ആര്ക്കും വേണ്ടാതെ ഒന്നര കോടി... ലാലിസം ഉണ്ടാക്കിയ മുറിവുണക്കാന് തിരിച്ചു നല്കിയ തുക എന്തു ചെയ്യണമെന്നറിയാതെ സര്ക്കാര്
ലാലിസം ഉണ്ടാക്കിയ മുറിവില് നിന്നും മോചനം നേടാന് കൈപ്പറ്റിയ 1 കോടി 60 ലക്ഷം രൂപ മടക്കി നല്കി മോഹന്ലാല് കൈകഴുകി. എന്നാല് ആ ചെക്കില് ഇതുവരേയും തീരുമാനം എടുത്തിട്ടില്ല. ചെക്കിന്റെ കാലാവധി കഴിയുന്നതോടെ ആ പണം വീണ്ടും മോഹന്ലാലിന് സ്വന്തം.
എന്തായാലും ദേശീയ ഗെയിംസ് സെക്രട്ടറിയേറ്റിന് ലാല് അയച്ചു കൊടുത്ത ചെക്കില് ഇനിയും തീരുമാനമായിട്ടില്ല. അത് തിരിച്ചു കൊടുക്കണോ ബാങ്കില് കൊടുക്കണോ അതോ ഏതെങ്കിലും സംഘടനയ്ക്ക് കൈമാറണമോ എന്ന് അറിയാത്ത അവസ്ഥയിലാണ് ദേശീയ ഗെയിംസ് സെക്രട്ടറിയേറ്റിലെ ഉദ്യോഗസ്ഥര്. സ്പോര്ട്സ് മന്ത്രി തിരുവഞ്ചൂര് രാധാകൃഷ്ണന് ഉറച്ച നിലപാടെടുക്കാത്തതാണ് ചെക്ക് അനാഥമാകാന് കാരണം.
ദേശീയ ഗെയിംസ് ഉദ്ഘാടന ചടങ്ങിലെ ലാലിസത്തിന്റെ നിലവാരക്കുറവായിരുന്നു വിവാദങ്ങള്ക്ക് തുടക്കമിട്ടത്. സോഷ്യല് മീഡിയയും മറ്റ് മാദ്ധ്യമങ്ങളും ലാലിസത്തിന് രണ്ട് കോടി രൂപ പ്രതിഫലം കൊടുത്തതിനെതിരെ തിരിഞ്ഞു. ഇതിനിടെയാണ് ഉദ്ഘാടന ചടങ്ങിലെ ലാലിസം പൊളിഞ്ഞത്. ഇതോടെ മോഹന്ലാല്, താന് വാങ്ങിയ തുക സര്ക്കാരിന് തിരികെ നല്കി. സ്പീഡ് പോസ്റ്റ് വഴി ചെക്ക് സിഇഒക്ക് അയച്ച് കൊടുക്കുകയായിരുന്നു.
1 കോടി 60 ലക്ഷം രൂപയാണ് തിരിച്ചു നല്കിയത്. ഇതോടെ സര്ക്കാര് വെട്ടിലായി. പണം തിരിച്ചുവാങ്ങുന്നത് സര്ക്കാരിന്റെ അന്തസ്സിന് ചേര്ന്നതല്ലെന്ന് മന്ത്രിസഭ യോഗം വിലയിരുത്തി. തുടര്ന്ന് മോഹന്ലാലിനെ നേരിട്ട് കണ്ട് മുഖ്യമന്ത്രി ഉമ്മന് ചാണ്ടിയും തിരുവഞ്ചൂര് രാധാകൃഷ്ണനും ചര്ച്ച നടത്തി. എന്നാല് വിട്ടുവീഴ്ചയ്ക്ക് ലാല് തയ്യാറായില്ല. ചെക്ക് തിരിച്ചു വാങ്ങില്ലെന്ന് വ്യക്തമാക്കി. ഇതോടെ ലാലിന് ചെക്ക് തിരികെ അയയ്ക്കുമെന്ന മന്ത്രിസഭാ യോഗ തീരുമാനം മുഖ്യമന്ത്രി വിഴുങ്ങി. ലാലിന്റെ നിര്ദ്ദേശം അനുസരിച്ച് പ്രവര്ത്തിക്കുമെന്നും പറഞ്ഞു. എന്നാല് ദേശീയ ഗെയിംസിന്റെ സമാപന ചടങ്ങോടെ കായിക മന്ത്രിയും ഗെയിംസ് സെക്രട്ടറിയേറ്റും തമ്മില് ഭിന്നത രൂക്ഷമായി. മന്ത്രിമാര്ക്ക് സീറ്റ് അനുവദിക്കാത്തതില് വന്ന പിഴവുയര്ത്തി പ്രധാന വേദി പോലും ബഹിഷ്കരിച്ച തിരുവഞ്ചൂര് ഗെയിംസ് സംഘാടക സമിതിയുമായി പൂര്ണ്ണമായും തെറ്റി. ഇതോടെയാണ് ലാലിന്റെ ചെക്ക് വഴിയാധാരമായത്. മാര്ച്ച് 31 വരെ ദേശീയ സെക്രട്ടറിയേറ്റ് പ്രവര്ത്തിക്കും. അതിന് ശേഷം ഈ ചെക്ക് എന്തുചെയ്യണമെന്ന് അറിയാത്ത അവസ്ഥയിലാണ് ഉദ്യോഗസ്ഥര്.
എന്നാല് തീയതി കഴിഞ്ഞ് ആറുമാസമായാല് പിന്നെ അത് കാശാക്കി മാറ്റാന് കഴിയില്ല. സ്വാഭാവികമായും ലാലിന് തുക നഷ്ടമാകത്തുമില്ല. ഇതിനൊപ്പം ഏതെങ്കിലും സാമൂഹിക സേവന സംഘടനയ്ക്ക് തുക നല്കാനാണ് ലാലിന്റെ പദ്ധതിയെന്നും സൂചനയുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha