ജനകീയ പ്രശ്നങ്ങള്ക്ക് ഉടനടി പരിഹാരം: മുഖ്യമന്ത്രി ഉമ്മന് ചാണ്ടി
ജനങ്ങളുടെ ആവശ്യങ്ങളും പരാതികളും ചുവപ്പുനാടയില് കുടുങ്ങാതെ ഉടന് പരിഹാരം കാണുകയാണു സര്ക്കാരിന്റെ ലക്ഷ്യമെന്നു മുഖ്യമന്ത്രി ഉമ്മന് ചാണ്ടി. റവന്യു അദാലത്ത് എറണാകുളം ജില്ലയില് ഉദ്ഘാടനം ചെയ്യുകയായിരുന്നു ഉമ്മന് ചാണ്ടി.
ജനങ്ങളുടെ പ്രശ്നങ്ങള് സമയബന്ധിമായി തീര്പ്പാക്കുന്നതിനു വേണ്ടിയാണു സേവന അവകാശനിയമങ്ങള്, ഓണ്ലൈന് പരാതി പരിഹാര സംവിധാനങ്ങള്, ഇ-ഡിസ്ട്രിക്ട് പദ്ധതികള് എന്നിവ നടപ്പാക്കിയതെന്നു മുഖ്യമന്ത്രി പറഞ്ഞു. നടപടി ക്രമങ്ങളില് പരമാവധി ലഘൂകരിച്ചുകൊണ്ടാണു ജനകീയ പ്രശ്നങ്ങള്ക്കു പരിഹാരം കാണുന്നതെന്നും അദ്ദേഹം പറഞ്ഞു. മന്ത്രിമാരായ അടൂര് പ്രകാശ്, കെ. ബാബു എന്നിവരും ജില്ലയിലെ എംഎല്എമാരും ചടങ്ങിനെത്തിയിരുന്നു.
കാക്കനാട് കളക്ടറേറ്റ് മൈതാനിയില് പ്രത്യേകം സജ്ജമാക്കിയ കൂറ്റന് പന്തലിലാണ് എറണാകുളം ജില്ലാതല അദാലത്ത്. പതിനാല് ജില്ലകളിലായി പൊതുജനങ്ങളുടെ അപേക്ഷ സ്വീകരിക്കുന്ന റവന്യൂ അദാലത്തില് ഒടുവിലത്തേതാണ് ഇന്നു ജില്ലയില് നടക്കുക. കഴിഞ്ഞ രണ്ടു മാസത്തോളമായി മറ്റു പതിമൂന്നു ജില്ലകളിലും അദാലത്തുകള് നടത്തി ലക്ഷക്കണക്കിന് പരാതികള്ക്കു തീര്പ്പുവരുത്തിയിരുന്നു.
വര്ഷങ്ങളായി തീര്പ്പുകല്പ്പിക്കപ്പെടാതെ കിടക്കുന്ന രൂക്ഷമായ ഭൂമി പ്രശ്നങ്ങള്ക്കുള്ള പരിഹാരം, ദുരിതാശ്വാസവിതരണം, പട്ടയവിതരണം തുടങ്ങി ജനക്ഷേമകരമായ പ്രവര്ത്തനങ്ങളാല് ശ്രദ്ധേയമായ അദാലത്തിലേയ്ക്ക് 28,000 അപേക്ഷകളാണു പരിഗണനയ്ക്കുള്ളത്. പോക്കുവരവ് സംബന്ധമായ അപേക്ഷകള്, പട്ടയത്തിനുള്ള അപേക്ഷകള്, സാമ്പത്തിക സഹായത്തിനുള്ള അപേക്ഷ തുടങ്ങിവയാണ് ഇവയില് ഭൂരിപക്ഷവും. പുതുതായി അപേക്ഷകള് നല്കുവാനുള്ള സംവിധാനവും അദാലത്ത് വേദിയില് ഒരുക്കിയിട്ടുണ്ട്
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha