വ്രതാനുഷ്ഠാനങ്ങളോടെ ഭക്തജനങ്ങള് ആറ്റുകാലമ്മയുടെ സന്നിധിയിലേക്ക്
ഒരു വര്ഷത്തെ പ്രാര്ത്ഥനാനിര്ഭരമായ കാത്തിരിപ്പ് സാഫല്യത്തിലേക്ക്. കുംഭമാസത്തില് പൂരം നാളും പൗര്ണമിയും ഒന്നിക്കുന്ന നാളെ ആറ്റുകാലമ്മയ്ക്ക് ലക്ഷക്കണക്കിന് ഭക്തജനങ്ങള് പൊങ്കാല സമര്പ്പിക്കും. ആ പുണ്യ മുഹൂര്ത്തത്തിനു മണിക്കൂറുകള് ശേഷിക്കെ, മുക്കോടു മുക്കു ചേര്ത്ത അടുപ്പുകളാല് ക്ഷേത്ര പരിസരം നിറഞ്ഞു. സമീപവീഥികളിലേക്കും ആ കൈവഴികള് നീളുകയാണ്. പൊങ്കാലയ്ക്കു വേണ്ട ഒരുക്കങ്ങള് പൂര്ത്തിയായി കഴിഞ്ഞു.
നാളെ തോറ്റംപാട്ടില് കണ്ണകീ ചരിതത്തില് പാണ്ഡ്യരാജാവിന്റെ വധം പാടിക്കഴിയുമ്പോള് തന്ത്രി ചേന്നാസ് ദിനേശന് നമ്പൂതിരിപ്പാട് ആറ്റുകാല് ക്ഷേത്ര ശ്രീകോവിലില്നിന്നു ദീപം പകര്ന്നു മേല്ശാന്തി കണ്ണന് പോറ്റിക്കു കൈമാറും. രാവിലെ 10.15നാണ് അടുപ്പുവെട്ട്. ക്ഷേത്ര തിടപ്പള്ളിയിലെ പൊങ്കാല അടുപ്പില് കത്തിച്ചശേഷം അതേ ദീപമാണു ക്ഷേത്രത്തിനു മുന്വശത്ത് ഒരുക്കിയ പണ്ടാര അടുപ്പിലേക്കു പകരുക. ഉടന് ചെണ്ടമേളവും വായ്ക്കുരവയും മുഴങ്ങും. പിറകെ വെടിക്കെട്ടും. പണ്ടാരയടുപ്പില് നിന്നു കൈമാറുന്ന ദീപനാളം തുടര്ന്നു ലക്ഷോപലക്ഷം അടുപ്പുകളെ ജ്വലിപ്പിക്കും. ഹൃദയം നിറഞ്ഞ പ്രാര്ഥനകളോടെ, മംഗള വായ്ക്കുരവയോടെ ഓരോരുത്തരും തങ്ങളുടെ അടുപ്പുകളിലേക്കു തീ പകരും.
വിവിധ പൊങ്കാല ദ്രവ്യങ്ങള് പാകമായാല് അടുത്ത പുണ്യമുഹൂര്ത്തത്തിനായുള്ള കാത്തിരിപ്പായി. വൈകിട്ടു 3.15നാണു നൈവേദ്യം. തീര്ഥം പകരാന് എല്ലായിടത്തും ശാന്തിക്കാരെത്തും. വിമാനത്തില് പുഷ്പവൃഷ്ടിയുമുണ്ടാകും. സങ്കടങ്ങള് എരിഞ്ഞടങ്ങിയ മനസ്സില് അമ്മയ്ക്കു പൊങ്കാലയര്പ്പിച്ചതിന്റെ ചാരിതാര്ഥ്യവും സംതൃപ്തിയുമായി പിന്നീടു ഭക്തരുടെ മടക്കയാത്ര. ഭക്തരുടെ സൗകര്യാര്ഥം റയില്വേയും കെഎസ്ആര്ടിസിയും പ്രത്യേക സര്വീസുകള് നടത്തും.
രാത്രി 10.30നാണു ക്ഷേത്രത്തില് പുറത്തെഴുന്നള്ളത്ത്. ഏഴു ദിനരാത്രങ്ങളായി വ്രതമനുഷ്ഠിച്ചു കഴിയുന്ന ബാലന്മാരെ അണിയിച്ചൊരുക്കി ദേവിയുടെ തിരുമുന്നില് ചൂരല് കുത്തിയ ശേഷമാണു പുറത്തെഴുന്നള്ളത്തില് പങ്കെടുപ്പിക്കുക. പിറ്റേന്നു രാത്രി ദേവിക്കു കാപ്പഴിച്ചു കുരുതി തര്പ്പണത്തോടെ ഉല്സവത്തിനു സമാപനമാകും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha