സിപിഎമ്മില് അടി തുടങ്ങി, പിണറായി മുഖ്യമന്ത്രിയെന്ന് ഇപി ജയരാജന്, യോഗ്യതയുള്ളവര് വേറെയുണ്ടെന്ന് വൈക്കം വിശ്വന്
പാര്ട്ടി സമ്മേളനവും കഴിഞ്ഞ് പുതിയ പാര്ട്ടി സെക്രട്ടറിയുമായി. പാര്ട്ടിയില് സ്ഥാനമാനങ്ങളെ ചൊല്ലി അടിയും തുടങ്ങി. വരുന്ന തിരഞ്ഞെടുപ്പില് പിണറായി തന്നെയാകും പാര്ട്ടിയുടെ മുഖ്യമന്ത്രി സ്ഥാനാര്ഥിയെന്ന് ഒരു പ്രമുഖ ചാനലിലൂടെ ഇപി ജയരാജന് പറഞ്ഞതിനെതിരെ സിപിഎമ്മിലെ മുതിര്ന്ന നേതാവും എല്ഡിഎഫ് കണ്വീനറുമായ വൈക്കം വിശ്വന് രംഗത്തെത്തി. പിണറായി വിജയനെ പാര്ട്ടി മുഖ്യമന്ത്രി സ്ഥാനാര്ഥിയാക്കാന് തീരുമാനിച്ചിട്ടില്ലെന്നും യോഗ്യയുള്ളവര് വേറെയുണ്ടന്നുമായിരുന്നു വൈക്കം വിശ്വന്റെ പ്രതികരണം. യോഗ്യയുള്ളവരുടെ കൂട്ടത്തില് പിണറായിയെ ഉള്പെടുത്താം എന്നതാകാം ഇപി ഉദ്ദേശിച്ചതെന്നും വൈക്കം വിശ്വന് മാധ്യമങ്ങളോട് പറഞ്ഞു. ഇതോടെ സിപിഎമ്മിലെ അടിത്തട്ടിലുള്ള പടലപ്പിണക്കങ്ങള് മറനീക്കി പുറത്തുവരുന്ന കാഴ്ചയാണ് നിവിലുള്ളത്. വരും ദിവസങ്ങളില് ഇത് കൂടുതല് വ്യക്തമാകുമെന്നാണ് സൂചന.
ആലപ്പുഴയില് നടന്ന സിപിഐ(എം) സംസ്ഥാന സമ്മേളനത്തോടെ പിണറായി വി എസ് ധ്രുവീകരണത്തിന്റെ അവസാനമായി. എന്നാല് പാര്ട്ടിയില് പുതിയ ധ്രുവീകരണത്തിന് സമ്മേളനത്തില് തുടക്കമിട്ടുവെന്നാണ് റിപ്പോര്ട്ട്. വിഎസ് പിണറായി മാറി കോടിയേരി പിണറായി എന്ന തലത്തിലേക്കാണ് കാര്യങ്ങള് പോകുന്നത്. വിഎസിനെ കൂട്ടുപിടിച്ചാണ് കോടിയേരിയുടെ നീക്കം. ഇത് മുന്കൂട്ടി കണ്ട് കൊണ്ടാണ് ഇപി ജയരാജനെയിറക്കി താന് തന്നെ പാര്ട്ടിയുടെ മുഖ്യമന്ത്രി സ്ഥാനാര്ഥിയെന്ന് വരുത്തിതീര്ക്കാന് പിണറായി ശ്രമിക്കുന്നത്. ഇപ്പോള് തന്നെ സംസ്ഥാന കമ്മിറ്റിയില് വിള്ളലുണ്ടായതായാണ് സൂചന. പിണറായിയുടെ നീക്കത്തെ ചെറുക്കാന് കോടിയേരിയും ശ്രമിച്ചു തുടങ്ങി. എന്തായാലും പിണറായിയുടെ മുഖ്യമന്ത്രി സ്ഥാനം അത്ര എളുപ്പമല്ല എന്നാണ് വിലയിരുത്തല്.
സംസ്ഥാന കമ്മിറ്റിയില് ബേബിയെ തഴഞ്ഞതിനെതിരേ ഒരു വിഭാഗം നേതാക്കള് അപ്പോള് തന്നെ പ്രതികരിച്ചു. ഇതിനെതിരെ ബേബിയും രംഗത്തെത്തിയിരുന്നു.മുതിര്ന്ന നേതാവും പിബി അംഗവുമായ എംഎ ബേബിയെ സംസ്ഥാന കമ്മിറ്റിയില് ഉള്പ്പെടുത്താത്തതില് കടുത്ത അമര്ഷമാണ് ബേബി പ്രകടപ്പിച്ചത്. എന്നാല് ഇത് കേന്ദ്ര നേതാക്കള് ഇടപെട്ട് തണുപ്പിച്ചെങ്കിലും പാര്ട്ടിയിലെ കണ്ണൂര് ലോബിക്കെതിരെ പാര്ട്ടിയില് നീക്കം ശക്തമായി. പിണറായിയും കോടിയേരിയും തമ്മില് നേരത്തെ തന്നെ മാനസികമായി അകല്ച്ചയുണ്ടെങ്കിലും ഇതുവരെ പ്രകടപ്പിച്ചിട്ടില്ല. മാത്രമല്ല സമ്മേളനത്തില് പിണറായിയുടെ നേതൃത്വത്തില് ഇപി ജയരാജനെ സെക്രട്ടറിയാക്കാന് നീക്കം നടത്തിയെങ്കിലും പിബി സമ്മതിച്ചില്ല. ഇപിയെ സെക്രട്ടറിയാക്കുന്നതില് എതിര്പ്പ് പ്രകടിപ്പിച്ച് രംഗത്തെത്തിയതില് പ്രധാനി വൈക്കം വിശ്വനായിരുന്നു. സമ്മേളനത്തില് ഇതിനെ ചൊല്ലി പിണറായിയും വൈക്കം വിശ്വനും തമ്മില് രൂക്ഷമായ വാദപ്രതിവാദങ്ങള് ഉണ്ടായി. തുടര്ന്നാണ് പിബി കോടിയേരിയെ സംസ്ഥാന സെക്രട്ടറിയാക്കിയത്. ഇത് പിണറായിയുടെ നേതൃത്വത്തിലുള്ള കണ്ണൂര്ലോബിയ്ക്ക് കടുത്ത തിരിച്ചടിയായി. ഇന്ന് നടക്കുന്ന സംസ്ഥാന കമ്മിറ്റിയില് ഇത് സംബന്ധിച്ചുള്ള കൂടുതല് ഭിന്നത ഉണ്ടാകുമെന്നുള്ള കാര്യം ഉറപ്പാണ്.
സിപിഎമ്മിലെ കണ്ണൂര് ലോബിയുടെ കൈയില് സിപിഐ(എം) അകപ്പെട്ടു പോകുന്നതില് പാര്ട്ടിയിലെ തെക്കുനിന്നുള്ള നേതാക്കള്ക്ക് അതൃപ്തിയുണ്ടെന്ന് വ്യക്തമാക്കുന്നതാണ് വൈക്കം വിശ്വന്റെ പ്രതികരണമെന്നാണ് ഒരുവിഭാഗം രാഷ്ട്രീയ നിരീക്ഷകര് വിലയിരുത്തുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha