ഫോണ്‍ ചോര്‍ത്തല്‍ വിവാദം കൊഴുക്കുന്നു: ചെന്നിത്തലയുടെ ഫോണും തിരുവഞ്ചൂര്‍ ചോര്‍ത്തിയതായി സുകുമാരന്‍ നായര്‍
രമേശ്‌ ചെന്നിത്തലയുടെ ഫോണും ചോര്‍ത്തിയതായി എന്‍.എസ്‌.എസ്‌ ജനറല്‍ സെക്രട്ടറി സുകുമാരന്‍ നായര്‍. ഇക്കാര്യം തന്നോട്‌ പറഞ്ഞത്‌ രമേശ്‌ ചെന്നിത്തല തന്നെയാണെന്നും സുകുമാരന്‍ നായര്‍ വ്യക്തമാക്കി. എന്‍.എസ്‌.എസിനെ വഞ്ചിച്ച കോണ്‍ഗ്രസുകാരുമായി ഇനി ചര്‍ച്ചക്കില്ലെന്നും പെരുന്നയില്‍ നടന്ന നേതൃയോഗത്തിനുശേഷം അദ്ദേഹം മാധ്യമ പ്രവര്‍ത്തകരോട്‌ പറഞ്ഞു.
ഇപ്പോഴത്തെ പ്രശ്‌നങ്ങള്‍ വഷളാക്കിയത് മുഖ്യമന്ത്രി ഉമ്മന്‍ ചാണ്ടിയാണ്. ഉമ്മന്‍ ചാണ്ടി വിചാരിച്ചാല്‍ അഞ്ച് മിനിറ്റ് കൊണ്ട് പരിഹരിക്കാവുന്ന പ്രശ്‌നങ്ങളേ ഉള്ളൂ. കേരളത്തില്‍ ന്യൂനപക്ഷമാണ് ഭരണം കൈയാളുന്നത്. ഭൂരിപക്ഷത്തെ കണ്ടില്ലാ എന്നു നടിക്കുന്നതും ചവിട്ടി തേക്കുന്നതും ജനാധിപത്യ സംവിധാനത്തിന് ചേര്‍ന്നതല്ലെന്നും സുകുമാരന്‍ നായര്‍ പറഞ്ഞു
തന്റെ ഫോണ്‍ ഔദ്യോഗികമായി ചോര്‍ത്തിയില്ലെന്നാണ്‌ പോലീസ്‌ പറയുന്നത്‌. എന്നാല്‍ ഇതിന്‌ അന്വേഷണം ആവശ്യമില്ല. ഫോണ്‍ അനൗദ്യോഗികമായി ചോര്‍ത്തിയെന്നാണ്‌ താന്‍ പരാതിപ്പെട്ടതെന്നും അദ്ദേഹം പറഞ്ഞു.
ആഭ്യന്തരവകുപ്പ്‌ തന്റെ ഫോണ്‍ ചോര്‍ത്തുന്നുവെന്ന സുകുമാരന്‍ നായരുടെ ആരോപണത്തെ തുടര്‍ന്നാണ്‌ വകുപ്പ്‌ മന്ത്രി തിരുവഞ്ചൂര്‍ രാധാകൃഷ്‌ണന്‍ അന്വേഷണത്തിന്‌ ഉത്തരവിട്ടത്‌. സുകുമാരന്‍ നായരുടെ ഫോണ്‍ ചോര്‍ത്തിയിട്ടില്ലെന്നാണ്‌ പ്രാഥമിക അന്വേഷണ റിപ്പോര്‍ട്ടില്‍ വ്യക്തമാക്കിയിരിക്കുന്നത്‌. ആവശ്യമെങ്കില്‍ കൂടുതല്‍ അന്വേഷണം നടത്താമെന്നും റിപ്പോര്‍ട്ടില്‍ പറയുന്നു.
https://www.facebook.com/Malayalivartha
