ബലാത്സംഗം നടത്തിയപ്പോള് എതിര്ത്തതു കൊണ്ടാണ് കൊല്ലേണ്ടി വന്നത്; അവള് മിണ്ടാതെ അത് അനുവദിക്കണമായിരുന്നു... ഈ ക്രൂര വാക്കുകള് ഡല്ഹി പെണ്കുട്ടിയെ പിച്ചി ചീന്തിയ ആളുടേത്
രാജ്യത്തെ നടുക്കിയ ഡല്ഹി കൂട്ടമാനഭംഗ കേസിലെ പ്രതികളിലൊരാള്, ക്രൂരതയ്ക്ക് ഇരയായി മരിച്ച പെണ്കുട്ടിയെ കുറ്റപ്പെടുത്തി രംഗത്ത്. രാത്രിയില് തനിച്ച് പുറത്തു പോയ പെണ്കുട്ടിയാണ് കുറ്റക്കാരിയെന്ന് കേസിലെ പ്രതികളിലൊരാളായ മുകേഷ് സിംഗ് പറഞ്ഞു. ലോക വനിതാദിനമായ മാര്ച്ച് എട്ടിന് ബി.ബി.സി വാര്ത്താ ചാനല് സംപ്രേഷണം ചെയ്യാനിരിക്കുന്ന ഡോക്യുമെന്ററിക്കായി നല്കിയ അഭിമുഖത്തിലാണ് പെണ്കുട്ടിയെ അപമാനിക്കുന്ന തരത്തില് മുകേഷ് പരാമര്ശം നടത്തിയത്.
ബലാത്സംഗത്തില് പുരുഷനെക്കാള് ഉത്തരവാദി സ്ത്രീയാണ്. ബലാത്സംഗം നടത്തിയപ്പോള് എതിര്ത്തതു കൊണ്ടാണ് അവളെ കൊല്ലേണ്ടി വന്നത്. അവള് മിണ്ടാതെ അത് അനുവദിക്കണമായിരുന്നു. ഒരു കൈയടിച്ചാല് ശബ്ദം കേള്ക്കുമോ? മാന്യയായ ഒരു പെണ്ണ് രാത്രി ഒമ്പത് മണിക്ക് പുറത്തിറങ്ങി നടക്കില്ല. ആണും പെണ്ണും തുല്യരല്ല. പെണ്ണുങ്ങള്ക്ക് പറഞ്ഞിട്ടുള്ളത് വീട്ടു ജോലിയാണ്. അല്ലാതെ മോശം വസ്ത്രം ധരിച്ച് രാത്രി ഡിസ്കോയ്ക്ക് പോകലല്ല. ആകെ 20 ശതമാനം പെണ്ണുങ്ങളേ കാണൂ നല്ലവര് മുകേഷ് പറഞ്ഞു.
2012 ഡിസംബര് 16നാണ് ഇന്ത്യയെ ഒന്നാകെ പിടിച്ചുലച്ച ഡല്ഹി കൂട്ടമാനഭംഗം നടന്നത്. തെക്കന് ഡല്ഹിയിലെ മുനിര്കയില് ഓടിക്കൊണ്ടിരുന്ന ബസില് വച്ച് പാരാമെഡിക്കല് വിദ്യാര്ത്ഥിനിയെ ആറു പേര് ചേര്ന്ന് കൂട്ടമാനഭംഗം ചെയ്യുകയായിരുന്നു. ജീവനു വേണ്ടി മല്ലിട്ട പെണ്കുട്ടി 13 ദിവസത്തിന് ശേഷം സിംഗപ്പൂരിലെ ആശുപത്രിയില് വച്ച് മരണമടയുകയായിരുന്നു. കേസിലെ പ്രതികളായ രാംസിംഗ്, മുകേഷ് സിംഗ്, വിനയ് ശര്മ, പവന് ഗുപ്ത, അക്ഷയ് താക്കൂര് എന്നിവര്ക്ക് കോടതി വധശിക്ഷ വിധിച്ചു. പ്രായപൂര്ത്തിയാവാത്ത ഒരു പ്രതിയെ ജുവനൈല് ജസ്റ്റിസ് നിയമപ്രകാരം മൂന്നു വര്ഷം ദുര്ഗുണ പരിഹാര പാഠശാലയില് അയയ്ക്കുകയായിരുന്നു.
പീഡന കേസിലെ പ്രതികളെ തൂക്കിലേറ്റുന്നത് പീഡനത്തിരയാവുന്ന പെണ്കുട്ടികളുടെ ജീവന് ഭാവിയില് കൂടതല് അപകടത്തിലാക്കുമെന്ന വിചിത്ര വാദവും മുകേഷ് മുന്നോട്ട് വച്ചു. പ്രതികള്ക്കു വേണ്ടി ഹാജരായ അഭിഭാഷകരും സമാനമായ ചിന്താഗതിയാണ് പങ്കുവച്ചത്. എന്റെ മകളോ സഹോദരിയോ വിവാഹത്തിന് മുന്പ് ഇത്തരത്തിലുള്ള ബന്ധങ്ങളുമായി നടന്നാല് അവളെം ഞാന് ഫാം ഹൗസില് കൊണ്ടുപോയി മുഴുവന് കുടുംബാംഗങ്ങളുടേയും മുന്നില് വച്ച് പെട്രോളൊഴിച്ച് കത്തിക്കുമെന്നായിരുന്നു അഭിഭാഷകരിലൊരാളായ എ.പി.സിംഗ് പറഞ്ഞത്.
പ്രതികള്ക്ക് വിചാരണക്കോടതി വധശിക്ഷ വിധിച്ചത് ഡല്ഹി ഹൈക്കോടതി പിന്നീട് ശരിവച്ചിരുന്നു. വിചാരണയ്ക്കിടെ രാംസിംഗ് എന്ന പ്രതി ജയിലില് തൂങ്ങി മരിച്ചു. മറ്റുള്ള നാലു പ്രതികള് ഹൈക്കോടതി വിധിക്കെതിരെ സുപ്രീംകോടതിയില് അപ്പീല് സമര്പ്പിച്ചതിനാല് ശിക്ഷ നടപ്പാക്കുന്നത് താല്ക്കാലികമായി സ്റ്റേ ചെയ്തിരിക്കുകയാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha