സ്വന്തം തീരുമാനവുമായി മുന്നോട്ട് പോകുന്ന രമേശ് ചെന്നിത്തലെയെ ഒതുക്കാനുള്ള മുഖ്യമന്ത്രിയുടെ തന്ത്രം ഫലിച്ചു, ഡിജിപിക്കെതിരെയുള്ള തെളിവുകള് പിസി ജോര്ജ് മുഖ്യമന്ത്രിക്ക് കൈമാറി
സ്വന്തം നിലപാടുമായി മന്ത്രിസഭയില് സൂപ്പര് മുഖ്യമന്ത്രി ചമയുന്ന രമേശ് ചെന്നിത്തലയെ പിസി ജോര്ജിനെ ഉപയോഗിച്ച് ഒതുക്കനുള്ള ശ്രമത്തില് വിജയിച്ചു. ചന്ദ്രബോസ് കൊലക്കേസ് പ്രതി നിസാമിനെ രക്ഷിക്കാന് ഡിജിപി കെ എസ് ബാലസുബ്രഹ്മണ്യം ഇടപെട്ടതായി വ്യക്തമാക്കുന്ന ശബ്ദരേഖ അടങ്ങിയ സിഡി മുഖ്യമന്ത്രി ഉമ്മന് ചാണ്ടിക്ക് വ്യാഴാഴ്ച രാത്രി സര്ക്കാര് ചീഫ് വിപ്പ് പി സി ജോര്ജ് കൈമാറി. കഴിഞ്ഞ ദിവസം വാര്ത്താ സമ്മേളനത്തില് രമേശ് ചെന്നിത്തല ഡിജിപിയെ സര്ക്കാരിന് പൂര്ണ വിശ്വാസമാണെന്നും പിസി ജോര്ജ്ജ് തെളിവു തന്നാല് അത് പരിശോധിക്കുമെന്നും പറഞ്ഞിരുന്നു. ഇതിനെ മറികടന്നാണ് പിസി ജോര്ജ് മുഖ്യമന്ത്രിക്ക് തെളിവ് നല്കിയത്. ഇത് രമേശിന് കടുത്ത തിരിച്ചടിയായാണ് വിലയിരുത്തപ്പെടുന്നത്.
പരാതിയെക്കുറിച്ച് മുഖ്യമന്ത്രിയോട് വിശദമായി സംസാരിച്ചുവെന്നും തെളിവുകള് മുഖ്യമന്ത്രിക്ക് കൈമാറിയെന്നും പി സി ജോര്ജ് പറഞ്ഞു. ഇന്ന് ആഭ്യന്തരമന്ത്രി രമേശ് ചെന്നിത്തലയെ കാണുമെന്നും പി സി ജോര്ജ്ജ് പറഞ്ഞു.നിസാമിന്റെ ഭാര്യയെയും പ്രതിചേര്ക്കണമെന്നും പ്രതികള് ശിക്ഷിക്കപ്പെടാനായി ഏതറ്റം വരെയും പോകും. ആഭ്യന്തരമന്ത്രി ഡിജിപിയെ ന്യായീകരിക്കാന് ശ്രമിക്കുന്നത് എന്തിനാണെന്ന് അറിയില്ലെന്നും പിസി ജോര്ജ് പറഞ്ഞു.
ചന്ദ്രബോസ് കൊലക്കേസില് സ്പെഷല് പ്രോസിക്യൂട്ടറെ നിയമിക്കുന്നതിന് സര്ക്കാര് അലംഭാവം കാട്ടുന്നതായും ആക്ഷേപമുണ്ട്. മന്ത്രി രമേശ് ചെന്നിത്തല ചന്ദ്രബോസിന്റെ വീട്ടിലെത്തിയാണ് വീട്ടുകാര് ആവശ്യപ്പെടുന്ന അഭിഭാഷകനെ സ്പെഷല് പ്രോസിക്യൂട്ടറായി നിയമിക്കുമെന്ന് കുടുംബാംഗങ്ങളെ അറിയിച്ചത്. ഇതേത്തുടര്ന്ന് കുടുംബം ഹൈക്കോടതി അഭിഭാഷകന് ഉദയഭാനുവിനെ സ്പെഷല് പ്രോസിക്യൂട്ടറായി നിയമിക്കണമെന്നു കാണിച്ച് ആഭ്യന്തര മന്ത്രിക്ക് ഇ മെയില് സന്ദേശം അയച്ചിരുന്നു. എന്നാല് തീരുമാനമൊന്നുമായില്ല. ഇതിന് പിന്നിലും കള്ളക്കളിയുണ്ടെന്നാണ് ആക്ഷേപം.
കുറ്റപത്രം സമര്പ്പിക്കല്, കാപ്പ ചുമത്തല്, തെളിവുകള് ശേഖരിക്കല്, പ്രോസിക്യൂട്ടറെ കണ്ടെത്തല് തുടങ്ങി മര്മ്മപ്രധാന ജോലികള് അവശേഷിക്കുമ്പോഴാണ് കേസ് വിവാദത്തില് മുങ്ങുന്നത്. മാര്ച്ച് 15നുള്ളില് കുറ്റപത്രം സമര്പ്പിക്കണമെന്നാണ് ഡി.ജി.പി. നിര്ദ്ദേശം നല്കിയിരുന്നത്. ഇതു നീണ്ടുപോയാല് നിസാമിന് സ്വാഭാവിക ജാമ്യം ലഭിക്കുന്ന സ്ഥിതിവരും. ജനവരി 29ന് നടന്ന സംഭവത്തില് 90 ദിവസത്തിനുള്ളില് കുറ്റപത്രം സമര്പ്പിക്കേണ്ടതുണ്ട്. പ്രതിക്കെതിരെ കാപ്പ ചുമത്താനുള്ള നീക്കങ്ങളും അവസാനഘട്ടത്തിലാണ്. പ്രോസിക്യൂട്ടറുടെ കാര്യത്തിലും തീരുമാനമായിട്ടില്ല. ഇനി കേസ് പരിഗണനയ്ക്കു വരുമ്പോള് ഏതുവിധത്തിലും നിസാമിന് ജാമ്യം നേടാനുള്ള ശ്രമങ്ങളും ശക്തമാകും. ഇതിനെല്ലാം പിന്നില് ഒത്തുകളിയുണ്ടെന്നാണ് സൂചന.
അതിനിടെ ചന്ദ്രബോസ് കൊലക്കേസുമായി ബന്ധപ്പെട്ട പൊലീസ് അന്വേഷണത്തിലെ വീഴ്ച വിവാദമായ സാഹചര്യത്തില് സിറ്റി പൊലീസ് കമ്മിഷണറുടെ നേതൃത്വത്തില് വിശകലനയോഗം ചേര്ന്നു. അന്വേഷണസംഘത്തിന്റെ പ്രവര്ത്തനം ചര്ച്ചാവിഷയമായി. പൊലീസുമായി ബന്ധപ്പെട്ടുയര്ന്ന വിവാദങ്ങളില് കമ്മിഷണര് അതൃപ്തി അറിയിച്ചുവെന്നാണ് സൂചന. കാപ്പ ചുമത്തുന്നതിന് ആവശ്യമായ കേസിന്റെ വിശദാംശങ്ങള് അറിയിക്കാന് ആവശ്യപ്പെട്ട മുന് കമ്മിഷണറുടെ കത്തില് നടപടിയെടുക്കാതിരുന്നതിനു വിശദീകരണം തേടി. കത്ത് പുറത്തായശേഷം വ്യാജമെന്ന രീതിയില് അന്വേഷണസംഘത്തില്നിന്നു പ്രചാരണമുണ്ടായതിലും കമ്മിഷണര് അന്വേഷണസംഘത്തെ വിമര്ശിച്ചു. എ.ഡി.ജി.പി. നിര്ദേശിച്ചതനുസരിച്ച് 15നകം കുറ്റപത്രം സമര്പ്പിക്കാന് ധാരണയായിട്ടുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha