പോകുന്നത് ആഡംബര കാറുകളില്, ജോലി മോഷണം: ആഡംബര കാറുകളില് മാത്രം ചുറ്റി കറങ്ങി മോഷണം നടത്തുന്ന സംഘം പിടിയില്
മോഷ്ടാക്കള് പല തരത്തിലുണ്ട്. പല രീതിയിലുമുണ്ട്. എന്നാല്, ആഡംബര കാറുകളില് മാത്രം ചുറ്റി കറങ്ങി മോഷണം നടത്തുന്ന ഒരു സംഘമുണ്ട്. വാടകയ്ക്കെടുത്ത ആഡംബര കാറുകളിലാണ് ഈ സംഘത്തിന്റെ ചുറ്റികറങ്ങലും മോഷ്ണവും. പകല് സമയങ്ങളില് വീടുകള് കുത്തിത്തുറന്ന് മോഷണം നടത്തുന്ന വന് അന്തര് ജില്ലാ മോഷണസംഘത്തില്പ്പെട്ട മൂന്നു പേരാണ് പോലീസിന്റെ വലയിലായിരിക്കുന്നത്. പോലീസ് ഉദ്യോഗസ്ഥരെ ആക്രമിക്കാന് ശ്രമിച്ചവരാണ് ഈ മൂന്ന് പേരുമെന്നും പോലീസ് പറയുന്നു. തിരുവനന്തപുരം നേമം കാരയ്ക്കാമണ്ഡപം ഫര്ഹാന് വില്ലയില് നവാസ് (42), വട്ടിയൂര്കാവ് കൊടുങ്ങാനൂര് കടയില് മുടുമ്പ് പഴവിളാകത്ത് വീട്ടില് രാജേഷ് (കൊപ്ര ബിജു- 34), കൊല്ലം കിളികൊല്ലൂര് അനുഗ്രഹ നഗര് 180ല് നെടിയവിളാകത്തു കല്ലുംപുറത്തു വീട്ടില് സമീര് (37) എന്നിവരാണു ഇപ്പോള് പിടിയിലായിരിക്കുന്നത്. എന്നാല് ഈ കൂട്ടത്തിലെ മറ്റൊരാള പിടികൂടാനുള്ള നെട്ടോടത്തിലാണ് പോലീസുകാര്.
റൂറല് എസ്പി എസ്. ശശികുമാറിനു ലഭിച്ച വിവരത്തെ തുടര്ന്ന് ആന്റി തെഫ്റ്റ് സ്ക്വാഡ് സാഹസികമായി നടത്തിയ നീക്കത്തിലാണ് പ്രതികളെ പിടികൂടിയത്. കൊല്ലം, കോട്ടയം, പത്തനംതിട്ട ജില്ലകളിലായി അടുത്തിടെ 30 ലക്ഷത്തോളം രൂപയുടെ മോഷണം നടത്തിയതായും പ്രതികള് സമ്മതിച്ചിരിക്കുകയാണ് ഇപ്പോള്. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു. ജില്ലയുടെ കിഴക്കന് ഭാഗങ്ങളില് അടുത്തിടെ നടന്ന മോഷണങ്ങളെല്ലാം ഇവര് നടത്തിയതാണെന്നു വ്യക്തമായിട്ടുണ്ട്. ഈ മോഷണസംഘത്തില് നിന്നും 25 ലക്ഷത്തോളം രൂപയുടെ മോഷണസാമഗ്രികള് കണ്ടെത്തി. മോഷണക്കേസുകളില് ജയിലില് കഴിഞ്ഞ ഇവര് അഞ്ചുമാസം മുന്പ് മോചിതരായി.
കൂടുതല് മോഷണങ്ങള് ഇവര് നടത്തിയതായി ലഭിച്ച സൂചനകളെ തുടര്ന്നു പൊലീസ് കസ്റ്റഡിയില് വാങ്ങാനാണു ശ്രമം. പൂയപ്പള്ളി, ചാത്തന്നൂര്, പാരിപ്പള്ളി, കോട്ടയം, ചിങ്ങവനം, പത്തനംതിട്ട, കൂടല്, പന്തളം, അടൂര് എന്നിവിടങ്ങളില് വീടുകള് കുത്തിപ്പൊളിച്ച് മോഷണങ്ങള് നടത്തിയതു ഇവരാണെന്ന് പോലീസിന് വ്യക്തമായി. ഡയമണ്ട്, സ്വര്ണാഭരണങ്ങള്, ക്യാമറകള്, ഗൃഹോപകരണങ്ങള്, പണം എന്നിവയും ഇവര് കവര്ന്നിട്ടുണ്ടെന്ന് വ്യക്തമായി. നിലവില് അറുപതോളം കേസുകളില് പ്രതികളാണു സംഘത്തിലുള്ളവര്. മോഷണത്തിനായി കാറില് സംഘാംഗങ്ങള് ജില്ലയിലെത്തിയതായി പൊലീസിനു ലഭിച്ച രഹസ്യവിവരത്തെ തുടര്ന്നു സ്ക്വാഡിലുള്ള അംഗങ്ങള് പല സംഘങ്ങളായി തിരിഞ്ഞ് പരിശോധന നടത്തുകയായിരുന്നു.
കാറിനെ പിന്തുടര്ന്നു നീങ്ങിയ പൊലീസ് വാഹനത്തെ ഇടിച്ചു തെറിപ്പിച്ചു മോഷണ സംഘം നീങ്ങുകയായിരുന്നു. പൊലീസ് പിന്തുടര്ന്നു പിടികൂടുകയായിരുന്നു. ഹൈഡ്രോളിക് കട്ടര്, കമ്പിപ്പാരകള്, കത്തി, കയ്യുറകള് എന്നീ സാധനങ്ങള് എപ്പോഴും ഇവരുടെ പക്കല് ഉണ്ടാകുമെന്നും പോലീസ് പറയുന്നു. മോഷണത്തിനായി ഈ സംഘം പ്രധാനമായി ഉപയോഗിക്കുന്നത് ആഡംബര കാറുകളാണെന്നാണ് പോലീസ് പറയുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha