്‍എമാരടക്കമുള്ള പ്രമുഖര്‍ എത്തുന്നത്.
നിസാമിന്റെ വില്ലാ പദ്ധതിയുടെ ഉദ്ഘാടനത്തിന് മലയാളി വ്യവസായി യൂസഫലിയും എത്തിയതും ശ്രദ്ധിക്കപ്പെട്ടിട്ടുണ്ട്. സംസ്ഥാന സര്‍ക്കാരിന് പോലും ചില പരിപാടികളില്‍ ഈ പ്രവാസി മലയാളിയെ പങ്കെടുപ്പിക്കാന്‍ കഴിയില്ല. അങ്ങനെയുള്ള യൂസഫലി പോലും കിങ് സ്‌പെയ്‌സിന്റെ വില്ലാ നിര്‍മ്മാണ ഉദ്ഘാടന ചടങ്ങില്‍ മുഖ്യാതിഥിയായിരുന്നു. കോണ്‍ഗ്രസ് നേതാവ് തേറമ്പില്‍ രാമകൃഷ്ണന്‍ അടക്കമുള്ള പ്രമുഖരും നിസാമിന്റെ പദ്ധതികള്‍ക്കായുള്ള പൊതു പരിപാടിയില്‍ സജീവമാണ്. സുനില്‍ കുമാറിനേയും അബ്ദുള്‍ ഖാദറിനേയും പോലുള്ള ഇടത് നേതാക്കളുടെ സാന്നിധ്യത്തിലൂടെ പദ്ധതികള്‍ക്കെതിരായ പാരിസ്ഥിതിക പ്രക്ഷോഭങ്ങള്‍ ഇല്ലാതാക്കുക എന്നതാണ് നിസാം ലക്ഷ്യമിടുന്നത്.
കേരളത്തിലെ എല്ലാ വിഷയങ്ങളിലും അഭിപ്രായം പറയുന്ന എംഎല്‍എയാണ് വിഎസ് സുനില്‍ കുമാര്‍. കഴിഞ്ഞ ദിവസം കൊല്ലപ്പെട്ട സെക്യൂരിറ്റി ജീവനക്കാരന്‍ ചന്ദ്രബോസിന്റെ വീട്ടില്‍ ആഭ്യന്തരമന്ത്രി രമേശ് ചെന്നിത്തലയെത്തിയപ്പോള്‍ സുനില്‍ കുമാര്‍ അദ്ദേഹത്തോടൊപ്പമുണ്ടായിരുന്നു. കൊച്ചിയിലെ ഡിഎല്‍എഫ് ഭൂമി ഇടപാടിലും പാറ്റൂരിലെ ഭൂമി കുംഭകോണത്തിലുമെല്ലാം സജീവമായിരുന്നു സുനില്‍ കുമാര്‍.
നിസാം തൃശൂരില്‍ പല സ്ഥലങ്ങളിലും ബില്‍ഡിംഗുകളും ഫഌറ്റുകളും പണിയുന്നുണ്ട്. ഇതില്‍ ഭൂരിഭാഗവും വയലുകള്‍ നികത്തിയും അനധികൃതമായുമാണെന്ന് ആക്ഷേപമുണ്ട്. എന്നാല്‍ ഇതിനെതിരെയൊന്നും എന്തിനും ഏതിനും സംസാരിക്കുന്ന സുനില്‍കുമാറും, അബ്ദുള്‍ ഖാദറും, തേറമ്പില്‍ രാമകൃഷ്ണനുമെല്ലം ഇതുവരെ രംഗത്ത് എത്തിയിട്ടില്ല. അറസ്റ്റിലായതിന് ശേഷം നിസാമിനെതിരെ ശബ്ദിക്കാനും ഈ നേതാക്കള്‍ക്ക് ഇതുവരെ ആയിട്ടില്ല. ഇവരെയെല്ലാം നിസാം തന്റെ പരിപാടികളില്‍ പങ്കെടുപ്പിക്കുന്നത് തനിക്കെകിരെ ശബ്ദിക്കാതിരിക്കാനാണെന്നും ആരോപണമുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
