പ്രധാനമന്ത്രി നരേന്ദ്രമോദിയുടെ കാരിക്കേച്ചര് വരച്ച അധ്യാപികയെ ദോഹയിലെ ഇന്ത്യന് സ്കൂളില്നിന്നും പിരിച്ചുവിട്ടു; താനല്ല കാരിക്കേച്ചര് വരച്ചതെന്ന് ആദ്ധ്യാപിക
തന്റെ ഫേസ്ബുക്ക് അക്കൗണ്ടില് മോദിയെ കളിയാക്കുന്ന തരത്തിലുള്ള കാരിക്കേച്ചര് അധ്യാപിക പോസ്റ്റു ചെയ്തുവെന്നു കാണിച്ചാണ് സ്കൂള് അധ്യാപികയ്ക്കെതിരേ നടപടി സ്വീകരിച്ചിരിക്കുന്നത്. ഖത്തര് എംഇഎസ് ഇന്ത്യന് സ്കൂള് അദ്ധ്യാപിക വി സി ബിജയെയാണ് പുറത്താക്കിയത്. ഒരു അധ്യാപിക കുട്ടികള്ക്ക് മാതൃകയാകണമെന്നും അവര് ഇത്തരത്തിലുള്ള കാര്യങ്ങള് ഫേസ്ബുക്കിലൂടെ പങ്കുവയ്ക്കാന് പാടില്ലെന്ന നിലപാടാണ് മാനേജ്മെന്റ് സ്വീകരിച്ചിരിക്കുന്നത്.
മോദിക്കെതിരായ പോസ്റ്റിനൊപ്പം സ്കൂളിന്റെ പേരും ലോഗോയും ഉപയോഗിച്ചതാണ് നടപടിയെടുക്കാന് കാരണമെന്നാണ് മാനേജ്മെന്റ് പറയുന്നത്. പോസ്റ്റ് ഫേസ്ബുക്കില് പ്രത്യക്ഷപ്പെട്ടതിനു പിന്നാലെ സ്കൂളിലേക്കു നിരവധി ഫോണ്കോളുകള് വന്നു. സമൂഹത്തിന് മാതൃകയാകേണ്ട അദ്ധ്യാപകര് ഇത്തരത്തിലുള്ള കാര്യങ്ങള് ചെയ്യുന്നത് ശരിയല്ലെന്നും മാനേജ്മെന്റ് പറയുന്നു.
ദോഹയിലെ സാംസ്കാരിക രംഗത്ത് സജീവമായി ഇടപെടുന്ന അദ്ധ്യാപിക ഒരാഴ്ച മുമ്പാണ് ഫേസ്ബുക് വാളില് മോദിയെ രൂക്ഷമായി വിമര്ശിക്കുന്ന പോസ്റ്റിട്ടത്. ഫേസ്ബുക് പോസ്റ്റ് ചൂണ്ടിക്കാട്ടി ഇന്ത്യന് എംബസിയില് പരാതി ലഭിക്കുകയും ചെയ്തു. ഇ മെയിലില് വന്ന പരാതി എംബസി, സ്കൂളിന് ഫോര്വേര്ഡ് ചെയ്യുകയായിരുന്നു. ഇതേതുടര്ന്നാണ് അദ്ധ്യാപികയെ സ്കൂള് മാനേജ്മെന്റ് അന്വേഷണ വിധേയമായി മൂന്ന് ദിവസത്തേക്ക് സസ്പെന്ഡ് ചെയ്തത്. തുടര്ന്ന് അദ്ധ്യാപികയെ ജോലിയില് തിരികെ കയറാന് മാനേജ്മെന്റ് അനുവദിക്കുകയും ചെയ്തു. എന്നാല് വ്യാപകമായ പ്രതിഷേധം ഉയര്ന്നതിനെ തുടര്ന്ന് ഇവരില് നിന്ന് നിര്ബന്ധിച്ചു രാജി എഴുതി വാങ്ങുകയായിരുന്നുവെന്നാണ് റിപ്പോര്ട്ട്.
എന്നാല് താനല്ല കാരിക്കേച്ചര് വരച്ചതെന്നും ഫേസ്ബുക്ക് വഴി ഇത് പ്രചരിപ്പിച്ചതെന്നും അധ്യാപിക പ്രതികരിച്ചു. നാട്ടില് നടക്കുന്ന കാര്യങ്ങളുടെ ശരിയായ ഒരു പ്രതികരണം എന്ന രീതിയില് മാത്രമാണ് താന് കാരിക്കേച്ചര് തന്റെ ഫേസ്ബുക്കില് പോസ്റ്റ് ചെയ്തത്. മറ്റു പലരും ഇത് നേരത്തെ തന്നെ ഷെയര് ചെയ്തിരുന്നുവെന്നും അധ്യാപിക ചില മാധ്യമങ്ങളോട് പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha