എതിരാളികള്ക്ക് അനാവശ്യ വിമര്ശനത്തിന് അവസരമൊരുക്കി; രാഹുല് ഗാന്ധിയെ വിമര്ശിച്ച് ശശി തരൂര്
കോണ്ഗ്രസ് ഉപാധ്യക്ഷന് രാഹുല് ഗാന്ധിയെ വിമര്ശിച്ച് ശശി തരൂര് എംപി രംഗത്ത്. പാര്ട്ടിയില് നിന്നും രാഹുല് ഗാന്ധി അവധിയെടുത്ത സമയം ഉചിതമായില്ലെന്നു തരൂര്. അദ്ദേഹം എതിരാളികള്ക്ക് അനാവശ്യ വിമര്ശനത്തിന് അവസരമൊരുക്കുകയും ചെയ്തെന്ന് തരൂര് കുറ്റപ്പെടുത്തി. പാര്ട്ടിയുടെ ഭാവിപരിപാടികളെക്കുറിച്ച് ചിന്തിക്കാനും തീരുമാനമെടുക്കാനുമായാണ് രാഹുല് രണ്ടാഴ്ച പാര്ട്ടിയില് നിന്നു അവധിയെടുത്തതെന്നാണ് റിപ്പോര്ട്ടുകള്.
എന്നാല് അവധിയെടുത്ത രാഹുല് എവിടെയാണെന്ന് ഇതുവരെ സൂചന ലഭിച്ചിട്ടില്ല. അതിനിടെ രാഹുല് ഉത്തരാഖണ്ഡിലാണെന്നു റിപ്പോര്ട്ടുകള് വന്നിരുന്നു. എന്നാല് കോണ്ഗ്രസ് തന്നെ ഇതു തള്ളി. നരേന്ദ്ര മോദി സര്ക്കാരിന്റെ ആദ്യ ബജറ്റ് സമ്മേളനം നടക്കുമ്പോള് രാഹുല് അവധിയെടുത്തതിനെതിരെ വലിയ വിമര്ശനമാണ് ഉയര്ന്നത്. ഇതിനു പിന്നാലെയാണ് തരൂരിന്റെ വിമര്ശനം.
ഏപ്രിലില് നടക്കാനിരിക്കുന്ന എഐസിസി സമ്മേളനത്തിനു മുന്നോടിയായി പാര്ട്ടിയെ ശക്തിപ്പെടുത്താനുള്ള മാര്ഗങ്ങള് ആലോചിക്കാനാണ് രാഹുല് അവധിയെടുത്തിരിക്കുന്നതെന്നാണ് അനൗദ്യോഗിക അറിയിപ്പ്. പാര്ട്ടിയില് പൊളിച്ചെഴുത്ത് വേണമെന്നും സോണിയാ ഗാന്ധിക്കു ചുറ്റുമുള്ള കുറെയധികം നേതാക്കളെ ഒഴിവാക്കണമെന്നും രാഹുല് ആവശ്യപ്പെട്ടതായും സൂചനയുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha