രമേശിന്റെ കാത്തിരിപ്പ് അവസാനിക്കുന്നില്ല; ഉപമുഖ്യമന്ത്രി പദത്തെ ചൊല്ലിയുള്ള പ്രതിസന്ധിമുറുകുന്നു; രണ്ടാം സ്ഥാനം തങ്ങള്ക്കവകാശപ്പെട്ടതെന്ന് ലീഗ്
കുറച്ചു ദിവസമായി ഉരുണ്ടു കൂടിവന്ന പ്രശ്നങ്ങള് കോണ്ഗ്രസ്സിനെ വരിഞ്ഞു മുറുക്കിയിരിക്കുകയാണ്. രമേശ് ചെന്നിത്തലയുടെ ഉപമുഖ്യമന്ത്രി പദത്തെ ചൊല്ലിതുടങ്ങിയ പ്രശ്നം മുന്നണിയിലേക്കും പടര്ന്നിരിക്കുന്നു. രമേശ് വിവാദത്തിന്റെ പശ്ചാത്തലത്തില് ചേര്ന്ന യു.ഡി.എഫ് യോഗത്തില് ഘടക കക്ഷികള് കോണ്ഗ്രസിനെതിരെ കടുത്ത നിലപാടാണ് എടുത്തത്. മുസ്ലീം ലീഗും, സോഷ്യലിസ്റ്റ് ജനതയുമാണ് പ്രതിഷേധവുമായി രംഗത്തെത്തിയത്.
പതിവു പോലെ മുഖ്യമന്ത്രി ഉമ്മന് ചാണ്ടി രമേശ് വിഷയത്തിലും മാധ്യമങ്ങള്ക്കുമേല് പഴിചാരുകയായിരുന്നു. എന്നാല് എല്ലാം മാധ്യമ സൃഷ്ടിയാണെന്ന് പറഞ്ഞ് ഒഴിയാനാകില്ലെന്നും കാര്യങ്ങള് ഗൗരവമായി കാണണമെന്നും കുഞ്ഞാലികുട്ടി പറഞ്ഞു. വാര്ത്തകള് മാധ്യമങ്ങള്ക്ക് എത്തിച്ചുകൊടുക്കുന്നത് കോണ്ഗ്രസുകാര് തന്നെയാണെന്നകാര്യം മുഖ്യമന്ത്രി മറക്കരുതെന്ന് വീരേന്ദ്രകുമാര് ഓര്മ്മിപ്പിച്ചു.
മുന്നണിയിലെ രണ്ടാമത്തെ കക്ഷി ലീഗാണെന്നും അതിനാല് ഉപമുഖ്യമന്ത്രി പദം ലീഗിന് അവകാശപ്പെട്ടതാണെന്നും എല്ലാ കക്ഷികള്ക്കും അഭിമാനമുണ്ടെന്നും കുഞ്ഞാലികുട്ടി പറഞ്ഞു. മുന്നണിയില് ചര്ച്ചചെയ്യാതെ ഇക്കാര്യത്തില് തീരുമാനമെടുക്കരുതെന്നും കുഞ്ഞാലികുട്ടി വ്യക്തമാക്കി. വരാനുള്ള തെരെഞ്ഞെടുപ്പുകൂടി കണക്കിലെടുത്താവണം തീരുമാനമെന്നും കുഞ്ഞാലികുട്ടി ഓര്മ്മിപ്പിച്ചു. ഉപമുഖ്യമന്ത്രിസ്ഥാനം തങ്ങള്ക്കു വേണ്ടെന്നും രമേശ് ചെന്നിത്തല ഉപമുഖ്യമന്ത്രിയാകുന്നതില് വിരോധമില്ലെന്നുമായിരുന്നു മൂന്നു ദിവസം മുമ്പു മന്ത്രി പി.കെ. കുഞ്ഞാലിക്കുട്ടി പറഞ്ഞത്. എന്നാല് മറ്റു ലീഗ് നേതാക്കളില് നിന്ന് വന് എതിര്പ്പ് വന്നതോടെയാണ് കുഞ്ഞാലികുട്ടി തന്റെ നയം മാറ്റിയത്.
എന്തായാലും രമേശിന്റെ മന്ത്രിസഭാ പ്രവേശം തൃശ്ശങ്കുവില് ആയിരിക്കുകയാണ്. മന്ത്രിസഭയില് രണ്ടാമന് ആകാന് കഴിഞ്ഞില്ലെങ്കില് രമേശ് മന്ത്രിസഭയില് വരില്ലെന്നാണ് ഐ ഗ്രൂപ്പ് നേതാക്കള് വ്യക്തമാക്കുന്നത്. ഇക്കാര്യത്തില് മുഖ്യമന്ത്രിയാണ് ഘടകകക്ഷികളെ അനുനയിപ്പിക്കേണ്ടതും ഹൈക്കമാന്റിനെക്കൊണ്ട് സമ്മതിപ്പിക്കേണ്ടതും എന്നാണ് ഐ ഗ്രൂപ്പ് പറയുന്നത്. പുതിയ സംഭവവികാസങ്ങളില് അവര് ക്ഷുഭിതരുമാണ്.
https://www.facebook.com/Malayalivartha